నమో తస్స భగవతో అరహతో సమ్మాసమ్బుద్ధస్స
సుత్తన్తపిటక
మజ్ఝిమనికాయ
మూలపణ్ణాసపాళి
సంగాయనస్స పుచ్ఛా విస్సజ్జనా
పుచ్ఛా – పఠమమహాసంగీతికాలే ఆవుసో ధమ్మసంగాహకా మహాకస్సపాదయో మహాథేరవరా దీఘనికాయం సంగాయిత్వా తదనన్తరం కిం నామ పావచనం సంగాయింసు.
విస్సజ్జనా – పఠమమహాసంగీతికాలే భన్తే ధమ్మసంగాహకా మహాకస్సపాదయో మహాథేరవరా దీఘనికాయం సంగాయిత్వా తదనన్తరం మజ్ఝిమం నామ నికాయం సంగాయింసు.
పుచ్ఛా – మజ్ఝిమనికాయో నామ ఆవుసో మూలపణ్ణాసకో మజ్ఝిమ పణ్ణాసకో ఉపరిపణ్ణాసకోతి పణ్ణాసకవసేన తివిధో, తత్థ కతరం పణ్ణాసకం పఠమం సంగాయింసు.
విస్సజ్జనా – తీసు భన్తే పణ్ణాసకేసు మూలపణ్ణాసకం నామ పావచనం ధమ్మసంగాహకా మహాథేరవరా పఠమం సంగాయింసు.
పుచ్ఛా – మూలపణ్ణాసకేపి ఆవుసో పఞ్చవగ్గా పణ్ణాస చ సుత్తాని, తేసు కతరం వగ్గం కతరఞ్చ సుత్తం పఠమం సంగాయింసు.
విస్సజ్జనా – మూలపణ్ణాసకే భన్తే పఞ్చసు వగ్గేసు పఠమం మూలపరియాయవగ్గం పణ్ణాసకేసు చ సుత్తేసు పఠమం మూలపరియాయసుత్తం సంగాయింసు.
సాధు ఆవుసో మయమ్పి దాని తతోయేవ పట్ఠాయ సంగీతిపుబ్బఙ్గమాని పుచ్ఛావిస్సజ్జనకిచ్చాని కాతుం సమారభామ.
మూలపరియాయసుత్త
పుచ్ఛా – తేన ఆవుసో భగవతా జానతా పస్సతా అరహతా సమ్మాసమ్బుద్ధేన మూలపరియాయసుత్తం కత్థ కం ఆరబ్భ కిస్మిం వత్థుస్మిం భాసితం.
విస్సజ్జనా – ఉక్కట్ఠాయం భన్తే పఞ్చసతే బ్రాహ్మణకులా పబ్బజితే ఆరబ్భ భాసితం, పఞ్చసతా భన్తే బ్రాహ్మణకులా పబ్బజితా భిక్ఖూ పరియత్తిం నిస్సాయ మానం ఉప్పాదేసుం, తస్మిం భన్తే వత్థుస్మిం భాసితం.
పుచ్ఛా – తం పనావుసో సుత్తం భగవతా కతిహి వారేహి కతిహి చ అన్తోగధపదేహి విభజిత్వా భాసితం.
విస్సజ్జనా – తం పన భన్తే మూలపరియాయసుత్తం భగవతా అట్ఠహి చ వారేహి చతువీసతియా చ అన్తోగధపదేహి విభజిత్వా దేసితం.
సబ్బాసవసుత్త
పుచ్ఛా – దుతియం పనావుసో సబ్బాసవసుత్తం భగవతా కత్థ కం ఆరబ్భ భాసితం.
విస్సజ్జనా – సబ్బాసవసుత్తం పన భన్తే భగవతా సావత్థియం సమ్బహులే భిక్ఖూ ఆరబ్భ భాసితం.
పుచ్ఛా – తత్థావుసో భగవతా ఆసవా కతిహి పకారేహి విభజిత్వా దస్సితా.
విస్సజ్జనా – సత్తహి భన్తే పకారేహి విభజిత్వా ఆసవా భగవతా పకాసితా.
ధమ్మదాయాదసుత్త
పుచ్ఛా – ధమ్మదాయాదసుత్తం పనావుసో భగవతా కత్థ కం ఆరబ్భ కిస్మిం వత్థుస్మిం భాసితం.
