(౨౧) ౧. బలకథా

౩౫౪. తథాగతబలం సావకసాధారణన్తి? ఆమన్తా. తథాగతబలం సావకబలం, సావకబలం తథాగతబలన్తి? న హేవం వత్తబ్బే…పే….

తథాగతబలం సావకసాధారణన్తి? ఆమన్తా. తఞ్ఞేవ తథాగతబలం తం సావకబలం, తఞ్ఞేవ సావకబలం తం తథాగతబలన్తి? న హేవం వత్తబ్బే…పే….

తథాగతబలం సావకసాధారణన్తి? ఆమన్తా. యాదిసం తథాగతబలం తాదిసం సావకబలం, యాదిసం సావకబలం తాదిసం తథాగతబలన్తి? న హేవం వత్తబ్బే…పే….

తథాగతబలం సావకసాధారణన్తి? ఆమన్తా. యాదిసో తథాగతస్స పుబ్బయోగో పుబ్బచరియా ధమ్మక్ఖానం ధమ్మదేసనా తాదిసో సావకస్స పుబ్బయోగో పుబ్బచరియా ధమ్మక్ఖానం ధమ్మదేసనాతి? న హేవం వత్తబ్బే…పే….

తథాగతబలం సావకసాధారణన్తి? ఆమన్తా. తథాగతో జినో సత్థా సమ్మాసమ్బుద్ధో సబ్బఞ్ఞూ సబ్బదస్సావీ ధమ్మస్సామీ ధమ్మప్పటిసరణోతి? ఆమన్తా. సావకో జినో సత్థా సమ్మాసమ్బుద్ధో సబ్బఞ్ఞూ సబ్బదస్సావీ ధమ్మస్సామీ ధమ్మప్పటిసరణోతి? న హేవం వత్తబ్బే…పే….

తథాగతబలం సావకసాధారణన్తి? ఆమన్తా. తథాగతో అనుప్పన్నస్స మగ్గస్స ఉప్పాదేతా అసఞ్జాతస్స మగ్గస్స సఞ్జనేతా అనక్ఖాతస్స మగ్గస్స అక్ఖాతా మగ్గఞ్ఞూ మగ్గవిదూ మగ్గకోవిదోతి? ఆమన్తా. సావకో అనుప్పన్నస్స మగ్గస్స ఉప్పాదేతా అసఞ్జాతస్స మగ్గస్స సఞ్జనేతా అనక్ఖాతస్స మగ్గస్స అక్ఖాతా మగ్గఞ్ఞూ మగ్గవిదూ మగ్గకోవిదోతి? న హేవం వత్తబ్బే…పే….

ఇన్ద్రియపరోపరియత్తం యథాభూతం ఞాణం తథాగతబలం సావకసాధారణన్తి? ఆమన్తా. సావకో సబ్బఞ్ఞూ సబ్బదస్సావీతి? న హేవం వత్తబ్బే…పే….

౩౫౫. సావకో ఠానాఠానం జానాతీతి? ఆమన్తా. హఞ్చి సావకో ఠానాఠానం జానాతి, తేన వత రే వత్తబ్బే – ‘‘ఠానాఠానం యథాభూతం ఞాణం తథాగతబలం సావకసాధారణ’’న్తి.

సావకో అతీతానాగతపచ్చుప్పన్నానం కమ్మసమాదానానం ఠానసో హేతుసో విపాకం జానాతీతి? ఆమన్తా. హఞ్చి సావకో అతీతానాగతపచ్చుప్పన్నానం కమ్మసమాదానానం ఠానసో హేతుసో విపాకం జానాతి, తేన వత రే వత్తబ్బే – ‘‘అతీతానాగతపచ్చుప్పన్నానం కమ్మసమాదానానం ఠానసో హేతుసో విపాకం యథాభూతం ఞాణం తథాగతబలం సావకసాధారణ’’న్తి.

సావకో సబ్బత్థగామినిం పటిపదం జానాతీతి? ఆమన్తా. హఞ్చి సావకో సబ్బత్థగామినిం పటిపదం జానాతి, తేన వత రే వత్తబ్బే – ‘‘సబ్బత్థగామినిం పటిపదం యథాభూతం ఞాణం తథాగతబలం సావకసాధారణ’’న్తి.

సావకో అనేకధాతుం నానాధాతుం లోకం జానాతీతి? ఆమన్తా. హఞ్చి సావకో అనేకధాతుం నానాధాతుం లోకం జానాతి, తేన వత రే వత్తబ్బే – ‘‘అనేకధాతుం నానాధాతుం లోకం యథాభూతం ఞాణం తథాగతబలం సావకసాధారణ’’న్తి.

సావకో సత్తానం నానాధిముత్తికతం జానాతీతి? ఆమన్తా. హఞ్చి సావకో సత్తానం నానాధిముత్తికతం జానాతి, తేన వత రే వత్తబ్బే – ‘‘సత్తానం నానాధిముత్తికతం యథాభూతం ఞాణం తథాగతబలం సావకసాధారణ’’న్తి.

