౧౧. ఏకాదసమనయో

౧౧. సఙ్గహితేనసమ్పయుత్తవిప్పయుత్తపదనిద్దేసో

౪౦౯. సముదయసచ్చేన యే ధమ్మా… మగ్గసచ్చేన యే ధమ్మా ఖన్ధసఙ్గహేన సఙ్గహితా ఆయతనసఙ్గహేన సఙ్గహితా ధాతుసఙ్గహేన సఙ్గహితా, తే ధమ్మా కతిహి ఖన్ధేహి కతిహాయతనేహి కతిహి ధాతూహి సమ్పయుత్తా? తే ధమ్మా తీహి ఖన్ధేహి ఏకేనాయతనేన సత్తహి ధాతూహి సమ్పయుత్తా; ఏకేన ఖన్ధేన ఏకేనాయతనేన ఏకాయ ధాతుయా కేహిచి సమ్పయుత్తా. కతిహి విప్పయుత్తా? ఏకేన ఖన్ధేన దసహాయతనేహి దసహి ధాతూహి విప్పయుత్తా; ఏకేనాయతనేన ఏకాయ ధాతుయా కేహిచి విప్పయుత్తా.

౪౧౦. ఇత్థిన్ద్రియేన యే ధమ్మా… పురిసిన్ద్రియేన యే ధమ్మా ఖన్ధసఙ్గహేన సఙ్గహితా ఆయతనసఙ్గహేన సఙ్గహితా ధాతుసఙ్గహేన సఙ్గహితా, తే ధమ్మా కతిహి ఖన్ధేహి కతిహాయతనేహి కతిహి ధాతూహి సమ్పయుత్తాతి? నత్థి. కతిహి విప్పయుత్తా? చతూహి ఖన్ధేహి ఏకేనాయతనేన సత్తహి ధాతూహి విప్పయుత్తా; ఏకేనాయతనేన ఏకాయ ధాతుయా కేహిచి విప్పయుత్తా.

౪౧౧. సుఖిన్ద్రియేన యే ధమ్మా… దుక్ఖిన్ద్రియేన యే ధమ్మా… సోమనస్సిన్ద్రియేన యే ధమ్మా… దోమనస్సిన్ద్రియేన యే ధమ్మా ఖన్ధసఙ్గహేన సఙ్గహితా ఆయతనసఙ్గహేన సఙ్గహితా ధాతుసఙ్గహేన సఙ్గహితా…పే… తే ధమ్మా తీహి ఖన్ధేహి ఏకేనాయతనేన సత్తహి ధాతూహి సమ్పయుత్తా; ఏకేనాయతనేన ఏకాయ ధాతుయా కేహిచి సమ్పయుత్తా. కతిహి విప్పయుత్తా? ఏకేన ఖన్ధేన దసహాయతనేహి దసహి ధాతూహి విప్పయుత్తా; ఏకేనాయతనేన ఏకాయ ధాతుయా కేహిచి విప్పయుత్తా.

౪౧౨. ఉపేక్ఖిన్ద్రియేన యే ధమ్మా ఖన్ధసఙ్గహేన సఙ్గహితా ఆయతనసఙ్గహేన సఙ్గహితా ధాతుసఙ్గహేన సఙ్గహితా… తే ధమ్మా తీహి ఖన్ధేహి ఏకేనాయతనేన ద్వీహి ధాతూహి సమ్పయుత్తా; ఏకేనాయతనేన ఏకాయ ధాతుయా కేహిచి సమ్పయుత్తా. కతిహి విప్పయుత్తా? ఏకేన ఖన్ధేన దసహాయతనేహి పన్నరసహి ధాతూహి విప్పయుత్తా; ఏకేనాయతనేన ఏకాయ ధాతుయా కేహిచి విప్పయుత్తా.

౪౧౩. సద్ధిన్ద్రియేన యే ధమ్మా… వీరియిన్ద్రియేన యే ధమ్మా… సతిన్ద్రియేన యే ధమ్మా… సమాధిన్ద్రియేన యే ధమ్మా… పఞ్ఞిన్ద్రియేన యే ధమ్మా… అనఞ్ఞాతఞ్ఞస్సామీతిన్ద్రియేన యే ధమ్మా… అఞ్ఞిన్ద్రియేన యే ధమ్మా… అఞ్ఞాతావిన్ద్రియేన యే ధమ్మా… అవిజ్జాయ యే ధమ్మా… అవిజ్జాపచ్చయా సఙ్ఖారేహి యే ధమ్మా… సళాయతనపచ్చయా ఫస్సేన యే ధమ్మా… వేదనాపచ్చయా తణ్హాయ యే ధమ్మా… తణ్హాపచ్చయా ఉపాదానేన యే ధమ్మా… కమ్మభవేన యే ధమ్మా ఖన్ధసఙ్గహేన సఙ్గహితా ఆయతనసఙ్గహేన సఙ్గహితా ధాతుసఙ్గహేన సఙ్గహితా తే ధమ్మా తీహి ఖన్ధేహి ఏకేనాయతనేన సత్తహి ధాతూహి సమ్పయుత్తా; ఏకేన ఖన్ధేన ఏకేనాయతనేన ఏకాయ ధాతుయా కేహిచి సమ్పయుత్తా. కతిహి విప్పయుత్తా? ఏకేన ఖన్ధేన దసహాయతనేహి దసహి ధాతూహి విప్పయుత్తా; ఏకేనాయతనేన ఏకాయ ధాతుయా కేహిచి విప్పయుత్తా.