విస్సజ్జనా – సావత్థియం భన్తే సమ్బహులే భిక్ఖూ ఆరబ్భ భాసితం, భగవతో చ భన్తే భిక్ఖుసఙ్ఘస్స చ తదా మహాలాభసక్కారో ఉదపాది, తస్మిం భన్తే వత్థుస్మిం భాసితం.
పుచ్ఛా – తత్థావుసో ద్వే అనుసన్ధయో, తేసు పఠమే అనుసన్ధిమ్హి కథం భగవతా భిక్ఖూనం ఓవాదో దిన్నో.
విస్సజ్జనా – పఠమే భన్తే అనుసన్ధిమ్హి ధమ్మదాయాదా మే భిక్ఖవే భవథ మా ఆమిసదాయాదా, అత్థి మే తుమ్హేసు అనుకమ్పా, కిన్తి మే సావకా ధమ్మదాయాదా భవేయ్యుం నో ఆమిసదాయాదాతి ఏవమాదినా భగవతా భిక్ఖూనం ఓవాదో దిన్నో.
ధమ్మదాయాదా మే భిక్ఖవే భవథ మా ఆమిసదాయాదా, అత్థి మే తుమ్హేసు అనుకమ్పా కిన్తి మే సావకా ధమ్మదాయాదా భవేయ్యుం, నో ఆమిసదాయాదా.
పుచ్ఛా – దుతియే పనావుసో అనుసన్ధిమ్హి ఆయస్మతా సారిపుత్తత్థేరేన ధమ్మసేనాపతినా కీదిసీ ధమ్మదేసనా విభజిత్వా పకాసితా.
విస్సజ్జనా – దుతియే పన భన్తే అనుసన్ధిమ్హి ఆయస్మతా సారిపుత్తత్థేరేన ధమ్మసేనాపతినా సత్థు పవివిత్తస్స విహరతో సావకానం వివేకం అననుసిక్ఖతం తీహి ఠానేహి గారయుతం, అనుసిక్ఖన్తానఞ్చ తీహి ఠానేహి పాసంసతం, సోళస చ పాపకే ధమ్మే తేసఞ్చ పహానాయ మజ్ఝిమా పటిపదా విభజిత్వా పకాసితా.
భయభేరవసుత్త
పుచ్ఛా – భయభేరవసుత్తం పనావుసో భగవతా కత్థ కం ఆరబ్భ కిస్మిం వత్థుస్మిం భాసితం.
విస్సజ్జనా – సావత్థియం భన్తే జాణుస్సోణిం బ్రాహ్మణం ఆరబ్భ భాసితం, జాణుస్సోణి భన్తే బ్రాహ్మణో భగవన్తం ఉపసఙ్కమిత్వా ఏతదవోచ ‘‘యే మే భో గోతమ కులపుత్తా భవన్తం గోతమం ఉద్దిస్స సద్ధా అగారస్మా అనగారియం పబ్బజితా, భవం తేసం గోతమో పుబ్బఙ్గమో, భవం
తేసం గోతమో బహుకారో, భవం తేసం గోతమో సమాదపేతా, భోతో చ పన గోతమస్స సా జనతా దిట్ఠానుగతిం ఆపజ్జతీ’’తి, తస్మిం భన్తే వత్థుస్మిం భాసితం.
అనఙ్గణసుత్త
పుచ్ఛా – అనఙ్గణసుత్తం పనావుసో కత్థ కం ఆరబ్భ కేన భాసితం.
విస్సజ్జనా – సావత్థియం భన్తే సమ్బహులే భిక్ఖూ ఆరబ్భ ఆయస్మతా సారిపుత్తత్థేరేన ధమ్మసేనాపతినా భాసితం.
ఆకఙ్ఖేయ్యసుత్త
పుచ్ఛా – ఆకఙ్ఖేయ్యసుత్తం పనావుసో భగవతా కత్థ కం ఆరబ్భ భాసితం.
విస్సజ్జనా – సావత్థియం భన్తే సమ్బహులే భిక్ఖూ ఆరబ్భ భాసితం.
వత్థసుత్త
పుచ్ఛా – వత్థసుత్తం పనావుసో భగవతా కత్థ కం ఆరబ్భ భాసితం.
