(౫౬) ౪. ఆరుప్పకథా

౪౫౫. ఆకాసానఞ్చాయతనం అసఙ్ఖతన్తి? ఆమన్తా. నిబ్బానం తాణం లేణం సరణం పరాయనం అచ్చుతం అమతన్తి? న హేవం వత్తబ్బే…పే… ఆకాసానఞ్చాయతనం అసఙ్ఖతం, నిబ్బానం అసఙ్ఖతన్తి? ఆమన్తా. ద్వే అసఙ్ఖతానీతి? న హేవం వత్తబ్బే…పే… ద్వే అసఙ్ఖతానీతి? ఆమన్తా. ద్వే తాణాని…పే… అన్తరికా వాతి? న హేవం వత్తబ్బే…పే….

ఆకాసానఞ్చాయతనం అసఙ్ఖతన్తి? ఆమన్తా. ఆకాసానఞ్చాయతనం భవో గతి సత్తావాసో సంసారో యోని విఞ్ఞాణట్ఠితి అత్తభావపటిలాభోతి? ఆమన్తా. అసఙ్ఖతం భవో గతి సత్తావాసో సంసారో యోని విఞ్ఞాణట్ఠితి అత్తభావపటిలాభోతి? న హేవం వత్తబ్బే…పే….

అత్థి ఆకాసానఞ్చాయతనూపగం కమ్మన్తి? ఆమన్తా. అత్థి అసఙ్ఖతూపగం కమ్మన్తి? న హేవం వత్తబ్బే…పే… అత్థి ఆకాసానఞ్చాయతనూపగా సత్తాతి? ఆమన్తా. అత్థి అసఙ్ఖతూపగా సత్తాతి? న హేవం వత్తబ్బే…పే….

ఆకాసానఞ్చాయతనే సత్తా జాయన్తి జీయన్తి మీయన్తి చవన్తి ఉపపజ్జన్తీతి? ఆమన్తా. అసఙ్ఖతే సత్తా జాయన్తి జీయన్తి మీయన్తి చవన్తి ఉపపజ్జన్తీతి? న హేవం వత్తబ్బే…పే… ఆకాసానఞ్చాయతనే అత్థి వేదనా సఞ్ఞా సఙ్ఖారా విఞ్ఞాణన్తి? ఆమన్తా. అసఙ్ఖతే అత్థి వేదనా సఞ్ఞా సఙ్ఖారా విఞ్ఞాణన్తి? న హేవం వత్తబ్బే…పే… ఆకాసానఞ్చాయతనం చతువోకారభవోతి? ఆమన్తా. అసఙ్ఖతం చతువోకారభవోతి? న హేవం వత్తబ్బే…పే….

౪౫౬. న వత్తబ్బం – ‘‘చత్తారో ఆరుప్పా అసఙ్ఖతా’’తి? ఆమన్తా. నను చత్తారో ఆరుప్పా అనేజా వుత్తా భగవతాతి? ఆమన్తా. హఞ్చి చత్తారో ఆరుప్పా అనేజా వుత్తా భగవతా, తేన వత రే వత్తబ్బే ‘‘చత్తారో ఆరుప్పా అసఙ్ఖతా’’తి.

ఆరుప్పకథా నిట్ఠితా.