(౭౩) ౧. ఛగతికథా

౫౦౩. ఛ గతియోతి? ఆమన్తా. నను పఞ్చ గతియో వుత్తా భగవతా – నిరయో, తిరచ్ఛానయోని, పేత్తివిసయో, మనుస్సా, దేవాతి [మ. ని. ౧.౧౫౩]? ఆమన్తా. హఞ్చి పఞ్చ గతియో వుత్తా భగవతా – నిరయో, తిరచ్ఛానయోని, పేత్తివిసయో, మనుస్సా, దేవా; నో చ వత రే వత్తబ్బే – ‘‘ఛ గతియో’’తి.

ఛ గతియోతి? ఆమన్తా. నను కాలకఞ్చికా [కాలకఞ్జికా (సీ. స్యా. కం.), కాళకఞ్జకా (పీ.)] సురా పేతానం సమానవణ్ణా సమానభోగా సమానాహారా సమానాయుకా పేతేహి సహ ఆవాహవివాహం గచ్ఛన్తీతి? ఆమన్తా. హఞ్చి కాలకఞ్చికా అసురా పేతానం సమానవణ్ణా సమానభోగా సమానాహారా సమానాయుకా పేతేహి సహ ఆవాహవివాహం గచ్ఛన్తి, నో చ వత రే వత్తబ్బే – ‘‘ఛ గతియో’’తి.

ఛ గతియోతి? ఆమన్తా. నను వేపచిత్తిపరిసా దేవానం సమానవణ్ణా సమానభోగా సమానాహారా సమానాయుకా దేవేహి సహ ఆవాహవివాహం గచ్ఛన్తీతి? ఆమన్తా. హఞ్చి వేపచిత్తిపరిసా దేవానం సమానవణ్ణా సమానభోగా సమానాహారా సమానాయుకా దేవేహి సహ ఆవాహవివాహం గచ్ఛన్తి, నో చ వత రే వత్తబ్బే – ‘‘ఛ గతియో’’తి.

ఛ గతియోతి? ఆమన్తా. నను వేపచిత్తిపరిసా పుబ్బదేవాతి? ఆమన్తా. హఞ్చి వేపచిత్తిపరిసా పుబ్బదేవా, నో చ వత రే వత్తబ్బే – ‘‘ఛ గతియో’’తి.

౫౦౪. న వత్తబ్బం – ‘‘ఛ గతియో’’తి? ఆమన్తా. నను అత్థి అసురకాయోతి, ఆమన్తా. హఞ్చి అత్థి అసురకాయో, తేన వత రే వత్తబ్బే – ‘‘ఛ గతియో’’తి.

ఛగతికథా నిట్ఠితా.