విస్సజ్జనా – సావత్థియం భన్తే సమ్బహులే భిక్ఖూ ఆరబ్భ భాసితం.
సల్లేఖసుత్త
పుచ్ఛా – సల్లేఖసుత్తం పనావుసో భగవతా కత్థ కం ఆరబ్భ కిస్మిం వత్థుస్మిం భాసితం.
విస్సజ్జనా – సావత్థియం భన్తే ఆయస్మన్తం మహాచున్దం ఆరబ్భ భాసితం, ఆయస్మా మహాచున్దో భన్తే భగవన్తం ఉపసఙ్కమిత్వా ఏతదవోచ ‘‘యా ఇమా భన్తే అనేకవిహితా దిట్ఠియో లోకే ఉప్పజ్జన్తి, అత్తవాదపటిసంయుత్తా వా లోకవాదపటిసంయుత్తా వా, ఆదిమేవ ను ఖో భన్తే భిక్ఖునో మనసికరోతో ఏవమేతాసం దిట్ఠీనం పహానం హోతి, ఏవమేతాసం దిట్ఠీనం పటినిస్సగ్గో హోతీ’’తి, తస్మిం భన్తే వత్థుస్మిం భాసితం.
పుచ్ఛా – తత్థ చ ఆవుసో కతి పరియాయా కతి చ అన్తోగధపదాని భగవతా విభజిత్వా పకాసితాని.
విస్సజ్జనా – తత్థ భన్తే పఞ్చ పరియాయా చతుచత్తాలీస చ అన్తోగధపదాని భగవతా విత్థారేన భాసితాని.
సమ్మాట్ఠిసుత్త
పుచ్ఛా – సమ్మాదిట్ఠిసుత్తం పనావుసో కత్థ కం ఆరబ్భ కేన భాసితం.
విస్సజ్జనా – సావత్థియం భన్తే సమ్బహులే భిక్ఖూ ఆరబ్భ ఆయస్మతా సారిపుత్తత్థేరేన ధమ్మసేనాపతినా భాసితం.
పుచ్ఛా – కస్స ఆవుసో వచనం.
విస్సజ్జనా – భగవతో భన్తే వచనం అరహతో సమ్మాసమ్బుద్ధస్స.
పుచ్ఛా – కేనావుసో ఆభతం.
విస్సజ్జనా – పరమ్పరాయ భన్తే ఆభతం.
మహాసతిపట్ఠానసుత్త
పుచ్ఛా – మహాసతిపట్ఠానసుత్తం పనావుసో యోగావచరానం బహుపకారత్తా దీఘనికాయే చ ఇధ చాతి ద్వీసు నికాయేసు పోరాణకేహి సంగీతికారేహి ద్విక్ఖత్తుం సంగాయిత్వా విత్థారేన పతిట్ఠాపితం, తం అమ్హేహి దీఘనికాయే యథానుప్పత్తవసేన పుచ్ఛితఞ్చ విస్సజ్జితఞ్చ. తథాపి యోగావచరానం బహుపకారత్తాయేవ తం ఇదానిపి యథానుప్పత్తవసేన పున పుచ్ఛిస్సామి, తం పనేతం ఆవుసో మహాసతిపట్ఠానసుత్తం భగవతా కత్థ కం ఆరబ్భ భాసితం.
విస్సజ్జనా – కురూసు భన్తే కమ్మాసధమ్మే నామ కురూనం నిగమే సమ్బహులే భిక్ఖూ ఆరబ్భ భాసితం.
పుచ్ఛా – కథఞ్చావుసో తత్థ ఆనాపానస్సతి కాయానుపస్సనా భగవతా విభజిత్వా పకాసితా.
విస్సజ్జనా – ఇధ భిక్ఖవే భిక్ఖు అరఞ్ఞగతో వా రుక్ఖమూలగతో వా సుఞ్ఞాగారగతో వా నిసీదతి పల్లఙ్కం ఆభుజిత్వా ఉజుం కాయం పణిధాయ పరిముఖం సతిం ఉపట్ఠపేత్వా సో సతోవ అస్ససతి, సతోవ పస్ససతి, దీఘం వా అస్ససన్తో ‘దీఘం అస్ససామీ’తి పజానాతి, దీఘం వా పస్ససన్తో ‘దీఘం పస్ససామీ’తి పజానాతి, ఏవమాదినా భన్తే తత్థ ఆనాపానస్సతి కాయానుపస్సనా భగవతా విభజిత్వా పకాసితా.
