౧౩. కులదూసక సఙ్ఘాదిసేస సిక్ఖాపుచ్ఛా

పుచ్ఛా – యం తేన ఆవుసో భగవతా…పే… సమ్మాసమ్బుద్ధేన కులదూసకస్స భిక్ఖునో యావతతియం సమనుభాసనాయ అప్పటినిస్సజ్జన్తస్స సఙ్ఘాదిసేసో కత్థ పఞ్ఞత్తో.

విస్సజ్జనా – సావత్థియం భన్తే పఞ్ఞత్తో.

పుచ్ఛా – కం ఆరబ్భ ఆవుసో కిస్మిం వత్థుస్మిం పఞ్ఞత్తో.

విస్సజ్జనా – అస్సజి పునబ్బసుకే భన్తే భిక్ఖూ ఆరబ్భ పఞ్ఞత్తో, అస్సజిపునబ్బసుకా భన్తే భిక్ఖూ సఙ్ఘేన పబ్బాజనీయకమ్మకతా ఛన్దగామితా దోసగామితా మోహగామితా భయగామితా పాపేసుం, తస్మిం భన్తే వత్థుస్మిం పఞ్ఞత్తో.

అనియత సిక్ఖాపుచ్ఛా

పుచ్ఛా – యం తేన ఆవుసో భగవతా…పే… సమ్మాసమ్బుద్ధేన పఠమో చ అనియతో దుతియో చ అనియతో కత్థ పఞ్ఞత్తో.

విస్సజ్జనా – సావత్థియం భన్తే పఞ్ఞత్తో.

పుచ్ఛా – కం ఆవుసో ఆరబ్భ కిస్మిం వత్థుస్మిం పఞ్ఞత్తో.

విస్సజ్జనా – ఆయస్మన్తం భన్తే ఉదాయిం ఆరబ్భ పఞ్ఞత్తో, ఆయస్మా భన్తే ఉదాయీ మాతుగామేన సద్ధిం ఏకోఏకాయ రహో పటిచ్ఛన్నే ఆసనే అలంకమ్మనియే నిసజ్జం కప్పేసి, తస్మిఞ్చ వత్థుస్మిం, ఆయస్మాయేవ భన్తే ఉదాయీ మాతుగామేన సద్ధిం రహో నిసజ్జం అకాసి, తస్మిఞ్చ భన్తే వత్థుస్మిం పఞ్ఞత్తో.

పుచ్ఛా – కస్స ఆవుసో వచనం.

విస్సజ్జనా – భగవతో భన్తే వచనం అరహతో సమ్మాసమ్బుద్ధస్స.

పుచ్ఛా – కేనావుసో ఆభతం.

విస్సజ్జనా – పరమ్పరాయ భన్తే ఆభతం.

పుచ్ఛా – అత్థి నుఖో ఆవుసో ఏత్థ కోచిపి విరద్ధదోసో.

విస్సజ్జనా – నత్థి భన్తే.

సంగాయనత్థాయ సఙ్ఘస్సఞాపనం

సుణాతు మే భన్తే సఙ్ఘో, అహం భన్తే ఆయస్మన్తం విచిత్తసారాభివంసం తిపిటకధర ధమ్మభణ్డాగారికం పఠమ దుట్ఠదోస సిక్ఖాపదతో పట్ఠాయ పుచ్ఛితబ్బాని అనేకాని ఠానాని పుచ్ఛిం, సో చ ఆయస్మా పుట్ఠో పుట్ఠో విస్సజ్జేతి, ఇతిహిదం భన్తే సబ్బం సిక్ఖాపదం నిమ్మలం సుపరిసుద్ధం తస్సేవ భగవతో వచనం అరహతో సమ్మాసమ్బుద్ధస్స, తస్మా యథాపురే మహాకస్సపాదయో మహాథేరవరా పోరాణసంగీతికారా బ్రహ్మచరియస్స చిరట్ఠితియా బహుజనహితాయ బహుజనసుఖాయ లోకానుకమ్పాయ అత్థాయ హితాయ సుఖాయ దేవమనుస్సానం సంగాయింసుచేవ అనుసంగాయింసుచ, ఏవమేవ మయమ్పి దాని సబ్బేవ ఛట్ఠసంగీతి మహాధమ్మసభాపరియాపన్నా ఇమాని సిక్ఖాపదాని ఏకతో గణసజ్ఝాయం కత్వా సంగాయేయ్యామ.