౬. ఛట్ఠవగ్గో

(౬౦) ౮. పథవీధాతు సనిదస్సనాతిఆదికథా

౪౬౫. పథవీధాతు సనిదస్సనాతి? ఆమన్తా. రూపం రూపాయతనం రూపధాతు నీలం పీతకం లోహితకం ఓదాతం చక్ఖువిఞ్ఞేయ్యం చక్ఖుస్మిం పటిహఞ్ఞతి చక్ఖుస్స ఆపాథం ఆగచ్ఛతీతి? న హేవం వత్తబ్బే…పే….

పథవీధాతు సనిదస్సనాతి? ఆమన్తా. చక్ఖుఞ్చ పటిచ్చ పథవీధాతుఞ్చ ఉప్పజ్జతి చక్ఖువిఞ్ఞాణన్తి? న హేవం వత్తబ్బే…పే….

చక్ఖుఞ్చ పటిచ్చ పథవీధాతుఞ్చ ఉప్పజ్జతి చక్ఖువిఞ్ఞాణన్తి? ఆమన్తా. ‘‘చక్ఖుఞ్చ పటిచ్చ పథవీధాతుఞ్చ ఉప్పజ్జతి చక్ఖువిఞ్ఞాణ’’న్తి – అత్థేవ సుత్తన్తోతి? నత్థి. ‘‘చక్ఖుఞ్చ పటిచ్చ రూపే చ ఉప్పజ్జతి చక్ఖువిఞ్ఞాణ’’న్తి – అత్థేవ సుత్తన్తోతి? ఆమన్తా. హఞ్చి ‘‘చక్ఖుఞ్చ పటిచ్చ రూపే చ ఉప్పజ్జతి చక్ఖువిఞ్ఞాణ’’న్తి – అత్థేవ సుత్తన్తో, నో చ వత రే వత్తబ్బే – ‘‘చక్ఖుఞ్చ పటిచ్చ పథవీధాతుఞ్చ ఉప్పజ్జతి చక్ఖువిఞ్ఞాణ’’న్తి.

౪౬౬. న వత్తబ్బం – ‘‘పథవీధాతు సనిదస్సనా’’తి? ఆమన్తా. నను పస్సతి భూమిం పాసాణం పబ్బతన్తి? ఆమన్తా. హఞ్చి పస్సతి [పస్ససి (సీ. స్యా. క.) ఏవముపరిపి] భూమిం పాసాణం పబ్బతం, తేన వత రే వత్తబ్బే – ‘‘పథవీధాతు సనిదస్సనా’’తి…పే….

న వత్తబ్బం – ‘‘ఆపోధాతు సనిదస్సనా’’తి? ఆమన్తా. నను పస్సతి ఉదకన్తి? ఆమన్తా. హఞ్చి పస్సతి ఉదకం, తేన వత రే వత్తబ్బే – ‘‘ఆపోధాతు సనిదస్సనాతి…పే….

న వత్తబ్బం – తేజోధాతు సనిదస్సనాతి? ఆమన్తా. నను పస్సతి అగ్గిం జలన్తన్తి? ఆమన్తా. హఞ్చి పస్సతి అగ్గిం జలన్తం, తేన వత రే వత్తబ్బే – ‘‘తేజోధాతు సనిదస్సనా’’తి…పే….

న వత్తబ్బం – ‘‘వాయోధాతు సనిదస్సనా’’తి? ఆమన్తా. నను పస్సతి వాతేన రుక్ఖే సఞ్చాలియమానేతి? ఆమన్తా. హఞ్చి పస్సతి వాతేన రుక్ఖే సఞ్చాలియమానే, తేన వత రే వత్తబ్బే – ‘‘వాయోధాతు సనిదస్సనా’’తి…పే….

పథవీధాతు సనిదస్సనాతిఆదికథా నిట్ఠితా.