౩. అసఙ్గహితేనసఙ్గహితపదనిద్దేసో

౧౭౯. వేదనాక్ఖన్ధేన యే ధమ్మా… సఞ్ఞాక్ఖన్ధేన యే ధమ్మా… సఙ్ఖారక్ఖన్ధేన యే ధమ్మా… సముదయసచ్చేన యే ధమ్మా… మగ్గసచ్చేన యే ధమ్మా ఖన్ధసఙ్గహేన అసఙ్గహితా ఆయతనసఙ్గహేన సఙ్గహితా ధాతుసఙ్గహేన సఙ్గహితా, తే ధమ్మా కతిహి ఖన్ధేహి కతిహాయతనేహి కతిహి ధాతూహి సఙ్గహితా? తే ధమ్మా అసఙ్ఖతం ఖన్ధతో ఠపేత్వా తీహి ఖన్ధేహి ఏకేనాయతనేన ఏకాయ ధాతుయా సఙ్గహితా.

౧౮౦. నిరోధసచ్చేన యే ధమ్మా ఖన్ధసఙ్గహేన అసఙ్గహితా ఆయతనసఙ్గహేన సఙ్గహితా ధాతుసఙ్గహేన సఙ్గహితా…పే… తే ధమ్మా చతూహి ఖన్ధేహి ఏకేనాయతనేన ఏకాయ ధాతుయా సఙ్గహితా.

౧౮౧. జీవితిన్ద్రియేన యే ధమ్మా ఖన్ధసఙ్గహేన అసఙ్గహితా ఆయతనసఙ్గహేన సఙ్గహితా ధాతుసఙ్గహేన సఙ్గహితా…పే… తే ధమ్మా అసఙ్ఖతం ఖన్ధతో ఠపేత్వా ద్వీహి ఖన్ధేహి ఏకేనాయతనేన ఏకాయ ధాతుయా సఙ్గహితా.

౧౮౨. ఇత్థిన్ద్రియేన యే ధమ్మా… పురిసిన్ద్రియేన యే ధమ్మా… సుఖిన్ద్రియేన యే ధమ్మా… దుక్ఖిన్ద్రియేన యే ధమ్మా… సోమనస్సిన్ద్రియేన యే ధమ్మా… దోమనస్సిన్ద్రియేన యే ధమ్మా… ఉపేక్ఖిన్ద్రియేన యే ధమ్మా… సద్ధిన్ద్రియేన యే ధమ్మా… వీరియిన్ద్రియేన యే ధమ్మా… సతిన్ద్రియేన యే ధమ్మా… సమాధిన్ద్రియేన యే ధమ్మా… పఞ్ఞిన్ద్రియేన యే ధమ్మా… అనఞ్ఞాతఞ్ఞస్సామీతిన్ద్రియేన యే ధమ్మా… అఞ్ఞిన్ద్రియేన యే ధమ్మా… అఞ్ఞాతావిన్ద్రియేన యే ధమ్మా… అవిజ్జాయ యే ధమ్మా… అవిజ్జాపచ్చయా సఙ్ఖారేన యే ధమ్మా… సళాయతనపచ్చయా ఫస్సేన యే ధమ్మా… ఫస్సపచ్చయా వేదనాయ యే ధమ్మా… వేదనాపచ్చయా తణ్హాయ యే ధమ్మా… తణ్హాపచ్చయా ఉపాదానేన యే ధమ్మా… కమ్మభవేన [ఉపాదానపచ్చయా కమ్మభవేన (స్యా.)] యే ధమ్మా ఖన్ధసఙ్గహేన అసఙ్గహితా ఆయతనసఙ్గహేన సఙ్గహితా ధాతుసఙ్గహేన సఙ్గహితా…పే… తే ధమ్మా అసఙ్ఖతం ఖన్ధతో ఠపేత్వా తీహి ఖన్ధేహి ఏకేనాయతనేన ఏకాయ ధాతుయా సఙ్గహితా.

౧౮౩. జాతియా యే ధమ్మా… జరాయ యే ధమ్మా… మరణేన యే ధమ్మా… ఝానేన యే ధమ్మా ఖన్ధసఙ్గహేన అసఙ్గహితా ఆయతనసఙ్గహేన సఙ్గహితా ధాతుసఙ్గహేన సఙ్గహితా…పే… తే ధమ్మా అసఙ్ఖతం ఖన్ధతో ఠపేత్వా ద్వీహి ఖన్ధేహి ఏకేనాయతనేన ఏకాయ ధాతుయా సఙ్గహితా.

౧౮౪. సోకేన యే ధమ్మా… దుక్ఖేన యే ధమ్మా… దోమనస్సేన యే ధమ్మా… ఉపాయాసేన యే ధమ్మా… సతిపట్ఠానేన యే ధమ్మా… సమ్మప్పధానేన యే ధమ్మా… అప్పమఞ్ఞాయ యే ధమ్మా… పఞ్చహి ఇన్ద్రియేహి యే ధమ్మా… పఞ్చహి బలేహి యే ధమ్మా… సత్తహి బోజ్ఝఙ్గేహి యే ధమ్మా… అరియేన అట్ఠఙ్గికేన మగ్గేన యే ధమ్మా… ఫస్సేన యే ధమ్మా… వేదనాయ యే ధమ్మా… సఞ్ఞాయ యే ధమ్మా… చేతనాయ యే ధమ్మా… అధిమోక్ఖేన యే ధమ్మా… మనసికారేన యే ధమ్మా… హేతూహి ధమ్మేహి యే ధమ్మా… హేతూహి చేవ సహేతుకేహి చ ధమ్మేహి యే ధమ్మా… హేతూహి చేవ హేతుసమ్పయుత్తేహి చ ధమ్మేహి యే ధమ్మా ఖన్ధసఙ్గహేన అసఙ్గహితా ఆయతనసఙ్గహేన సఙ్గహితా ధాతుసఙ్గహేన సఙ్గహితా…పే… తే ధమ్మా అసఙ్ఖతం ఖన్ధతో ఠపేత్వా తీహి ఖన్ధేహి ఏకేనాయతనేన ఏకాయ ధాతుయా సఙ్గహితా.

