(౫౫) ౩. సచ్చకథా

౪౫౨. చత్తారి సచ్చాని అసఙ్ఖతానీతి? ఆమన్తా. చత్తారి తాణాని చత్తారి లేణాని చత్తారి సరణాని చత్తారి పరాయనాని చత్తారి అచ్చుతాని చత్తారి అమతాని చత్తారి నిబ్బానానీతి? న హేవం వత్తబ్బే…పే… చత్తారి నిబ్బానానీతి? ఆమన్తా. అత్థి చతున్నం నిబ్బానానం ఉచ్చనీచతా హీనపణీతతా ఉక్కంసావకంసో సీమా వా భేదో వా రాజి వా అన్తరికా వాతి? న హేవం వత్తబ్బే…పే….

దుక్ఖసచ్చం అసఙ్ఖతన్తి? ఆమన్తా. దుక్ఖం అసఙ్ఖతన్తి? న హేవం వత్తబ్బే…పే… దుక్ఖసచ్చం అసఙ్ఖతన్తి? ఆమన్తా. కాయికం దుక్ఖం చేతసికం దుక్ఖం సోకపరిదేవదుక్ఖదోమనస్సఉపాయాసా అసఙ్ఖతాతి? న హేవం వత్తబ్బే…పే… సముదయసచ్చం అసఙ్ఖతన్తి? ఆమన్తా. సముదయో అసఙ్ఖతోతి? న హేవం వత్తబ్బే…పే… సముదయసచ్చం అసఙ్ఖతన్తి? ఆమన్తా. కామతణ్హా భవతణ్హా విభవతణ్హా అసఙ్ఖతాతి? న హేవం వత్తబ్బే…పే… మగ్గసచ్చం అసఙ్ఖతన్తి? ఆమన్తా. మగ్గో అసఙ్ఖతోతి? న హేవం వత్తబ్బే…పే… మగ్గసచ్చం అసఙ్ఖతన్తి? ఆమన్తా. సమ్మాదిట్ఠి…పే… సమ్మాసమాధి అసఙ్ఖతోతి? న హేవం వత్తబ్బే…పే….

దుక్ఖం సఙ్ఖతన్తి? ఆమన్తా. దుక్ఖసచ్చం సఙ్ఖతన్తి? న హేవం వత్తబ్బే…పే… కాయికం దుక్ఖం చేతసికం దుక్ఖం సోకపరిదేవదుక్ఖదోమనస్సఉపాయాసా సఙ్ఖతాతి? ఆమన్తా. దుక్ఖసచ్చం సఙ్ఖతన్తి? న హేవం వత్తబ్బే…పే… సముదయో సఙ్ఖతోతి? ఆమన్తా. సముదయసచ్చం సఙ్ఖతన్తి? న హేవం వత్తబ్బే…పే… కామతణ్హా భవతణ్హా విభవతణ్హా సఙ్ఖతాతి? ఆమన్తా. సముదయసచ్చం సఙ్ఖతన్తి? న హేవం వత్తబ్బే…పే… మగ్గో సఙ్ఖతోతి? ఆమన్తా. మగ్గసచ్చం సఙ్ఖతన్తి? న హేవం వత్తబ్బే…పే… సమ్మాదిట్ఠి…పే… సమ్మాసమాధి సఙ్ఖతోతి? ఆమన్తా. మగ్గసచ్చం సఙ్ఖతన్తి? న హేవం వత్తబ్బే…పే….

౪౫౩. నిరోధసచ్చం అసఙ్ఖతం, నిరోధో అసఙ్ఖతోతి? ఆమన్తా. దుక్ఖసచ్చం అసఙ్ఖతం, దుక్ఖం అసఙ్ఖతన్తి? న హేవం వత్తబ్బే…పే… నిరోధసచ్చం అసఙ్ఖతం, నిరోధో అసఙ్ఖతోతి? ఆమన్తా. సముదయసచ్చం అసఙ్ఖతం, సముదయో అసఙ్ఖతోతి? న హేవం వత్తబ్బే…పే… నిరోధసచ్చం అసఙ్ఖతం, నిరోధో అసఙ్ఖతోతి? ఆమన్తా. మగ్గసచ్చం అసఙ్ఖతం, మగ్గో అసఙ్ఖతోతి? న హేవం వత్తబ్బే…పే….

దుక్ఖసచ్చం అసఙ్ఖతం, దుక్ఖం సఙ్ఖతన్తి? ఆమన్తా. నిరోధసచ్చం అసఙ్ఖతం, నిరోధో సఙ్ఖతోతి? న హేవం వత్తబ్బే…పే… సముదయసచ్చం అసఙ్ఖతం, సముదయో సఙ్ఖతోతి? ఆమన్తా. నిరోధసచ్చం అసఙ్ఖతం, నిరోధో సఙ్ఖతోతి? న హేవం వత్తబ్బే…పే… మగ్గసచ్చం అసఙ్ఖతం, మగ్గో సఙ్ఖతోతి? ఆమన్తా. నిరోధసచ్చం అసఙ్ఖతం, నిరోధో సఙ్ఖతోతి? న హేవం వత్తబ్బే…పే….

౪౫౪. న వత్తబ్బం – ‘‘చత్తారి సచ్చాని అసఙ్ఖతానీ’’తి? ఆమన్తా. నను వుత్తం భగవతా – ‘‘చత్తారిమాని, భిక్ఖవే, తథాని అవితథాని అనఞ్ఞథాని! కతమాని చత్తారి? ‘ఇదం దుక్ఖ’న్తి, భిక్ఖవే, తథమేతం అవితథమేతం అనఞ్ఞథమేతం…పే… ‘అయం దుక్ఖసముదయో’తి…పే… ‘అయం దుక్ఖనిరోధో’తి…పే… ‘అయం దుక్ఖనిరోధగామినీ పటిపదా’తి తథమేతం అవితథమేతం అనఞ్ఞథమేతం. ఇమాని ఖో, భిక్ఖవే, చత్తారి తథాని అవితథాని అనఞ్ఞథానీ’’తి [సం. ని. ౫.౧౦౯౦]. అత్థేవ సుత్తన్తోతి? ఆమన్తా. తేన హి చత్తారి సచ్చాని అసఙ్ఖతానీతి.

సచ్చకథా నిట్ఠితా.