౯. నవమవగ్గో

(౮౫) ౨. అమతారమ్మణకథా

౫౪౯. అమతారమ్మణం సంయోజనన్తి? ఆమన్తా. అమతం సంయోజనియం గన్థనియం ఓఘనియం యోగనియం నీవరణియం పరామట్ఠం ఉపాదానియం సంకిలేసియన్తి? న హేవం వత్తబ్బే…పే… నను అమతం అసంయోజనియం అగన్థనియం…పే… అసంకిలేసియన్తి? ఆమన్తా. హఞ్చి అమతం అసంయోజనియం…పే… అసంకిలేసియం, నో చ వత రే వత్తబ్బే – ‘‘అమతారమ్మణం సంయోజన’’న్తి.

అమతం ఆరబ్భ రాగో ఉప్పజ్జతీతి? ఆమన్తా. అమతం రాగట్ఠానియం రజనియం కమనియం మదనియం బన్ధనియం ముచ్ఛనియన్తి? న హేవం వత్తబ్బే…పే… నను అమతం న రాగట్ఠానియం న రజనియం న కమనియం న మదనియం న బన్ధనియం న ముచ్ఛనియన్తి? ఆమన్తా. హఞ్చి అమతం న రాగట్ఠానియం న రజనియం న కమనియం న మదనియం న బన్ధనియం న ముచ్ఛనియం, నో చ వత రే వత్తబ్బే – ‘‘అమతం ఆరబ్భ రాగో ఉప్పజ్జతీ’’తి.

అమతం ఆరబ్భ దోసో ఉప్పజ్జతీతి? ఆమన్తా. అమతం దోసట్ఠానియం కోపట్ఠానియం పటిఘట్ఠానియన్తి? న హేవం వత్తబ్బే…పే… నను అమతం న దోసట్ఠానియం న కోపట్ఠానియం న పటిఘట్ఠానియన్తి? ఆమన్తా. హఞ్చి అమతం న దోసట్ఠానియం న కోపట్ఠానియం న పటిఘట్ఠానియం, నో చ వత రే వత్తబ్బే – ‘‘అమతం ఆరబ్భ దోసో ఉప్పజ్జతీ’’తి.

అమతం ఆరబ్భ మోహో ఉప్పజ్జతీతి? ఆమన్తా. అమతం మోహట్ఠానియం అఞ్ఞాణకరణం అచక్ఖుకరణం పఞ్ఞానిరోధియం విఘాతపక్ఖియం అనిబ్బానసంవత్తనియన్తి? న హేవం వత్తబ్బే…పే… నను అమతం న మోహట్ఠానియం న అఞ్ఞాణకరణం న అచక్ఖుకరణం పఞ్ఞాబుద్ధియం అవిఘాతపక్ఖియం నిబ్బానసంవత్తనియన్తి? ఆమన్తా. హఞ్చి అమతం న మోహట్ఠానియం న అఞ్ఞాణకరణం…పే… నిబ్బానసంవత్తనియం, నో చ వత రే వత్తబ్బే – ‘‘అమతం ఆరబ్భ మోహో ఉప్పజ్జతీ’’తి.

౫౫౦. రూపం ఆరబ్భ సంయోజనా ఉప్పజ్జన్తి, రూపం సంయోజనియం గన్థనియం…పే… సంకిలేసియన్తి? ఆమన్తా. అమతం ఆరబ్భ సంయోజనా ఉప్పజ్జన్తి, అమతం సంయోజనియం…పే… సంకిలేసియన్తి? న హేవం వత్తబ్బే…పే….

రూపం ఆరబ్భ రాగో ఉప్పజ్జతి, రూపం రాగట్ఠానియం రజనియం కమనియం మదనియం బన్ధనియం ముచ్ఛనియన్తి? ఆమన్తా. అమతం ఆరబ్భ రాగో ఉప్పజ్జతి, అమతం రాగట్ఠానియం…పే… ముచ్ఛనియన్తి? న హేవం వత్తబ్బే…పే….

రూపం ఆరబ్భ దోసో ఉప్పజ్జతి, రూపం దోసట్ఠానియం కోపట్ఠానియం పటిఘట్ఠానియన్తి? ఆమన్తా. అమతం ఆరబ్భ దోసో ఉప్పజ్జతి, అమతం దోసట్ఠానియం కోపట్ఠానియం పటిఘట్ఠానియన్తి? న హేవం వత్తబ్బే…పే….

రూపం ఆరబ్భ మోహో ఉప్పజ్జతి, రూపం మోహట్ఠానియం అఞ్ఞాణకరణం…పే… అనిబ్బానసంవత్తనియన్తి? ఆమన్తా. అమతం ఆరబ్భ మోహో ఉప్పజ్జతి, అమతం మోహట్ఠానియం అఞ్ఞాణకరణం…పే… అనిబ్బానసంవత్తనియన్తి? న హేవం వత్తబ్బే…పే….

అమతం ఆరబ్భ సంయోజనా ఉప్పజ్జన్తి, అమతం అసంయోజనియం అగన్థనియం అనోఘనియం అయోగనియం అనీవరణియం అపరామట్ఠం అనుపాదానియం అసంకిలేసియన్తి? ఆమన్తా. రూపం ఆరబ్భ సంయోజనా ఉప్పజ్జన్తి, రూపం అసంయోజనియం అగన్థనియం…పే… అసంకిలేసియన్తి? న హేవం వత్తబ్బే…పే….

అమతం ఆరబ్భ రాగో ఉప్పజ్జతి, అమతం న రాగట్ఠానియం న రజనియం న కమనియం న మదనియం న బన్ధనియం న ముచ్ఛనియన్తి? ఆమన్తా. రూపం ఆరబ్భ రాగో ఉప్పజ్జతి, రూపం న రాగట్ఠానియం…పే… న ముచ్ఛనియన్తి? న హేవం వత్తబ్బే…పే….

అమతం ఆరబ్భ దోసో ఉప్పజ్జతి, అమతం న దోసట్ఠానియం న కోపట్ఠానియం న పటిఘట్ఠానియన్తి? ఆమన్తా. రూపం ఆరబ్భ దోసో ఉప్పజ్జతి, రూపం న దోసట్ఠానియం న కోపట్ఠానియం న పటిఘట్ఠానియన్తి? న హేవం వత్తబ్బే…పే….

అమతం ఆరబ్భ మోహో ఉప్పజ్జతి, అమతం న మోహట్ఠానియం న అఞ్ఞాణకరణం…పే… నిబ్బానసంవత్తనియన్తి? ఆమన్తా. రూపం ఆరబ్భ మోహో ఉప్పజ్జతి, రూపం న మోహట్ఠానియం న అఞ్ఞాణకరణం…పే… నిబ్బానసంవత్తనియన్తి? న హేవం వత్తబ్బే…పే….

౫౫౧. న వత్తబ్బం – ‘‘అమతారమ్మణం సంయోజన’’న్తి? ఆమన్తా. నను వుత్తం భగవతా – ‘‘నిబ్బానం నిబ్బానతో సఞ్జానాతి, నిబ్బానం నిబ్బానతో సఞ్జానిత్వా నిబ్బానం మఞ్ఞతి, నిబ్బానస్మిం మఞ్ఞతి, నిబ్బానతో మఞ్ఞతి, నిబ్బానం మేతి మఞ్ఞతి, నిబ్బానం అభినన్దతీ’’తి [మ. ని. ౧.౬]! అత్థేవ సుత్తన్తోతి? ఆమన్తా. తేన హి అమతారమ్మణం సంయోజనన్తి.

అమతారమ్మణకథా నిట్ఠితా.