౧౯. పటివేధానుయోగో

౨౦౧. న వత్తబ్బం – ‘‘పుగ్గలో ఉపలబ్భతి సచ్చికట్ఠపరమత్థేనా’’తి? ఆమన్తా. నను సోతాపన్నో అత్థీతి? ఆమన్తా. హఞ్చి సోతాపన్నో అత్థి, తేన వత రే వత్తబ్బే – ‘‘పుగ్గలో ఉపలబ్భతి సచ్చికట్ఠపరమత్థేనా’’తి.

౨౦౨. న వత్తబ్బం – ‘‘పుగ్గలో ఉపలబ్భతి సచ్చికట్ఠపరమత్థేనా’’తి? ఆమన్తా. నను సకదాగామీ అత్థి…పే… అనాగామీ అత్థి… అరహా అత్థి… ఉభతోభాగవిముత్తో అత్థి… పఞ్ఞావిముత్తో అత్థి… కాయసక్ఖి [కాయసక్ఖీ (స్యా.)] అత్థి… దిట్ఠిప్పత్తో అత్థి… సద్ధావిముత్తో అత్థి… ధమ్మానుసారీ అత్థి… సద్ధానుసారీ అత్థీతి? ఆమన్తా.

హఞ్చి సద్ధానుసారీ అత్థి, తేన వత రే వత్తబ్బే – ‘‘పుగ్గలో ఉపలబ్భతి సచ్చికట్ఠపరమత్థేనా’’తి.

౨౦౩. సోతాపన్నో అత్థీతి కత్వా తేన చ కారణేన పుగ్గలో ఉపలబ్భతి సచ్చికట్ఠపరమత్థేనాతి? ఆమన్తా. అత్థి కోచి న సోతాపన్నో హుత్వా సోతాపన్నో హోతీతి? ఆమన్తా. అత్థి కోచి న పుగ్గలో హుత్వా పుగ్గలో హోతీతి? న హేవం వత్తబ్బే…పే….

౨౦౪. అత్థి కోచి న సకదాగామీ హుత్వా… న అనాగామీ హుత్వా… న అరహా హుత్వా… న ఉభతోభాగవిముత్తో హుత్వా… న పఞ్ఞావిముత్తో హుత్వా… న కాయసక్ఖి హుత్వా… న దిట్ఠిప్పత్తో హుత్వా… న సద్ధావిముత్తో హుత్వా… న ధమ్మానుసారీ హుత్వా… న సద్ధానుసారీ హుత్వా సద్ధానుసారీ హోతీతి? ఆమన్తా. అత్థి కోచి న పుగ్గలో హుత్వా పుగ్గలో హోతీతి? న హేవం వత్తబ్బే…పే….

౨౦౫. సోతాపన్నో అత్థీతి కత్వా తేన చ కారణేన పుగ్గలో ఉపలబ్భతి సచ్చికట్ఠపరమత్థేనాతి? ఆమన్తా. అత్థి కోచి సోతాపన్నో హుత్వా న సోతాపన్నో హోతీతి? ఆమన్తా. అత్థి కోచి పుగ్గలో హుత్వా న పుగ్గలో హోతీతి? న హేవం వత్తబ్బే…పే….

అత్థి కోచి సకదాగామీ హుత్వా… అనాగామీ హుత్వా న అనాగామీ హోతీతి? ఆమన్తా. అత్థి కోచి పుగ్గలో హుత్వా న పుగ్గలో హోతీతి? న హేవం వత్తబ్బే…పే….

పటివేధానుయోగో.