౯. నవమవగ్గో

(౮౮) ౫. ఞాణం అనారమ్మణన్తికథా

౫౫౭. ఞాణం అనారమ్మణన్తి? ఆమన్తా. రూపం నిబ్బానం చక్ఖాయతనం…పే… ఫోట్ఠబ్బాయతనన్తి? న హేవం వత్తబ్బే…పే… ఞాణం అనారమ్మణన్తి? ఆమన్తా. పఞ్ఞా పఞ్ఞిన్ద్రియం పఞ్ఞాబలం సమ్మాదిట్ఠి ధమ్మవిచయసమ్బోజ్ఝఙ్గో అనారమ్మణోతి? న హేవం వత్తబ్బే…పే… పఞ్ఞా పఞ్ఞిన్ద్రియం పఞ్ఞాబలం సమ్మాదిట్ఠి ధమ్మవిచయసమ్బోజ్ఝఙ్గో సారమ్మణోతి? ఆమన్తా. ఞాణం సారమ్మణన్తి? న హేవం వత్తబ్బే…పే….

ఞాణం అనారమ్మణన్తి? ఆమన్తా. కతమక్ఖన్ధపరియాపన్నన్తి? సఙ్ఖారక్ఖన్ధపరియాపన్నన్తి. సఙ్ఖారక్ఖన్ధో అనారమ్మణోతి? న హేవం వత్తబ్బే…పే… సఙ్ఖారక్ఖన్ధో అనారమ్మణోతి? ఆమన్తా. వేదనాక్ఖన్ధో సఞ్ఞాక్ఖన్ధో విఞ్ఞాణక్ఖన్ధో అనారమ్మణోతి? న హేవం వత్తబ్బే…పే… ఞాణం సఙ్ఖారక్ఖన్ధపరియాపన్నం అనారమ్మణన్తి? ఆమన్తా. పఞ్ఞా సఙ్ఖారక్ఖన్ధపరియాపన్నా అనారమ్మణాతి? న హేవం వత్తబ్బే…పే… పఞ్ఞా సఙ్ఖారక్ఖన్ధపరియాపన్నా సారమ్మణాతి? ఆమన్తా. ఞాణం సఙ్ఖారక్ఖన్ధపరియాపన్నం సారమ్మణన్తి? న హేవం వత్తబ్బే…పే….

ఞాణం సఙ్ఖారక్ఖన్ధపరియాపన్నం అనారమ్మణం, పఞ్ఞా సఙ్ఖారక్ఖన్ధపరియాపన్నా సారమ్మణాతి? ఆమన్తా. సఙ్ఖారక్ఖన్ధో ఏకదేసో సారమ్మణో ఏకదేసో అనారమ్మణోతి? న హేవం వత్తబ్బే…పే… సఙ్ఖారక్ఖన్ధో ఏకదేసో సారమ్మణో ఏకదేసో అనారమ్మణోతి? ఆమన్తా. వేదనాక్ఖన్ధో సఞ్ఞాక్ఖన్ధో విఞ్ఞాణక్ఖన్ధో ఏకదేసో సారమ్మణో ఏకదేసో అనారమ్మణోతి? న హేవం వత్తబ్బే…పే….

౫౫౮. న వత్తబ్బం – ‘‘ఞాణం అనారమ్మణ’’న్తి? ఆమన్తా. అరహా చక్ఖువిఞ్ఞాణసమఙ్గీ ఞాణీతి వత్తబ్బోతి? ఆమన్తా. అత్థి తస్స ఞాణస్స ఆరమ్మణన్తి? న హేవం వత్తబ్బే…పే… తేన హి ఞాణం అనారమ్మణన్తి. అరహా చక్ఖువిఞ్ఞాణసమఙ్గీ పఞ్ఞవాతి వత్తబ్బోతి? ఆమన్తా. అత్థి తాయ పఞ్ఞాయ ఆరమ్మణన్తి? న హేవం వత్తబ్బే…పే…. తేన హి పఞ్ఞా అనారమ్మణాతి.

ఞాణం అనారమ్మణన్తికథా నిట్ఠితా.