౩౭. పుత్తవత్థుమ్హి అయమానుపుబ్బీకథా

ఏకస్మిం కిర సమయే లఙ్కాదీపవాసినో సట్ఠిమత్తా భిక్ఖూ జయమహాబోధిం వన్దితుకామా ఏకతో మన్తేత్వా మహాతిత్థేన నావం ఆరుయ్హ జమ్బుదీపం పత్వా తామలిత్తిపట్ఠేనే [తమలిత్తపట్టనే ఇతికత్థచి] ఓతరిత్వా అనుక్కమేన పాటలిపుత్తనగరం పాపుణింసు. అథ తస్మిం నగరే పిణ్డాయ చరన్తే తే భిక్ఖూ ఏకో దుగ్గతమనుస్సో దిస్వా చిరేన [చిరేనాహందిట్ఠా ఇతిసబ్బత్థ] మయా దిట్ఠా బుద్ధపుత్తాతి సోమనస్సో భరియం పక్కోసిత్వా భద్దే ఇమేసం అయ్యానం దానం దాతుకామోమ్హి, పుబ్బే నో అకతపుఞ్ఞత్తా ఇదాని దుగ్గతా జాతా, ఇమేసు పుఞ్ఞక్ఖేత్తేసు బీజం నో చే రోపేస్సామ, పునపి ఏవమేవ భవిస్సామాతి వత్వా కిం మే గేహే దేయ్యధమ్మం అత్థీతి పుచ్ఛి. సా తం సుత్వా ఘరే నో సామి అయ్యానం కిఞ్చి దాతబ్బం న పస్సామి. అపి చ మమ పుత్తం మారేత్వా దానం దాతుం సక్కాతి. సో తస్సా కథం సుత్వా భద్దే పుత్తం మారేత్వా కిం దానం దేమాతి ఆహ. తాయ తం సుత్వా సామి కిం న జానాసి, పుత్తే నో మతే సన్దిట్ఠసమ్భత్తా ఞాతిమిత్తసుహజ్జా చ అమ్హాకం సన్తికం ఆగచ్ఛాన్తా కిఞ్చి పణ్ణాకారం గహేత్వా ఆగచ్ఛన్తి. మయం తేన పణ్ణాకారేన దానం దస్సామాతి వుత్తే ఉపాసకో సాధు తథా కరోహీతి మాతుయా ఏవ భారమకాసి, సా పుత్తం మారేతుం అవిసహన్తీ ఆహ. తథా హి.

౧. కిచ్ఛా లద్ధం పియం పుత్తం, అమ్మమ్మాతి పియం వదం;

సునీలనేత్తం సుభముం, కో పక్కమితుమిచ్ఛతి.

౨. మాతరా మారియన్తోపి, మాతరమేవ రోదతి;

మారేతుం తం న సక్కోమి, హదయం మే పవేధతీతి.

ఏవఞ్చ పన వత్వా అహం సామి న సక్కోమి పుత్తం మారేతుం. త్వం మారేహీతి పుత్తం పితుసన్తికం పేసేసి. అథ సోపి తం మారేతు మసక్కోన్తో ఏవమాహ. వుత్తఞ్హి.

౩. తాయన్తి పితునో దుక్ఖం, పుత్తా పుత్తాతి కిత్తితా;

పితు దుక్ఖం సుఖం పుత్తా, దాయాదా హోన్తి సబ్బదా.

౪. తస్మా మే సదిసం పుత్తం, పిల్లకం మఞ్జుభాసనం;

న సక్కోమి అహం భద్దే, జీవితా తం వియోజితుం.

౫. అయసఞ్చ అకిత్తిఞ్చ, పప్పోతి పుత్తఘాతకో;

పాణాతిపాతకమ్మమ్పి, కామం సో ఫుసతే నరోతి.

ఏవఞ్చ పన వత్వా సో త్వమేవ తవ పుత్తం మారేహీతి పేసేసి, ఏవం తేన వుత్తే పుత్థస్స మారపాణూపాయం పరియేసన్తా ఏవమాహంసు, అమ్హే పనిమం మారేతుం న సక్కోమి, అమ్హాకం పచ్ఛాగేహే మహన్తో వమ్మికో అత్థి, తస్మిం ఏకో నాగరాజా పటివసతి. కుమారం తత్థ పేసేస్సామ, సో తం డసిత్వా మారేస్సతీతి. ఇచ్చేతే ఏసో ఖో ఉపాయో ఏవాతి చిన్తేత్వా కుమారం పక్కోసిత్వా అఞ్చనా వలివలయాదీహి మణ్డేత్వా తస్స హత్థే గేణ్డుం [తేణ్డుం ఇతిసబ్బత్థ] ఠపేత్వా తాత పచ్ఛాగేహే వమ్మికసమీపం గన్త్వా కీళాతి పేసేసుం. తతో దారకో గన్త్వా గేణ్డుకేన కీళన్తో వమ్మికబిలే గేణ్డుకం పాతేసి. అథ సో గేణ్డుకం గణ్హిస్సామీతి వమ్మికసుసిరే హత్థం పవేసేసి. తతో సప్పో కుజ్ఝిత్వా సుసూతిసద్దం కరోన్తో మహన్తం ఫణం కత్వా బిలతో సీసం ఉక్ఖిపిత్వా ఓలోకేన్తో అట్ఠాసి కుమారస్స హత్థతో పరిగలితపాసంవియ. అథస్స కుమారో కిఞ్చి అజానన్తో సప్పస్స గీవం దళ్హం గణ్హి. అథస్స మాతాపితున్నం సద్ధాబలేన నాగరాజా కుమారస్స కరతలే అట్ఠంసం ఇచ్ఛాదాయకం కణ్ఠమణిరతనం పాతేసి. కుమారస్స మాతాపితరో ద్వారం నిస్సాయ ఠితా తస్స కిరియం ఓలోకేన్తో తం మణిరతనం దిస్వా సీఘం గన్త్వా పుత్తం ఉక్ఖిపిత్వా హత్థతో మణిరతనం గణ్హింసు. తతో తే తం మణిరతనం పరిసుద్ధాసనే ఠపేత్వా ఉపచారం కత్వా అమ్హాకం ఇదఞ్చిదఞ్చ దేథాతి అబ్భుక్కిరింసు. అథ తే మణిరతనానుభావేన గేహద్వారే మహన్తం మణ్డపం కారేత్వా వితానాదినా మణ్డపం అలఙ్కరిత్వా భిక్ఖూనం ఆసనాని పఞ్ఞాపేత్వా తే సట్ఠిమత్తే భిక్ఖూ నిసీదాపేత్వా మహాదానం అదంసు. తతో నగరవాసినో మణిరతనానుభావం సుత్వా సన్నిపతింసు. అథ తే తేసం మజ్ఝే అత్తనో సద్ధాబలేన మణిరతనస్స లాభం పకాసేత్వా ఇమఞ్హి దానత్థాయేవ పరిచ్చజ్జామాతి ఏకస్మిం ఠానే పతిట్ఠాపేత్వా తేనానుభావేన యావజీవం దానం దదన్తా సీలం రక్ఖన్తా ఆయుపరియోసానే దేవలోకే నిబ్బత్తింసూతి.

౬. ఛేత్వాన పేమం అపి అత్రజేసు,

దదన్తి దానం ఇధ మానుసేవం;

న దదాతి కో నామ నరో సమిద్ధో,

దానఞ్హి దానస్స ఫలం సరన్తోతి.

పుత్తవత్థుం సత్తమం.