పుచ్ఛా – కథఞ్చావుసో తత్థ ఇరియాపథకాయానుపస్సనా భగవతా విభజిత్వా పకాసితా.
విస్సజ్జనా – పున చపరం భిక్ఖవే భిక్ఖు గచ్ఛన్తో వా గచ్ఛామీతి పజానాతి, ఠితో వా ఠితోమ్హీతి పజానాతి, నిసిన్నో వా నిసిన్నోమ్హీతి పజానాతి, సయానో వా సయానోమ్హీతి పజానాతి, ఏవమాదినా భన్తే భగవతా ఇరియాపథకాయానుపస్సనా భావనా విభజిత్వా పకాసితా.
పుచ్ఛా – కథఞ్చావుసో తత్థ సమ్పజఞ్ఞకాయానుపస్సనా భగవతా విభజిత్వా పకాసితా.
విస్సజ్జనా – పున చపరం భిక్ఖవే భిక్ఖు అభిక్కన్తే పటిక్కన్తే సమ్పజానకారీ హోతి, ఆలోకితే విలోకితే సమ్పజానకారీ హోతి, సమిఞ్జితే పసారితే సమ్పజానకారీ హోతి, సఙ్ఘాటిపత్తచీవరధారణే సమ్పజానకారీ హోతి, అసితే పీతే ఖాయితే సాయితే సమ్పజానకారీ హోతి, ఉచ్చారపస్సావకమ్మే సమ్పజానకారీ హోతి, గతే ఠితే నిసిన్నే సుత్తే జాగరితే భాసితే తుణ్హీభావే సమ్పజానకారీ హోతి, ఏవమాదినా భన్తే భగవతా తత్థ సమ్పజఞ్ఞకాయానుపస్సనా విభజిత్వా పకాసితా.
పుచ్ఛా – కథఞ్చావుసో తత్థ పటికూలమనసికారకాయానుపస్సనా భగవతా విభజిత్వా పకాసితా.
విస్సజ్జనా – పున చపరం భిక్ఖవే భిక్ఖు ఇమమేవ కాయం ఉద్ధం పాదతలా అధో కేసమత్థకా తచపరియన్తం పూరం నానప్పకారస్స అసుచినో పచ్చవేక్ఖతి అత్థి ఇమస్మిం కాయే కేసాలోమా నఖా దన్తా తచో ఏవమాదినా భన్తే తత్థ భగవతా పటికూలమనసికారకాయానుపస్సనా విభజిత్వా పకాసితా.
పుచ్ఛా – కథఞ్చావుసో తత్థ ధాతుమనసికారకాయానుపస్సనా భగవతా విభజిత్వా పకాసితా.
విస్సజ్జనా – పున చపరం భిక్ఖవే భిక్ఖు ఇమమేవ కాయం యథాఠితం యథాపణిహితం ధాతుసో పచ్చవేక్ఖతి అత్థి ఇమస్మిం కాయే పథవీధాతు ఆపోధాతు తేజోధాతు వాయోధాతు ఏవమాదినా భన్తే భగవతా ధాతుమనసికారకాయానుపస్సనా విభజిత్వా పకాసితా.
పుచ్ఛా – కథఞ్చావుసో తత్థ నవ సివథికకాయానుపస్సనా భగవతా విభజిత్వా పకాసితా.
విస్సజ్జనా – పున చపరం భిక్ఖవే భిక్ఖు సేయ్యథాపి పస్సేయ్య సరీరం సివథికాయ ఛడ్డితం ఏకాహమతం వా ద్వీహమతం వా తీహమతం వా ఉద్ధుమాతకం వినీలకం విపుబ్బకజాతం సో ఇమమేవ కాయం ఉపసంహరతి ‘‘అయమ్పి ఖో కాయో ఏవంధమ్మో ఏవంభావీ ఏవంఅనతీతో’’తి ఏవమాదినా భన్తే తత్థ భగవతా నవ సివథికకాయానుపస్సనా భావనా విభజిత్వా పకాసితా.
