(౯౦) ౭. వితక్కానుపతితకథా

౫౬౨. సబ్బం చిత్తం వితక్కానుపతితన్తి? ఆమన్తా. సబ్బం చిత్తం విచారానుపతితం పీతానుపతితం సుఖానుపతితం దుక్ఖానుపతితం సోమనస్సానుపతితం దోమనస్సానుపతితం ఉపేక్ఖానుపతితం సద్ధానుపతితం వీరియానుపతితం సతానుపతితం సమాధానుపతితం పఞ్ఞానుపతితం రాగానుపతితం దోసానుపతితం…పే… అనోత్తప్పానుపతితన్తి? న హేవం వత్తబ్బే…పే….

సబ్బం చిత్తం వితక్కానుపతితన్తి? ఆమన్తా. నను అత్థి అవితక్కో విచారమత్తో సమాధీతి? ఆమన్తా. హఞ్చి అత్థి అవితక్కో విచారమత్తో సమాధి, నో చ వత రే వత్తబ్బే – ‘‘సబ్బం చిత్తం వితక్కానుపతిత’’న్తి.

సబ్బం చిత్తం వితక్కానుపతితన్తి? ఆమన్తా. నను అత్థి అవితక్కో అవిచారో సమాధీతి? ఆమన్తా. హఞ్చి అత్థి అవితక్కో అవిచారో సమాధి, నో చ వత రే వత్తబ్బే – ‘‘సబ్బం చిత్తం వితక్కానుపతిత’’న్తి. సబ్బం చిత్తం వితక్కానుపతితన్తి? ఆమన్తా. నను తయో సమాధీ వుత్తా భగవతా – సవితక్కో సవిచారో సమాధి, అవితక్కో విచారమత్తో సమాధి, అవితక్కో అవిచారో సమాధీతి [దీ. ని. ౩.౩౦౫, ౩౫౩]? ఆమన్తా. హఞ్చి తయో సమాధీ వుత్తా భగవతా – సవితక్కో సవిచారో సమాధి, అవితక్కో విచారమత్తో సమాధి, అవితక్కో అవిచారో సమాధి, నో చ వత రే వత్తబ్బే – ‘‘సబ్బం చిత్తం వితక్కానుపతిత’’న్తి.

వితక్కానుపతితకథా నిట్ఠితా.