(౫౮) ౬. ఆకాసకథా

౪౬౦. ఆకాసో అసఙ్ఖతోతి? ఆమన్తా. నిబ్బానం తాణం లేణం సరణం పరాయనం అచ్చుతం అమతన్తి? న హేవం వత్తబ్బే…పే… ఆకాసో అసఙ్ఖతో, నిబ్బానం అసఙ్ఖతన్తి? ఆమన్తా. ద్వే అసఙ్ఖతానీతి? న హేవం వత్తబ్బే…పే…. ద్వే అసఙ్ఖతానీతి? ఆమన్తా. ద్వే తాణాని…పే… అన్తరికా వాతి? న హేవం వత్తబ్బే…పే….

ఆకాసో అసఙ్ఖతోతి? ఆమన్తా. అత్థి కేచి అనాకాసం ఆకాసం కరోన్తీతి? ఆమన్తా. అత్థి కేచి సఙ్ఖతం అసఙ్ఖతం కరోన్తీతి? న హేవం వత్తబ్బే…పే… అత్థి కేచి ఆకాసం అనాకాసం కరోన్తీతి? ఆమన్తా. అత్థి కేచి అసఙ్ఖతం సఙ్ఖతం కరోన్తీతి? న హేవం వత్తబ్బే…పే….

ఆకాసే పక్ఖినో గచ్ఛన్తి, చన్దిమసూరియా గచ్ఛన్తి, తారకరూపాని గచ్ఛన్తి, ఇద్ధిం వికుబ్బన్తి, బాహుం చాలేన్తి, పాణిం చాలేన్తి, లేడ్డుం ఖిపన్తి, లగుళం ఖిపన్తి, ఇద్ధిం [సత్తిం (?)] ఖిపన్తి, ఉసుం ఖిపన్తీతి? ఆమన్తా. అసఙ్ఖతే పక్ఖినో గచ్ఛన్తి, చన్దిమసూరియా గచ్ఛన్తి, తారకరూపాని గచ్ఛన్తి, ఇద్ధిం వికుబ్బన్తి, బాహుం చాలేన్తి, పాణిం చాలేన్తి, లేడ్డుం ఖిపన్తి, లగుళం ఖిపన్తి, ఇద్ధిం ఖిపన్తి, ఉసుం ఖిపన్తీతి? న హేవం వత్తబ్బే…పే….

౪౬౧. ఆకాసం పరివారేత్వా ఘరాని కరోన్తి కోట్ఠాని కరోన్తీతి? ఆమన్తా. అసఙ్ఖతం పరివారేత్వా ఘరాని కరోన్తి కోట్ఠాని కరోన్తీతి? న హేవం వత్తబ్బే…పే….

ఉదపానే ఖఞ్ఞమానే అనాకాసో ఆకాసో హోతీతి? ఆమన్తా. సఙ్ఖతం అసఙ్ఖతం హోతీతి? న హేవం వత్తబ్బే…పే….

తుచ్ఛఉదపానే పూరియమానే, తుచ్ఛకోట్ఠే పూరియమానే, తుచ్ఛకుమ్భియా పూరియమానాయ ఆకాసో అన్తరధాయతీతి? ఆమన్తా. అసఙ్ఖతం అన్తరధాయతీతి? న హేవం వత్తబ్బే…పే….

౪౬౨. న వత్తబ్బం – ‘‘ఆకాసో అసఙ్ఖతో’’తి? ఆమన్తా. ఆకాసో సఙ్ఖతోతి? న హేవం వత్తబ్బే…పే… తేన హి ఆకాసో అసఙ్ఖతోతి.

ఆకాసకథా నిట్ఠితా.