పుచ్ఛా – కథఞ్చావుసో తత్థ వేదనానుపస్సనా భగవతా విభజిత్వా దేసితా.
విస్సజ్జనా – ఇధ భిక్ఖవే భిక్ఖు సుఖం వా వేదనం వేదయమానో ‘‘సుఖం వేదనం వేదయామీ’’తి పజానాతి, దుక్ఖం వా వేదనం వేదయమానో ‘‘దుక్ఖ వేదనం వేదయామీ’’తి పజానాతి, అదుక్ఖమసుఖం వా వేదనం వేదయమానో ‘‘అదుక్ఖమసుఖం వేదనం వేదయామీ’’తి పజానాతి, ఏవమాదినా భన్తే తత్థ భగవతా వేదనానుపస్సనా విభజిత్వా పకాసితా.
పుచ్ఛా – కథఞ్చావుసో తత్థ చిత్తానుపస్సనా భగవతా విభజిత్వా దేసితా.
విస్సజ్జనా – ఇధ భిక్ఖవే భిక్ఖు సరాగం వా చిత్తం ‘‘సరాగం చిత్త’’న్తి పజానాతి, వీతరాగం వా చిత్తం ‘‘వీతరాగం చిత్త’’న్తి పజానాతి, సదోసం వా వీతదోసం వా సమోహం వా వీతమోహం వా సంఖిత్తం వా చిత్తం ‘‘సంఖిత్తం చిత్త’’న్తి పజానాతి, విక్ఖిత్తం వా చిత్తం ‘‘విక్ఖిత్తం చిత్త’’న్తి పజానాతి, ఏవమాదినా తత్థ భగవతా చిత్తానుపస్సనా విభజిత్వా పకాసితా.
పుచ్ఛా – కథఞ్చావుసో తత్థ ధమ్మానుపస్సనా భగవతా విభజిత్వా దేసితా, తం సఙ్ఖేపమత్తేనేవ విస్సజ్జేహి.
విస్సజ్జనా – ఇధ భిక్ఖవే భిక్ఖు ధమ్మేసు ధమ్మానుపస్సీ విహరతి, పఞ్చసు నీవరణేసు ఏవమాదినా భన్తే తత్థ భగవతా పఞ్చహి పబ్బేహి ధమ్మానుపస్సనా విభజిత్వా పకాసితా.
చూళసీహనాదసుత్త
పుచ్ఛా – చూళనసీహనాదసుత్తం పనావుసో భగవతా కత్థ కం ఆరబ్భ కిస్మిం వత్థుస్మిం భాసితం.
విస్సజ్జనా – సావత్థియం భన్తే పరిహీనలాభసక్కారే నానాతిత్థియే ఆరబ్భ భాసితం, నానాతిత్థియా భన్తే పరిహీనలాభసక్కారా తేసు తేసు ఠానేసు పరిదేవింసు, చతస్సో చ భన్తే పరిసా భగవతో ఏకమత్థం ఆరోచేసుం, తస్మిం భన్తే వత్థుస్మిం భాసితం.
మహాసీహనాదసుత్త
పుచ్ఛా – తేనావుసో భగవతా జానతా పస్సతా అరహతా సమ్మాసమ్బుద్ధేన మహాసీహనాదసుత్తం కత్థ కం ఆరబ్భ కిస్మిం వత్థుస్మిం భాసితం.
విస్సజ్జనా – వేసాలియం భన్తే సునక్ఖత్తం లిచ్ఛవిపుత్తం ఆరబ్భ భాసితం, సనుక్ఖత్తో భన్తే లిచ్ఛవిపుత్తో అచిరపక్కన్తో హోతి ఇమస్మా ధమ్మవినయా, సో వేసాలియం పరిసతి ఏవం వాచం భాసతి ‘‘నత్థి సమణస్స గోతమస్స ఉత్తరిమనుస్సధమ్మా అలమరియఞాణదస్సనవిసేసో, తక్కపరియాహతం సమణో గోతమో ధమ్మం దేసేతి వీమంసానుచరితం సయం పటిభానం. యస్స చ ఖ్వాస్స అత్థాయ ధమ్మో దేసితో, సో నియ్యాతి తక్కరస్స సమ్మా దుక్ఖక్ఖయాయా’’తి, ఏతమత్థం భన్తే ఆయస్మా సారిపుత్తో భగవతో ఆరోచేసి, తస్మిం భన్తే వత్థుస్మిం భాసితం.
