సతిపట్ఠానసంయుత్త

సతిసుత్త

పుచ్ఛా – సతిపట్ఠానసంయుత్తే ఆవుసో పోరాణకేహి ధమ్మసంగాహక మహాథేరేహి దుతియం సంగీతం సతిసుత్తం భగవతా కత్థ కం కారబ్భ కథఞ్చ భాసితం.

విస్సజ్జనా – వేసాలియం భన్తే అమ్బపాలివనే సమ్బహులే భిక్ఖూ ఆరబ్భ ‘‘సతో భిక్ఖవే భిక్ఖు విహరేయ్య సమ్పజానో అయం వో అమ్హాకం అనుసాసనీ’’తి ఏవమాదినా భగవతా భాసితం.

సాలసుత్త

పుచ్ఛా – తత్థేవ ఆవుసో పోరాణకేహి ధమ్మసంగాహకమహాథేరేహి చతుత్థం సంగీతం సాలసుత్తం భగవతా కత్థ కం ఆరబ్భ కథఞ్చ భాసితం.

విస్సజ్జనా – కోసలేసు భన్తే సాలాయనామ కేసలానం బ్రాహ్మణగామే సమ్బహులే భిక్ఖూ ఆరబ్భ ‘‘యే తే భిక్ఖవే భిక్ఖూ నవా అచిరపబ్బజితా అధునాగతా ఇమం ధమ్మవినయం, తే వో భిక్ఖవే భిక్ఖూ చతున్నం సతిపట్ఠానానం భావనాయ సమాదపేతబ్బా నివేసేతబ్బా పతిట్ఠాపేతబ్బా’’తి ఏవమాదినా భన్తే భగవతా భాసితం.

సకుణగ్ఘిసుత్త

పుచ్ఛా – తత్థేవ ఆవుసో పోరాణకేహి ధమ్మసంగాహకమహాథేరేహి ఛట్ఠం సంగీతం సకుణగ్ఘిసుత్తం భగవతా కత్థ కం ఆరబ్భ కథఞ్చ భాసితం.

విస్సజ్జనా – సావత్థియం భన్తే సమ్బహులే భిక్ఖూ ఆరబ్భ ‘‘భూతపుబ్బం భిక్ఖవే సకుణగ్ఘి లాపం సకుణం సహసా అజ్ఝప్పత్తా అగ్గహేసి. అథ ఖో భిక్ఖవే లాపో సకుణో సకుణగ్ఘియా హరియమానో ఏవం పరిదేవసి మయమేవమ్హ అలక్ఖికా, మయం అప్పపుఞ్ఞా, యే మయం అగోచరే చరిమ్హ పరవిసయే, సచేజ్జ మయం గోచరే చరేయ్యామ సకే పేత్తికే విసయే, న మ్యాహం సకుణగ్ఘి అలం అభవిస్స యదిదం యుద్ధాయా’’తి ఏవమాదినా భగవతా భాసితం.

మయమేవమ్హ అలక్ఖికా, మయం అప్పపుఞ్ఞా.

కో పన తే లాప గోచరో సకో పేత్తికో విసయో.

యదిదం నఙ్గలకట్ఠకరణం లేడ్డుట్ఠానం.

ఏహి ఖో దాని మే సకుణగ్ఘి, ఏహి ఖో దాని మే సకుణగ్ఘి,

(దారుగుళోవియ వినివత్తిత్వా తస్సేవ లేడ్డుస్స అన్తరే పచ్చుపాది. అట్ఠకథా)

ఏవఞ్హి తం భిక్ఖవే హోతి యో అగోచరే చరతి పరవిసయే.

తస్మాతిహ భిక్ఖవే మా అగోచరే చరిత్థ పరవిసయే.

గోచరే భిక్ఖవే చరథ సకే పేత్తికే విసయే.

గోచరే భిక్ఖవే చరతం సకే పేత్తికే విసయే న లచ్ఛతి మారో ఓతారం, న లచ్ఛతి మారో ఆరమ్మణం.

భిక్ఖునుపస్సయసుత్త

పుచ్ఛా – తత్థేవ ఆవుసో పోరాణకేహి ధమ్మసంగాహకమహాథేరేహి దసమం సంగీతం భిక్ఖునుపస్సయసుత్తం భగవతా కత్థ కం ఆరబ్భ కిస్మిం వత్థుస్మిం కథఞ్చ భాసితం.

