౧౦. పఞ్ఞత్తానుయోగో

౬౧. రూపధాతుయా రూపీ పుగ్గలోతి? ఆమన్తా. కామధాతుయా కామీ పుగ్గలోతి? న హేవం వత్తబ్బే…పే….

౬౨. రూపధాతుయా రూపినో సత్తాతి? ఆమన్తా. కామధాతుయా కామినో సత్తాతి? న హేవం వత్తబ్బే…పే….

౬౩. అరూపధాతుయా అరూపీ పుగ్గలోతి? ఆమన్తా. కామధాతుయా కామీ పుగ్గలోతి? న హేవం వత్తబ్బే…పే….

౬౪. అరూపధాతుయా అరూపినో సత్తాతి? ఆమన్తా. కామధాతుయా కామినో సత్తాతి? న హేవం వత్తబ్బే…పే….

౬౫. రూపధాతుయా రూపీ పుగ్గలో అరూపధాతుయా అరూపీ పుగ్గలో, అత్థి చ కోచి రూపధాతుయా చుతో అరూపధాతుం ఉపపజ్జతీతి? ఆమన్తా. రూపీ పుగ్గలో ఉపచ్ఛిన్నో, అరూపీ పుగ్గలో జాతోతి? న హేవం వత్తబ్బే…పే….

౬౬. రూపధాతుయా రూపినో సత్తా అరూపధాతుయా అరూపినో సత్తా, అత్థి చ కోచి రూపధాతుయా చుతో అరూపధాతుం ఉపపజ్జతీతి? ఆమన్తా. రూపీ సత్తో ఉపచ్ఛిన్నో, అరూపీ సత్తో జాతోతి? న హేవం వత్తబ్బే…పే….

౬౭. కాయోతి వా సరీరన్తి వా, సరీరన్తి వా కాయోతి వా, కాయం అప్పియం కరిత్వా ఏసేసే ఏకట్ఠే సమే సమభాగే తజ్జాతేతి? ఆమన్తా. పుగ్గలోతి వా జీవోతి వా, జీవోతి వా పుగ్గలోతి వా, పుగ్గలం అప్పియం కరిత్వా ఏసేసే ఏకట్ఠే సమే సమభాగే తజ్జాతేతి? ఆమన్తా. అఞ్ఞో కాయో, అఞ్ఞో పుగ్గలోతి? ఆమన్తా. అఞ్ఞం జీవం, అఞ్ఞం సరీరన్తి? న హేవం వత్తబ్బే.

ఆజానాహి నిగ్గహం. హఞ్చి కాయోతి వా సరీరన్తి వా, సరీరన్తి వా కాయోతి వా, కాయం అప్పియం కరిత్వా ఏసేసే ఏకట్ఠే సమే సమభాగే తజ్జాతే, పుగ్గలోతి వా జీవోతి వా, జీవోతి వా పుగ్గలోతి వా, పుగ్గలం అప్పియం కరిత్వా ఏసేసే ఏకట్ఠే సమే సమభాగే తజ్జాతే, అఞ్ఞో కాయో అఞ్ఞో పుగ్గలో; తేన వత రే వత్తబ్బే – ‘‘అఞ్ఞం జీవం అఞ్ఞం సరీర’’న్తి. యం తత్థ వదేసి – ‘‘వత్తబ్బే ఖో – ‘కాయోతి వా సరీరన్తి వా, సరీరన్తి వా కాయోతి వా, కాయం అప్పియం కరిత్వా ఏసేసే ఏకట్ఠే సమే సమభాగే తజ్జాతే, పుగ్గలోతి వా జీవోతి వా, జీవోతి వా పుగ్గలోతి వా, పుగ్గలం అప్పియం కరిత్వా ఏసేసే ఏకట్ఠే సమే సమభాగే తజ్జాతే, అఞ్ఞో కాయో అఞ్ఞో పుగ్గలో,’ నో చ వత్తబ్బే – ‘అఞ్ఞం జీవం అఞ్ఞం సరీర’’’న్తి మిచ్ఛా.

