౬. సురాపానవగ్గ, ౭. నహాన సిక్ఖాపుచ్ఛా

పుచ్ఛా – ఓరేనద్ధమాసం ఆవుసో నహాయన్తస్స పాచిత్తియం కత్థ పఞ్ఞత్తం, కం ఆరబ్భ కిస్మిం వత్థుస్మిం పఞ్ఞత్తం.

విస్సజ్జనా – రాజగహే భన్తే సమ్బహులే భిక్ఖూ ఆరబ్భ పఞ్ఞత్తం, సమ్బహులా భన్తే భిక్ఖూ రాజానమ్పి పస్సిత్వా న మత్తం జానిత్వా నహాయింసు, తస్మిం భన్తే వత్థుస్మిం పఞ్ఞత్తం.

పుచ్ఛా – కస్స ఆవుసో వచనం.

విస్సజ్జనా – భగవతో భన్తే వచనం అరహతో సమ్మాసమ్బుద్ధస్స.

పుచ్ఛా – కేనావుసో ఆభతం.

విస్సజ్జనా – పరమ్పరాయ భన్తే ఆభతం.

పుచ్ఛా – అత్థి నుఖో ఆవుసో ఏత్థ కోచిపి విరుద్ధదోసో.

విస్సజ్జనా – నత్థి భన్తే.

సుణాతు మే భన్తే సఙ్ఘో…పే… సంగాయేయ్యామ.

పుచ్ఛా – యం తేన ఆవుసో…పే… సమ్మాసమ్బుద్ధేన అనాదియిత్వా తిణ్ణం దుబ్బణ్ణకరణానం అఞ్ఞతరం దుబ్బణ్ణకరణం నవం చీవరం పరిభుఞ్జన్తస్స పాచిత్తియం కత్థ పఞ్ఞత్తం, కం ఆరబ్భ కిస్మిం వత్థుస్మిం పఞ్ఞత్తం.

విస్సజ్జనా – సావత్థియం భన్తే సమ్బహులే భిక్ఖూ ఆరబ్భ పఞ్ఞత్తం, సమ్బహులా భన్తే భిక్ఖూ అత్తనో చీవరం న సఞ్జానింసు, తస్మిం భన్తే వత్థుస్మిం పఞ్ఞత్తం.