విస్సజ్జనా – సావత్థియం భన్తే ఆయస్మన్తం ఆనన్దత్థేరం ఆరబ్భ భాసితం. ఆయస్మా భన్తే ఆనన్దో యావత్తకో అహోసి భిక్ఖునీహి సద్ధిం కథాసల్లాపో తం సబ్బం భగవతో ఆరోచేసి. తస్మిం భన్తే వత్థుస్మిం ‘‘ఏవమేతం ఆనన్ద, ఏవమేతం ఆనన్ద, యోహి కోచి ఆనన్ద భిక్ఖు వా భిక్ఖునీ వా చతూసు సతిపట్ఠానేసు సుప్పతిట్ఠితచిత్తో విహరతి, తస్సేతం పాటికఙ్ఖం ఉళారం పుబ్బేనాపరం విసేసం సఞ్జానిస్సతీ’’తి ఏవమాదినా భగవతా భాసితం.

చున్దసుత్త

పుచ్ఛా – తత్థేవ ఆవుసో దుతియే నాలన్దవగ్గే పోరాణకేహి ధమ్మసంగాహకమహాథేరేహి తతియం సంగీతం చున్దసుత్తం భగవతా కత్థ కం ఆరబ్భ కిస్మిం వత్థుస్మిం కథఞ్చ భాసితం.

విస్సజ్జనా – సావత్థియం భన్తే ఆయస్మన్తంయేవ ఆనన్దత్థేరం ఆరబ్భ భాసితం. ఆయస్మా భన్తే ఆనన్దత్థేరో చున్దేన సమణుద్దేసేన సద్ధిం యేన భగవా తేనుపసఙ్కమి. ఉపసఙ్కమిత్వా భగవన్తం అభివాదేత్వా ఏకమన్తం నిసీది. ఏకమన్తం నిసిన్నో ఖో భన్తే ఆయస్మా ఆనన్దో భగవన్తం ఏతదవోచ ‘‘అయం భన్తే చున్దో సమణుద్దేసో ఏవమాహ ‘ఆయస్మా భన్తే సారిపుత్తో పరినిబ్బుతో, ఇదమస్స పత్తచీవర’న్తి. అపి చ మే భన్తే మధురకజాతో వియ కాయో, దిసాపి మే న పక్ఖాయన్తి, ధమ్మాపి మం నప్పటిభన్తి ‘ఆయస్మా సారిపుత్తో పరినిబ్బుతో’తి సుత్వా’’తి. తస్మిం భన్తే వత్థుస్మిం ‘‘కిం ను ఖో తే ఆనన్ద సారిపుత్తో సీలక్ఖన్ధం వా ఆదాయ పరినిబ్బుతో, సమాధిక్ఖన్ధం వా, పఞ్ఞాక్ఖన్ధంవా, విముత్తిక్ఖన్ధంవా, విముత్తిఞాణదస్సనక్ఖన్ధం వా ఆదాయ పరినిబ్బుతో’’తి ఏవమాదినా భగవతా భాసితం.

అయం భన్తే చున్దోసమణుద్దేసో ఏవమాహ.

తస్మాతిహానన్ద అత్తదీపా విహరథ అత్తసరణా అనఞ్ఞసరణా ధమ్మదీపా ధమ్మసరణా అనఞ్ఞసరణా.

బాహియసుత్త

పుచ్ఛా – తత్థేవ ఆవుసో పోరాణకేహి ధమ్మసంగాహకమహాథేరేహి పఞ్చమం సంగీతం బాహియసుత్తం భగవతా కత్థ కం ఆరబ్భ కిస్మిం వత్థుస్మిం కథఞ్చ భాసితం.

విస్సజ్జనా – సావత్థియం భన్తే ఆయస్మన్తం బాహియం ఆరబ్భ భాసితం. ఆయస్మా భన్తే బాహియో భగవన్తం ఏతదవోచ ‘‘సాధు మే భన్తే భగవా సంఖిత్తేన ధమ్మం దేసేతు, యమహం భగవతో ధమ్మం సుత్వా ఏకో వూపకట్ఠో అప్పమత్తో ఆతాపీ పహితత్తో విహరేయ్య’’న్తి. తస్మిం భన్తే వత్థుస్మిం ‘‘తస్మాతిహ త్వం బాహియ ఆదిమేవ విసోధేహి కుసలేసు ధమ్మేసు. కో చాదికుసలానం ధమ్మానం, సీలఞ్చ సువిసుద్ధం దిట్ఠిచ ఉజుకా’’తి ఏవమాదినా భగవతా భాసితం.