నో చే పన వత్తబ్బే – ‘‘అఞ్ఞం జీవం అఞ్ఞం సరీర’’న్తి, నో చ వత రే వత్తబ్బే – ‘‘కాయోతి వా సరీరన్తి వా, సరీరన్తి వా కాయోతి వా, కాయం అప్పియం కరిత్వా ఏసేసే ఏకట్ఠే సమే సమభాగే తజ్జాతే, పుగ్గలోతి వా జీవోతి వా, జీవోతి వా పుగ్గలోతి వా, పుగ్గలం అప్పియం కరిత్వా ఏసేసే ఏకట్ఠే సమే సమభాగే తజ్జాతే, అఞ్ఞో కాయో అఞ్ఞో పుగ్గలో’’తి. యం తత్థ వదేసి – ‘‘వత్తబ్బే ఖో – ‘కాయోతి వా సరీరన్తి వా, సరీరన్తి వా కాయోతి వా, కాయం అప్పియం కరిత్వా ఏసేసే ఏకట్ఠే సమే సమభాగే తజ్జాతే, పుగ్గలోతి వా జీవోతి వా, జీవోతి వా పుగ్గలోతి వా, పుగ్గలం అప్పియం కరిత్వా ఏసేసే ఏకట్ఠే సమే సమభాగే తజ్జాతే, అఞ్ఞో కాయో అఞ్ఞో పుగ్గలో’, నో చ వత్తబ్బే – ‘అఞ్ఞం జీవం అఞ్ఞం సరీర’’’న్తి మిచ్ఛా…పే….

౬౮. కాయోతి వా సరీరన్తి వా, సరీరన్తి వా కాయోతి వా, కాయం అప్పియం కరిత్వా ఏసేసే ఏకట్ఠే సమే సమభాగే తజ్జాతేతి? ఆమన్తా. వుత్తం భగవతా – ‘‘అత్థి పుగ్గలో అత్తహితాయ పటిపన్నో’’తి? ఆమన్తా. అఞ్ఞో కాయో అఞ్ఞో పుగ్గలోతి? న హేవం వత్తబ్బే.

ఆజానాహి పటికమ్మం. హఞ్చి కాయోతి వా సరీరన్తి వా, సరీరన్తి వా కాయోతి వా, కాయం అప్పియం కరిత్వా ఏసేసే ఏకట్ఠే సమే సమభాగే తజ్జాతే, వుత్తం భగవతా – ‘‘అత్థి పుగ్గలో అత్తహితాయ పటిపన్నో,’’ తేన వత రే వత్తబ్బే – ‘‘అఞ్ఞో కాయో అఞ్ఞో పుగ్గలో’’తి. యం తత్థ వదేసి – ‘‘వత్తబ్బే ఖో – ‘కాయోతి వా సరీరన్తి వా, సరీరన్తి వా కాయోతి వా, కాయం అప్పియం కరిత్వా ఏసేసే ఏకట్ఠే సమే సమభాగే తజ్జాతే, వుత్తం భగవతా – అత్థి పుగ్గలో అత్తహితాయ పటిపన్నో,’ నో చ వత్తబ్బే – ‘అఞ్ఞో కాయో అఞ్ఞో పుగ్గలో’’’తి మిచ్ఛా.

నో చే పన వత్తబ్బే – ‘‘అఞ్ఞో కాయో అఞ్ఞో పుగ్గలో’’తి, నో చ వత రే వత్తబ్బే – ‘‘కాయోతి వా సరీరన్తి వా, సరీరన్తి వా కాయోతి వా, కాయం అప్పియం కరిత్వా ఏసేసే ఏకట్ఠే సమే సమభాగే తజ్జాతే, వుత్తం భగవతా – ‘అత్థి పుగ్గలో అత్తహితాయ పటిపన్నో’’’తి. యం తత్థ వదేసి – ‘‘వత్తబ్బే ఖో – ‘కాయోతి వా సరీరన్తి వా, సరీరన్తి వా కాయోతి వా, కాయం అప్పియం కరిత్వా ఏసేసే ఏకట్ఠే సమే సమభాగే తజ్జాతే, వుత్తం భగవతా – అత్థి పుగ్గలో అత్తహితాయ పటిపన్నో,’ నో చ వత్తబ్బే – ‘అఞ్ఞో కాయో అఞ్ఞో పుగ్గలో’’’తి మిచ్ఛా. (సంఖిత్తం)

పఞ్ఞత్తానుయోగో.