౮-౯. దుట్ఠదోస సఙ్ఘాదిసేస సిక్ఖాపుచ్ఛా

పుచ్ఛా – యం తేన ఆవుసో భగవతా…పే… సమ్మాసమ్బుద్ధేన భిక్ఖుం అమూలకేన పారాజికేన ధమ్మేన అనుద్ధంసేన్తస్స చ, భిక్ఖుం అఞ్ఞభాగియస్స అధికరణస్స కిఞ్చిదేసం లేసమత్తం ఉపాదాయ పారాజికేన ధమ్మేన అనుద్ధంసేన్తస్స చ సఙ్ఘాదిసేసో కత్థ పఞ్ఞత్తో.

విస్సజ్జనా – రాజగహే భన్తే పఞ్ఞత్తో.

పుచ్ఛా – కం ఆవుసో ఆరబ్భ కిస్మిం వత్థుస్మిం పఞ్ఞత్తో.

విస్సజ్జనా – మేత్తియభూమజకా భన్తే భిక్ఖూ ఆరబ్భ పఞ్ఞత్తో, మేత్తియభూమజకా భన్తే భిక్ఖూ ఆయస్మన్తం దబ్బం మల్లపుత్తం అమూలకేన పారాజికేన ధమ్మేన అనుద్ధంసేసుం, తేయేవ భన్తే మేత్తియభూమజకా భిక్ఖూ ఆయస్మన్తం దబ్బం మల్లపుత్తం అఞ్ఞభాగియస్స అధికరణస్స కిఞ్చిదేసం లేసమత్తం ఉపాదాయ పారాజికేన ధమ్మేన అనుద్ధంసేసుం, తస్మిం భన్తే వత్థుస్మిం, పఞ్ఞత్తో.