౯. వచనసోధనం

౫౫. పుగ్గలో ఉపలబ్భతి, ఉపలబ్భతి పుగ్గలోతి? పుగ్గలో ఉపలబ్భతి, ఉపలబ్భతి కేహిచి పుగ్గలో కేహిచి న పుగ్గలోతి. పుగ్గలో కేహిచి ఉపలబ్భతి కేహిచి న ఉపలబ్భతీతి? న హేవం వత్తబ్బే…పే….

౫౬. పుగ్గలో సచ్చికట్ఠో, సచ్చికట్ఠో పుగ్గలోతి? పుగ్గలో సచ్చికట్ఠో, సచ్చికట్ఠో కేహిచి పుగ్గలో కేహిచి న పుగ్గలోతి. పుగ్గలో కేహిచి సచ్చికట్ఠో కేహిచి న సచ్చికట్ఠోతి? న హేవం వత్తబ్బే…పే….

౫౭. పుగ్గలో విజ్జమానో, విజ్జమానో పుగ్గలోతి? పుగ్గలో విజ్జమానో, విజ్జమానో కేహిచి పుగ్గలో కేహిచి న పుగ్గలోతి. పుగ్గలో కేహిచి విజ్జమానో కేహిచి న విజ్జమానోతి? న హేవం వత్తబ్బే…పే….

౫౮. పుగ్గలో సంవిజ్జమానో, సంవిజ్జమానో పుగ్గలోతి? పుగ్గలో సంవిజ్జమానో, సంవిజ్జమానో కేహిచి పుగ్గలో కేహిచి న పుగ్గలోతి. పుగ్గలో కేహిచి సంవిజ్జమానో కేహిచి న సంవిజ్జమానోతి? న హేవం వత్తబ్బే…పే….

౫౯. పుగ్గలో అత్థి, అత్థి పుగ్గలోతి? పుగ్గలో అత్థి, అత్థి కేహిచి పుగ్గలో కేహిచి న పుగ్గలోతి. పుగ్గలో కేహిచి అత్థి కేహిచి నత్థీతి? న హేవం వత్తబ్బే…పే….

౬౦. పుగ్గలో అత్థి, అత్థి న సబ్బో పుగ్గలోతి? ఆమన్తా…పే… పుగ్గలో నత్థి, నత్థి న సబ్బో పుగ్గలోతి? న హేవం వత్తబ్బే. (సంఖిత్తం)

వచనసోధనం.