(౬౩) ౧. సఙ్గహితకథా

౪౭౧. నత్థి కేచి ధమ్మా కేహిచి ధమ్మేహి సఙ్గహితాతి [సఙ్గహీతాతి (పీ.)]? ఆమన్తా. నను అత్థి కేచి ధమ్మా కేహిచి ధమ్మేహి గణనం గచ్ఛన్తి ఉద్దేసం గచ్ఛన్తి పరియాపన్నాతి? ఆమన్తా. హఞ్చి అత్థి కేచి ధమ్మా కేహిచి ధమ్మేహి గణనం గచ్ఛన్తి ఉద్దేసం గచ్ఛన్తి పరియాపన్నా, నో చ వత రే వత్తబ్బే – ‘‘నత్థి కేచి ధమ్మా కేహిచి ధమ్మేహి సఙ్గహితా’’తి.

చక్ఖాయతనం కతమక్ఖన్ధగణనం [కతమం ఖన్ధగణనం (సీ. పీ. క.)] గచ్ఛతీతి? రూపక్ఖన్ధగణనం గచ్ఛతీతి. హఞ్చి చక్ఖాయతనం రూపక్ఖన్ధగణనం గచ్ఛతి, తేన వత రే వత్తబ్బే – ‘‘చక్ఖాయతనం రూపక్ఖన్ధేన సఙ్గహిత’’న్తి. సోతాయతనం…పే… ఘానాయతనం…పే… జివ్హాయతనం…పే… కాయాయతనం కతమక్ఖన్ధగణనం గచ్ఛతీతి? రూపక్ఖన్ధగణనం గచ్ఛతీతి. హఞ్చి కాయాయతనం రూపక్ఖన్ధగణనం గచ్ఛతి, తేన వత రే వత్తబ్బే – ‘‘కాయాయతనం రూపక్ఖన్ధేన సఙ్గహిత’’న్తి.

రూపాయతనం…పే… సద్దాయతనం…పే… గన్ధాయతనం…పే… రసాయతనం…పే… ఫోట్ఠబ్బాయతనం కతమక్ఖన్ధగణనం గచ్ఛతీతి? రూపక్ఖన్ధగణనం గచ్ఛతీతి. హఞ్చి ఫోట్ఠబ్బాయతనం రూపక్ఖన్ధగణనం గచ్ఛతి, తేన వత రే వత్తబ్బే – ‘‘ఫోట్ఠబ్బాయతనం రూపక్ఖన్ధేన సఙ్గహిత’’న్తి.

సుఖా వేదనా కతమక్ఖన్ధగణనం గచ్ఛతీతి? వేదనాక్ఖన్ధగణనం గచ్ఛతీతి. హఞ్చి సుఖా వేదనా వేదనాక్ఖన్ధగణనం గచ్ఛతి, తేన వత రే వత్తబ్బే – ‘‘సుఖా వేదనా వేదనాక్ఖన్ధేన సఙ్గహితా’’తి. దుక్ఖా వేదనా…పే… అదుక్ఖమసుఖా వేదనా కతమక్ఖన్ధగణనం గచ్ఛతీతి? వేదనాక్ఖన్ధగణనం గచ్ఛతీతి. హఞ్చి అదుక్ఖమసుఖా వేదనా వేదనాక్ఖన్ధగణనం గచ్ఛతి, తేన వత రే వత్తబ్బే – ‘‘అదుక్ఖమసుఖా వేదనా వేదనాక్ఖన్ధేన సఙ్గహితా’’తి.

చక్ఖుసమ్ఫస్సజా సఞ్ఞా కతమక్ఖన్ధగణనం గచ్ఛతీతి? సఞ్ఞాక్ఖన్ధగణనం గచ్ఛతీతి. హఞ్చి చక్ఖుసమ్ఫస్సజా సఞ్ఞా సఞ్ఞాక్ఖన్ధగణనం గచ్ఛతి, తేన వత రే వత్తబ్బే – ‘‘చక్ఖుసమ్ఫస్సజా సఞ్ఞా సఞ్ఞాక్ఖన్ధేన సఙ్గహితా’’తి. సోతసమ్ఫస్సజా సఞ్ఞా…పే… మనోసమ్ఫస్సజా సఞ్ఞా కతమక్ఖన్ధగణనం గచ్ఛతీతి? సఞ్ఞాక్ఖన్ధగణనం గచ్ఛతీతి. హఞ్చి మనోసమ్ఫస్సజా సఞ్ఞా సఞ్ఞాక్ఖన్ధగణనం గచ్ఛతి, తేన వత రే వత్తబ్బే – ‘‘మనోసమ్ఫస్సజా సఞ్ఞా సఞ్ఞాక్ఖన్ధేన సఙ్గహితా’’తి.

చక్ఖుసమ్ఫస్సజా చేతనా…పే… మనోసమ్ఫస్సజా చేతనా కతమక్ఖన్ధగణనం గచ్ఛతీతి? సఙ్ఖారక్ఖన్ధగణనం గచ్ఛతీతి. హఞ్చి మనోసమ్ఫస్సజా చేతనా సఙ్ఖారక్ఖన్ధగణనం గచ్ఛతి, తేన వత రే వత్తబ్బే – ‘‘మనోసమ్ఫస్సజా చేతనా సఙ్ఖారక్ఖన్ధేన సఙ్గహితా’’తి.

చక్ఖువిఞ్ఞాణం …పే… మనోవిఞ్ఞాణం కతమక్ఖన్ధగణనం గచ్ఛతీతి? విఞ్ఞాణక్ఖన్ధగణనం గచ్ఛతీతి. హఞ్చి మనోవిఞ్ఞాణం విఞ్ఞాణక్ఖన్ధగణనం గచ్ఛతి, తేన వత రే వత్తబ్బే – ‘‘మనోవిఞ్ఞాణం విఞ్ఞాణక్ఖన్ధేన సఙ్గహిత’’న్తి.

౪౭౨. యథా దామేన వా యోత్తేన వా ద్వే బలిబద్దా సఙ్గహితా, సిక్కాయ పిణ్డపాతో సఙ్గహితో, సా గద్దులేన సఙ్గహితో; ఏవమేవ తే ధమ్మా తేహి ధమ్మేహి సఙ్గహితాతి [సకవాదివచనం (అట్ఠకథా పస్సితబ్బా)]? హఞ్చి దామేన వా యోత్తేన వా ద్వే బలీబద్దా సఙ్గహితా, సిక్కాయ పిణ్డపాతో సఙ్గహితో, సా గద్దులేన సఙ్గహితో, తేన వత రే వత్తబ్బే – ‘‘అత్థి కేచి ధమ్మా కేహిచి ధమ్మేహి సఙ్గహితా’’తి [సకవాదివచనం (అట్ఠకథా పస్సితబ్బా)].

సఙ్గహితకథా నిట్ఠితా.