౪౧౪. పరిదేవేన యే ధమ్మా ఖన్ధసఙ్గహేన సఙ్గహితా ఆయతనసఙ్గహేన సఙ్గహితా ధాతుసఙ్గహేన సఙ్గహితా, తే ధమ్మా కతిహి ఖన్ధేహి కతిహాయతనేహి కతిహి ధాతూహి సమ్పయుత్తాతి? నత్థి. కతిహి విప్పయుత్తా? చతూహి ఖన్ధేహి ఏకేనాయతనేన సత్తహి ధాతూహి విప్పయుత్తా; ఏకేనాయతనేన ఏకాయ ధాతుయా కేహిచి విప్పయుత్తా.

౪౧౫. సోకేన యే ధమ్మా… దుక్ఖేన యే ధమ్మా… దోమనస్సేన యే ధమ్మా ఖన్ధసఙ్గహేన సఙ్గహితా ఆయతనసఙ్గహేన సఙ్గహితా ధాతుసఙ్గహేన సఙ్గహితా… తే ధమ్మా తీహి ఖన్ధేహి ఏకేనాయతనేన సత్తహి ధాతూహి సమ్పయుత్తా; ఏకేనాయతనేన ఏకాయ ధాతుయా కేహిచి సమ్పయుత్తా. కతిహి విప్పయుత్తా? ఏకేన ఖన్ధేన దసహాయతనేహి దసహి ధాతూహి విప్పయుత్తా; ఏకేనాయతనేన ఏకాయ ధాతుయా కేహిచి విప్పయుత్తా.

౪౧౬. ఉపాయాసేన యే ధమ్మా… సతిపట్ఠానేన యే ధమ్మా… సమ్మప్పధానేన యే ధమ్మా… అప్పమఞ్ఞాయ యే ధమ్మా… పఞ్చహి ఇన్ద్రియేహి యే ధమ్మా… పఞ్చహి బలేహి యే ధమ్మా… సత్తహి బోజ్ఝఙ్గేహి యే ధమ్మా… అరియేన అట్ఠఙ్గికేన మగ్గేన యే ధమ్మా… ఫస్సేన యే ధమ్మా… చేతనాయ యే ధమ్మా… అధిమోక్ఖేన యే ధమ్మా… మనసికారేన యే ధమ్మా… హేతూహి ధమ్మేహి యే ధమ్మా… హేతూహి చేవ సహేతుకేహి చ ధమ్మేహి యే ధమ్మా… హేతూహి చేవ హేతుసమ్పయుత్తేహి చ ధమ్మేహి యే ధమ్మా… ఆసవేహి ధమ్మేహి యే ధమ్మా… ఆసవేహి చేవ సాసవేహి చ ధమ్మేహి యే ధమ్మా… ఆసవేహి చేవ ఆసవసమ్పయుత్తేహి చ ధమ్మేహి యే ధమ్మా… సంయోజనేహి ధమ్మేహి యే ధమ్మా… గన్థేహి ధమ్మేహి యే ధమ్మా… ఓఘేహి ధమ్మేహి యే ధమ్మా… యోగేహి ధమ్మేహి యే ధమ్మా… నీవరణేహి ధమ్మేహి యే ధమ్మా… పరామాసేహి ధమ్మేహి యే ధమ్మా… ఉపాదానేహి ధమ్మేహి యే ధమ్మా… కిలేసేహి ధమ్మేహి యే ధమ్మా… కిలేసేహి చేవ సంకిలేసికేహి చ ధమ్మేహి యే ధమ్మా… కిలేసేహి చేవ సంకిలిట్ఠేహి చ ధమ్మేహి యే ధమ్మా… కిలేసేహి చేవ కిలేససమ్పయుత్తేహి చ ధమ్మేహి యే ధమ్మా ఖన్ధసఙ్గహేన సఙ్గహితా ఆయతనసఙ్గహేన సఙ్గహితా ధాతుసఙ్గహేన సఙ్గహితా, తే ధమ్మా కతిహి ఖన్ధేహి కతిహాయతనేహి కతిహి ధాతూహి సమ్పయుత్తా? తే ధమ్మా తీహి ఖన్ధేహి ఏకేనాయతనేన సత్తహి ధాతూహి సమ్పయుత్తా; ఏకేన ఖన్ధేన ఏకేనాయతనేన ఏకాయ ధాతుయా కేహిచి సమ్పయుత్తా. కతిహి విప్పయుత్తా? ఏకేన ఖన్ధేన దసహాయతనేహి దసహి ధాతూహి విప్పయుత్తా; ఏకేనాయతనేన ఏకాయ ధాతుయా కేహిచి విప్పయుత్తా.

ద్వే సచ్చా పన్నరసిన్ద్రియా, ఏకాదస పటిచ్చపదా;

ఉద్ధం పున ఏకాదస, గోచ్ఛకపదమేత్థ తింసవిధాతి.

సఙ్గహితేనసమ్పయుత్తవిప్పయుత్తపదనిద్దేసో ఏకాదసమో.