(౯౨) ౯. న యథాచిత్తస్స వాచాతికథా

౫౬౪. న యథాచిత్తస్స వాచాతి? ఆమన్తా. అఫస్సకస్స వాచా అవేదనకస్స వాచా అసఞ్ఞకస్స వాచా అచేతనకస్స వాచా అచిత్తకస్స వాచాతి? న హేవం వత్తబ్బే…పే… నను సఫస్సకస్స వాచా సవేదనకస్స వాచా ససఞ్ఞకస్స వాచా సచేతనకస్స వాచా సచిత్తకస్స వాచాతి? ఆమన్తా. హఞ్చి సఫస్సకస్స వాచా…పే… సచిత్తకస్స వాచా, నో చ వత రే వత్తబ్బే – ‘‘న యథాచిత్తస్స వాచా’’తి.

న యథాచిత్తస్స వాచాతి? ఆమన్తా. అనావట్టేన్తస్స [అనావట్టన్తస్స (పీ.), అనావజ్జన్తస్స (సీ. స్యా. క.) కథా. ౪౮౪ పస్సితబ్బం] వాచా…పే… అనాభోగస్స వాచా…పే… అప్పణిదహన్తస్స వాచాతి? న హేవం వత్తబ్బే…పే… నను ఆవట్టేన్తస్స వాచా ఆభోగస్స వాచా…పే… పణిదహన్తస్స వాచాతి? ఆమన్తా. హఞ్చి ఆవట్టేన్తస్స వాచా ఆభోగస్స వాచా పణిదహన్తస్స వాచా, నో చ వత రే వత్తబ్బే – ‘‘న యథాచిత్తస్స వాచా’’తి.

న యథాచిత్తస్స వాచాతి? ఆమన్తా. నను వాచా చిత్తసముట్ఠానా చిత్తేన సహజాతా చిత్తేన సహ ఏకుప్పాదాతి? ఆమన్తా. హఞ్చి వాచా చిత్తసముట్ఠానా చిత్తేన సహజాతా చిత్తేన సహ ఏకుప్పాదా, నో చ వత రే వత్తబ్బే – ‘‘న యథాచిత్తస్స వాచా’’తి.

న యథాచిత్తస్స వాచాతి? ఆమన్తా. న భణితుకామో భణతి, న కథేతుకామో కథేతి, న ఆలపితుకామో ఆలపతి, న వోహరితుకామో వోహరతీతి? న హేవం వత్తబ్బే…పే… నను భణితుకామో భణతి, కథేతుకామో కథేతి, ఆలపితుకామో ఆలపతి, వోహరితుకామో వోహరతీతి? ఆమన్తా. హఞ్చి భణితుకామో భణతి, కథేతుకామో కథేతి, ఆలపితుకామో ఆలపతి, వోహరితుకామో వోహరతి, నో చ వత రే వత్తబ్బే – ‘‘న యథాచిత్తస్స వాచా’’తి.

౫౬౫. న వత్తబ్బం – ‘‘న యథాచిత్తస్స వాచా’’తి? ఆమన్తా. నను అత్థి కోచి ‘‘అఞ్ఞం భణిస్సామీ’’తి అఞ్ఞం భణతి, ‘‘అఞ్ఞం కథేస్సామీ’’తి అఞ్ఞం కథేతి, ‘‘అఞ్ఞం ఆలపిస్సామీ’’తి అఞ్ఞం ఆలపతి, ‘‘అఞ్ఞం వోహరిస్సామీ’’తి అఞ్ఞం వోహరతీతి? ఆమన్తా. హఞ్చి అత్థి కోచి ‘‘అఞ్ఞం భణిస్సామీ’’తి అఞ్ఞం భణతి,…పే… ‘‘అఞ్ఞం వోహరిస్సామీ’’తి అఞ్ఞం వోహరతి, తేన వత రే వత్తబ్బే – ‘‘న యథాచిత్తస్స వాచా’’తి.

న యథాచిత్తస్స వాచాతికథా నిట్ఠితా.