౧౮౫. అప్పచ్చయేహి ధమ్మేహి యే ధమ్మా… అసఙ్ఖతేహి ధమ్మేహి యే ధమ్మా ఖన్ధసఙ్గహేన అసఙ్గహితా ఆయతనసఙ్గహేన సఙ్గహితా ధాతుసఙ్గహేన సఙ్గహితా…పే… తే ధమ్మా చతూహి ఖన్ధేహి ఏకేనాయతనేన ఏకాయ ధాతుయా సఙ్గహితా.

౧౮౬. ఆసవేహి ధమ్మేహి యే ధమ్మా… ఆసవేహి చేవ సాసవేహి చ ధమ్మేహి యే ధమ్మా… ఆసవేహి చేవ ఆసవసమ్పయుత్తేహి చ ధమ్మేహి యే ధమ్మా ఖన్ధసఙ్గహేన అసఙ్గహితా ఆయతనసఙ్గహేన సఙ్గహితా ధాతుసఙ్గహేన సఙ్గహితా… తే ధమ్మా అసఙ్ఖతం ఖన్ధతో ఠపేత్వా తీహి ఖన్ధేహి ఏకేనాయతనేన ఏకాయ ధాతుయా సఙ్గహితా.

౧౮౭. సంయోజనేహి … గన్థేహి… ఓఘేహి… యోగేహి… నీవరణేహి… పరామాసేహి ధమ్మేహి యే ధమ్మా… పరామాసేహి చేవ పరామట్ఠేహి చ ధమ్మేహి యే ధమ్మా ఖన్ధసఙ్గహేన అసఙ్గహితా ఆయతనసఙ్గహేన సఙ్గహితా ధాతుసఙ్గహేన సఙ్గహితా… తే ధమ్మా అసఙ్ఖతం ఖన్ధతో ఠపేత్వా తీహి ఖన్ధేహి ఏకేనాయతనేన ఏకాయ ధాతుయా సఙ్గహితా.

౧౮౮. చేతసికేహి ధమ్మేహి యే ధమ్మా… చిత్తసమ్పయుత్తేహి ధమ్మేహి యే ధమ్మా… చిత్తసంసట్ఠేహి ధమ్మేహి యే ధమ్మా… చిత్తసంసట్ఠసముట్ఠానేహి ధమ్మేహి యే ధమ్మా… చిత్తసంసట్ఠసముట్ఠానసహభూహి ధమ్మేహి యే ధమ్మా… చిత్తసంసట్ఠసముట్ఠానానుపరివత్తీహి ధమ్మేహి యే ధమ్మా ఖన్ధసఙ్గహేన అసఙ్గహితా ఆయతనసఙ్గహేన సఙ్గహితా ధాతుసఙ్గహేన సఙ్గహితా…పే… తే ధమ్మా అసఙ్ఖతం ఖన్ధతో ఠపేత్వా ఏకేన ఖన్ధేన ఏకేనాయతనేన ఏకాయ ధాతుయా సఙ్గహితా.

౧౮౯. చిత్తసహభూమి ధమ్మేహి యే ధమ్మా… చిత్తానుపరివత్తీహి ధమ్మేహి యే ధమ్మా ఖన్ధసఙ్గహేన అసఙ్గహితా ఆయతనసఙ్గహేన సఙ్గహితా ధాతుసఙ్గహేన సఙ్గహితా…పే… తే ధమ్మా న కేహిచి ఖన్ధేహి ఏకేనాయతనేన ఏకాయ ధాతుయా సఙ్గహితా.

౧౯౦. ఉపాదానేహి ధమ్మేహి యే ధమ్మా… కిలేసేహి ధమ్మేహి యే ధమ్మా… కిలేసేహి చేవ సంకిలేసికేహి చ ధమ్మేహి యే ధమ్మా… కిలేసేహి చేవ సంకిలిట్ఠేహి చ ధమ్మేహి యే ధమ్మా… కిలేసేహి చేవ కిలేససమ్పయుత్తేహి చ ధమ్మేహి యే ధమ్మా ఖన్ధసఙ్గహేన అసఙ్గహితా ఆయతనసఙ్గహేన సఙ్గహితా ధాతుసఙ్గహేన సఙ్గహితా, తే ధమ్మా కతిహి ఖన్ధేహి కతిహాయతనేహి కతిహి ధాతూహి సఙ్గహితా? తే ధమ్మా అసఙ్ఖతం ఖన్ధతో ఠపేత్వా తీహి ఖన్ధేహి ఏకేనాయతనేన ఏకాయ ధాతుయా సఙ్గహితా.

తయో ఖన్ధా తథా సచ్చా, ఇన్ద్రియాని చ సోళస;

పదాని పచ్చయాకారే, చుద్దసూపరి చుద్దస.

సమతింస పదా హోన్తి, గోచ్ఛకేసు దసస్వథ;

దువే చూళన్తరదుకా [చుల్లన్తరదుకా (సీ.)], అట్ఠ హోన్తి మహన్తరాతి.

అసఙ్గహితేనసఙ్గహితపదనిద్దేసో తతియో.