౨. భూతగామవగ్గ, ౫. దుతియ సేనాసన సిక్ఖాపుచ్ఛా

పుచ్ఛా – సఙ్ఘికే ఆవుసో విహారే సేయ్యం సన్థరిత్వా అనుద్ధరిత్వా అనాపుచ్ఛా పక్కమన్తస్స పాచిత్తియం కత్థ పఞ్ఞత్తం, కం ఆరబ్భ కిస్మిం వత్థుస్మిం పఞ్ఞత్తం.

విస్సజ్జనా – సావత్థియం భన్తే సత్తరసవగ్గియే భిక్ఖూ ఆరబ్భ పఞ్ఞత్తం, సత్తరసవగ్గియా భన్తే భిక్ఖూ సఙ్ఘికే విహారే సేయ్యం సన్థరిత్వా అనుద్ధరిత్వా అనాపుచ్ఛా పక్కమింసు, తస్మిం భన్తే వత్థుస్మిం పఞ్ఞత్తం.

పుచ్ఛా – కస్స ఆవుసో వచనం.

విస్సజ్జనా – భగవతా భన్తే వచనం అరహతో సమ్మాసమ్బుద్ధస్స.

పుచ్ఛా – కేనావుసో ఆభతం.

విస్సజ్జనా – పరమ్పరాయ భన్తే ఆభతం.

పుచ్ఛా – అత్థి నుఖో ఆవుసో ఏత్థ కోచిపి విరద్ధదోసో.

విస్సజ్జనా – నత్థి భన్తే.

సఙ్ఘస్స ఞాపనం

సుణాతు మే భన్తే సఙ్ఘో, అహం భన్తే ఆయస్మన్తం విచిత్తసారాభివంసం ఇమేసం పన్నరసన్నం సిక్ఖాపదానం నిదానాదీని పుచ్ఛితబ్బాని అనేకాని ఠానాని పుచ్ఛిం, సో చ పుట్ఠో పుట్ఠో విస్సజ్జేతి, ఇతి హిదం భన్తే నిమ్మలం సుపరిసుద్ధం తస్సేవ భగవతో వచనం అరహతో సమ్మాసమ్బుద్ధస్స, తస్మా యథాపురే మహాకస్సపాదయో మహాథేరవరా పోరాణసంగీతికారా బ్రహ్మచరియస్స చిరట్ఠితియా బహుజనహితాయ బహుజనసుఖాయ లోనుకమ్పాయ అత్థాయ హితాయ సుఖాయ దేవమనుస్సానం ధమ్మవినయం సంగాయింసుచేవ అనుసంగాయింసుచ, ఏవమేవ మయమ్పి దాని ఛట్ఠసంగీతిమహాధమ్మసభా పరియాపన్నా యథానుప్పట్ఠానతో పట్ఠాయ ఇమాని సిక్ఖాపదాని ఏకతో గణసజ్ఝాయం కత్వా సంగాయేయ్యామ.