సావకో ఝానవిమోక్ఖసమాధిసమాపత్తీనం సంకిలేసం వోదానం వుట్ఠానం జానాతీతి? ఆమన్తా. హఞ్చి సావకో ఝానవిమోక్ఖసమాధిసమాపత్తీనం సంకిలేసం వోదానం వుట్ఠానం జానాతి, తేన వత రే వత్తబ్బే – ‘‘ఝానవిమోక్ఖసమాధిసమాపత్తీనం సంకిలేసం వోదానం వుట్ఠానం యథాభూతం ఞాణం తథాగతబలం సావకసాధారణ’’న్తి.

సావకో పుబ్బేనివాసానుస్సతిం జానాతీతి? ఆమన్తా. హఞ్చి సావకో పుబ్బేనివాసానుస్సతిం జానాతి, తేన వత రే వత్తబ్బే – ‘‘పుబ్బేనివాసానుస్సతి యథాభూతం ఞాణం తథాగతబలం సావకసాధారణ’’న్తి.

సావకో సత్తానం చుతూపపాతం జానాతీతి? ఆమన్తా. హఞ్చి సావకో సత్తానం చుతూపపాతం జానాతి, తేన వత రే వత్తబ్బే – ‘‘సత్తానం చుతూపపాతం యథాభూతం ఞాణం తథాగతబలం సావకసాధారణ’’న్తి.

నను తథాగతస్సాపి ఆసవా ఖీణా సావకస్సాపి ఆసవా ఖీణాతి? ఆమన్తా. అత్థి కిఞ్చి నానాకరణం తథాగతస్స వా సావకస్స వా ఆసవక్ఖయేన వా ఆసవక్ఖయం విముత్తియా వా విముత్తీతి? నత్థి. హఞ్చి నత్థి కిఞ్చి నానాకరణం తథాగతస్స వా సావకస్స వా ఆసవక్ఖయేన వా ఆసవక్ఖయం విముత్తియా వా విముత్తి, తేన వత రే వత్తబ్బే – ‘‘ఆసవానం ఖయే యథాభూతం ఞాణం తథాగతబలం సావకసాధారణ’’న్తి.

౩౫౬. ఆసవానం ఖయే యథాభూతం ఞాణం తథాగతబలం సావకసాధారణన్తి? ఆమన్తా. ఠానాఠానే యథాభూతం ఞాణం తథాగతబలం సావకసాధారణన్తి? న హేవం వత్తబ్బే…పే….

ఆసవానం ఖయే యథాభూతం ఞాణం తథాగతబలం సావకసాధారణన్తి? ఆమన్తా. సత్తానం చుతూపపాతే యథాభూతం ఞాణం తథాగతబలం సావకసాధారణన్తి? న హేవం వత్తబ్బే…పే….

ఠానాఠానే యథాభూతం ఞాణం తథాగతబలం సావకఅసాధారణన్తి? ఆమన్తా. ఆసవానం ఖయే యథాభూతం ఞాణం తథాగతబలం సావకఅసాధారణన్తి? న హేవం వత్తబ్బే…పే….

సత్తానం చుతూపపాతే యథాభూతం ఞాణం తథాగతబలం సావకఅసాధారణన్తి? ఆమన్తా. ఆసవానం ఖయే యథాభూతం ఞాణం తథాగతబలం సావకఅసాధారణన్తి? న హేవం వత్తబ్బే…పే….

ఇన్ద్రియపరోపరియత్తం యథాభూతం ఞాణం తథాగతబలం సావకఅసాధారణన్తి? ఆమన్తా. ఠానాఠానే యథాభూతం ఞాణం తథాగతబలం సావకఅసాధారణన్తి? న హేవం వత్తబ్బే [అయమేత్థ సాధారణపక్ఖం సన్ధాయ పటిక్ఖేపో (టీకా ఓలోకేతబ్బా)] …పే….

ఇన్ద్రియపరోపరియత్తం యథాభూతం ఞాణం తథాగతబలం సావకఅసాధారణన్తి? ఆమన్తా…పే…. ఆసవానం ఖయే యథాభూతం ఞాణం తథాగతబలం సావకఅసాధారణన్తి? న హేవం వత్తబ్బే…పే….

ఠానాఠానే యథాభూతం ఞాణం తథాగతబలం సావకసాధారణన్తి? ఆమన్తా. ఇన్ద్రియపరోపరియత్తం యథాభూతం ఞాణం తథాగతబలం సావకసాధారణన్తి? న హేవం వత్తబ్బే…పే….

ఆసవానం ఖయే యథాభూతం ఞాణం తథాగతబలం సావకసాధారణన్తి? ఆమన్తా. ఇన్ద్రియపరోపరియత్తం యథాభూతం ఞాణం తథాగతబలం సావకసాధారణన్తి? న హేవం వత్తబ్బే…పే….

బలకథా నిట్ఠితా.