౨. కోసియవగ్గ ౪. ఛబ్బస్స సిక్ఖాపుచ్ఛా

పుచ్ఛా – యం తేన ఆవుసో భగవతా…పే… సమ్మాసమ్బుద్ధేన అనువస్సం కారాపేన్తస్స నిస్సగ్గియం పాచిత్తియం కత్థ పఞ్ఞత్తం.

విస్సజ్జనా – సావత్థియం భన్తే పఞ్ఞత్తం.

పుచ్ఛా – కం ఆవుసో ఆరబ్భ కిస్మిం వత్థుస్మిం పఞ్ఞత్తం.

విస్సజ్జనా – సమ్బహులే భన్తే భిక్ఖూ ఆరబ్భ పఞ్ఞత్తం, సమ్బహులా భన్తే భిక్ఖూ అనువస్సం సన్థతం కారాపేసుం, తస్మిం భన్తే వత్థుస్మిం పఞ్ఞత్తం.

పుచ్ఛా – కస్స ఆవుసో వచనం.

విస్సజ్జనా – భగవతో భన్తే వచనం అరహతో సమ్మాసమ్బుద్ధస్స.

పుచ్ఛా – కేనావుసో ఆభతం.

విస్సజ్జనా – పరమ్పరాయ భన్తే ఆభతం.

పుచ్ఛా – అత్థి నుఖో ఆవుసో ఏత్థ కోచి విరద్ధదోసో.

విస్సజ్జనా – నత్థి భన్తే.

సంగాయనత్థాయ సఙ్ఘస్స ఞాపనం

సుణాతు మే భన్తే సఙ్ఘో, అహం ఆయస్మన్తం విచిత్తసారాభివంసం తిపిటకధర ధమ్మభణ్డాగారికం ఇమేసం నిస్సగ్గియపాచిత్తియసిక్ఖాపదానం యావ ఛబ్బస్ససిక్ఖాపదం నిదానాదీని పుచ్ఛితబ్బాని అనేకాని ఠానాని పుచ్ఛిం, పుట్ఠోపుట్ఠో చ సో ఆయస్మా విచిత్తసారాభివంసో విస్సజ్జేసి, ఇతిహిదం భన్తే ఇమాని సిక్ఖాపదాని నిమ్మలాని సుపరిసుద్ధానీ తస్సేవ భగవతో వచనాని అరహతో సమ్మాసమ్బుద్ధస్స, తస్మా యథాపురే మహాకస్సపాదయో మహాథేరవరా పోరాణసంగీతికారా బ్రహ్మచరియస్స చిరట్ఠితియా బహుజనహితాయ బహుజనసుఖాయ లోకానుకమ్పాయ అత్థాయ హితాయ సుఖాయ దేవమనుస్సానం ధమ్మవినయం సంగాయింసు చేవ అనుసంగాయింసు చ, ఏవమేవ మయమ్పి దాని సబ్బేవ ఛట్ఠసంగీతి మహాధమ్మసభా పరియాపన్నా ఛబ్బస్స నిస్సగ్గియ సిక్ఖాపదతో పట్ఠాయ ఇమాని నిస్సగ్గియసిక్ఖాపదాని ఏకతో గణసజ్ఝాయం కత్వా సంహాయేయ్యామ.