౨. దుతియనయో

౨. సఙ్గహితేనఅసఙ్గహితపదనిద్దేసో

౧౭౧. చక్ఖాయతనేన యే ధమ్మా… ఫోట్ఠబ్బాయతనేన యే ధమ్మా… చక్ఖుధాతుయా యే ధమ్మా… ఫోట్ఠబ్బధాతుయా యే ధమ్మా ఖన్ధసఙ్గహేన సఙ్గహితా ఆయతనసఙ్గహేన అసఙ్గహితా ధాతుసఙ్గహేన అసఙ్గహితా, తే ధమ్మా కతిహి ఖన్ధేహి కతిహాయతనేహి కతిహి ధాతూహి అసఙ్గహితా? తే ధమ్మా చతూహి ఖన్ధేహి ద్వీహాయతనేహి అట్ఠహి ధాతూహి అసఙ్గహితా.

౧౭౨. చక్ఖువిఞ్ఞాణధాతుయా యే ధమ్మా… సోతవిఞ్ఞాణధాతుయా యే ధమ్మా… ఘానవిఞ్ఞాణధాతుయా యే ధమ్మా… జివ్హావిఞ్ఞాణధాతుయా యే ధమ్మా… కాయవిఞ్ఞాణధాతుయా యే ధమ్మా… మనోధాతుయా యే ధమ్మా… మనోవిఞ్ఞాణధాతుయా యే ధమ్మా ఖన్ధసఙ్గహేన సఙ్గహితా ఆయతనసఙ్గహేన అసఙ్గహితా ధాతుసఙ్గహేన అసఙ్గహితా…పే… తే ధమ్మా చతూహి ఖన్ధేహి ఏకాదసహాయతనేహి ద్వాదసహి ధాతూహి అసఙ్గహితా.

౧౭౩. చక్ఖున్ద్రియేన యే ధమ్మా… సోతిన్ద్రియేన యే ధమ్మా… ఘానిన్ద్రియేన యే ధమ్మా… జివ్హిన్ద్రియేన యే ధమ్మా… కాయిన్ద్రియేన యే ధమ్మా… ఇత్థిన్ద్రియేన యే ధమ్మా… పురిసిన్ద్రియేన యే ధమ్మా ఖన్ధసఙ్గహేన సఙ్గహితా ఆయతనసఙ్గహేన అసఙ్గహితా ధాతుసఙ్గహేన అసఙ్గహితా…పే… తే ధమ్మా చతూహి ఖన్ధేహి ద్వీహాయతనేహి అట్ఠహి ధాతూహి అసఙ్గహితా.

౧౭౪. అసఞ్ఞాభవేన యే ధమ్మా… ఏకవోకారభవేన యే ధమ్మా ఖన్ధసఙ్గహేన సఙ్గహితా ఆయతనసఙ్గహేన అసఙ్గహితా ధాతుసఙ్గహేన అసఙ్గహితా…పే… తే ధమ్మా చతూహి ఖన్ధేహి తీహాయతనేహి నవహి ధాతూహి అసఙ్గహితా.

౧౭౫. పరిదేవేన యే ధమ్మా… సనిదస్సనసప్పటిఘేహి ధమ్మేహి యే ధమ్మా ఖన్ధసఙ్గహేన సఙ్గహితా ఆయతనసఙ్గహేన అసఙ్గహితా ధాతుసఙ్గహేన అసఙ్గహితా…పే… తే ధమ్మా చతూహి ఖన్ధేహి ద్వీహాయతనేహి అట్ఠహి ధాతూహి అసఙ్గహితా.

౧౭౬. అనిదస్సనసప్పటిఘేహి ధమ్మేహి యే ధమ్మా ఖన్ధసఙ్గహేన సఙ్గహితా ఆయతనసఙ్గహేన అసఙ్గహితా ధాతుసఙ్గహేన అసఙ్గహితా…పే… తే ధమ్మా చతూహి ఖన్ధేహి దసహాయతనేహి సోళసహి ధాతూహి అసఙ్గహితా.

౧౭౭. సనిదస్సనేహి ధమ్మేహి యే ధమ్మా ఖన్ధసఙ్గహేన సఙ్గహితా ఆయతనసఙ్గహేన అసఙ్గహితా ధాతుసఙ్గహేన అసఙ్గహితా…పే… తే ధమ్మా చతూహి ఖన్ధేహి ద్వీహాయతనేహి అట్ఠహి ధాతూహి అసఙ్గహితా.

౧౭౮. సప్పటిఘేహి ధమ్మేహి యే ధమ్మా… ఉపాదాధమ్మేహి యే ధమ్మా ఖన్ధసఙ్గహేన సఙ్గహితా ఆయతనసఙ్గహేన అసఙ్గహితా ధాతుసఙ్గహేన అసఙ్గహితా, తే ధమ్మా కతిహి ఖన్ధేహి కతిహాయతనేహి కతిహి ధాతూహి అసఙ్గహితా? తే ధమ్మా చతూహి ఖన్ధేహి ఏకాదసహాయతనేహి సత్తరసహి ధాతూహి అసఙ్గహితా.

దసాయతనా సత్తరస ధాతుయో,

సత్తిన్ద్రియా అసఞ్ఞాభవో ఏకవోకారభవో;

పరిదేవో సనిదస్సనసప్పటిఘం,

అనిదస్సనం పునదేవ [పునరేవ (పీ.)] సప్పటిఘం ఉపాదాతి.

సఙ్గహితేనఅసఙ్గహితపదనిద్దేసో దుతియో.