౨౦. సఙ్ఘానుయోగో

౨౦౬. న వత్తబ్బం – ‘‘పుగ్గలో ఉపలబ్భతి సచ్చికట్ఠపరమత్థేనా’’తి? ఆమన్తా. నను చత్తారో పురిసయుగా అట్ఠ పురిసపుగ్గలా అత్థీతి? ఆమన్తా. హఞ్చి చత్తారో పురిసయుగా అట్ఠ పురిసపుగ్గలా అత్థి, తేన వత రే వత్తబ్బే – ‘‘పుగ్గలో ఉపలబ్భతి సచ్చికట్ఠపరమత్థేనా’’తి.

౨౦౭. చత్తారో పురిసయుగా అట్ఠ పురిసపుగ్గలా అత్థీతి కత్వా తేన చ కారణేన పుగ్గలో ఉపలబ్భతి సచ్చికట్ఠపరమత్థేనాతి? ఆమన్తా. చత్తారో పురిసయుగా అట్ఠ పురిసపుగ్గలా బుద్ధపాతుభావా పాతుభవన్తీతి? ఆమన్తా. పుగ్గలో బుద్ధపాతుభావా పాతుభవతీతి? న హేవం వత్తబ్బే…పే….

పుగ్గలో బుద్ధపాతుభావా పాతుభవతీతి? ఆమన్తా. బుద్ధస్స భగవతో పరినిబ్బుతే ఉచ్ఛిన్నో పుగ్గలో, నత్థి పుగ్గలోతి? న హేవం వత్తబ్బే…పే….

సఙ్ఘానుయోగో.