పుచ్ఛా – కతి పనావుసో తత్థ భగవతా తథాగతస్స తథాగతబలాని విభజిత్వా పకాసితాని, యేహి బలేహి సమన్నాగతో తథాగతో ఆసభం ఠానం పటిజానాతి, పరిసాసు సీహనాదం నదతి, బ్రహ్మచక్కం పవత్తేతి.
విస్సజ్జనా – దస భన్తే తథాగతస్స తథాగతబలాని భగవతా విభజిత్వా పకాసితాని, యేహి బలేహి సమన్నాగతో తథాగతో ఆసభం ఠానం పటిజానాతి, పరిసాసు సీహనాదం నదతి, బ్రహ్మచక్కం పవత్తేతి.
పుచ్ఛా – కథఞ్చావుసో తత్థ భగవతా చతువేరజ్జఞాణాని విభజిత్వా పకాసితాని, యేహి వేసారజ్జేహి సమన్నాగతో తథాగతో ఆసభం ఠానం పటిజానాతి, పరిసాసు సీహనాదం నదతి, బ్రహ్మచక్కం పవత్తేతి.
విస్సజ్జనా – ఖీణాసవస్స తే పటిజానతో ఇమే ఆసవా అపరిక్ఖీణాతి తత్ర వత మం సమణో వా బ్రాహ్మణో వా దేవో వా మారో వా బ్రహ్మా వా కోచి వా లోకస్మిం సహధమ్మేన పటిచోదేస్సతీతి నిమిత్తమేతం సారిపుత్త న సమనుపస్సామి, ఏతమహం సారిపుత్త నిమిత్తం అసమనుపస్సన్తో ఖేమప్పత్తో అభయప్పత్తో వేసారజ్జప్పత్తో విహరామి. ఏవమాదినా భన్తే తత్థ చతువేసారజ్జఞాణాని భగవతా విత్థారేన విభజిత్వా పకాసితాని.
పుచ్ఛా – కథఞ్చావుసో తత్థ భగవతా పఞ్చగతిపరిచ్ఛేదఞాణం విభజిత్వా పకాసితం.
విస్సజ్జనా – పఞ్చ ఖో ఇమా సారిపుత్త గతియో, కతమా పఞ్చ, నిరయో తిరచ్ఛానయోని పేత్తివిసయో మనుస్సా దేవా, ఏవమాదినా భన్తే భగవతా తత్థ పఞ్చగతిపరిచ్ఛేదకఞాణం విభజిత్వా పకాసితం.
పుచ్ఛా – కథఞ్చావుసో తత్థ తథాగతో అత్తనో పఞ్ఞావేయ్యత్తియా అపరిహానిం పకాసేసి.
విస్సజ్జనా – సన్తి ఖో పన సారిపుత్త ఏకే సమణబ్రాహ్మణా ఏవంవాదినో ఏవందిట్ఠినో యావదేవాయం భవం పురిసో దహరో హోతి, ఏవమాదినా భన్తే తత్థ తథాగతో అత్తనో పఞ్ఞావేయ్యత్తియా అపరిహానిం పకాసేసి.
మహాదుక్ఖక్ఖన్ధసుత్త
పుచ్ఛా – మహాదుక్ఖక్ఖన్ధసుత్తం పనావుసో భగవతా కత్థ కం ఆరబ్భ కిస్మిం వత్థుస్మిం భాసితం.
విస్సజ్జనా – సావత్థియం భన్తే అఞ్ఞతిత్థియే ఆరబ్భ భాసితం, సమ్బహులా భన్తే అఞ్ఞతిత్థియా భిక్ఖూ ఏతదవోచుం ‘‘సమణో ఆవుసో గోతమో కామానం పరిఞ్ఞం పఞ్ఞపేతి, మయమ్పి కామానం పరిఞ్ఞం పఞ్ఞపేమ, సమణో ఆవుసో గోతమో రూపానం వేదనానం పరిఞ్ఞం పఞ్ఞపేతి, మయమ్పి రూపానం వేదనానం పరిఞ్ఞం పఞ్ఞపేమ, ఇధ నో ఆవుసో కో విసేసో, కో అధిప్పయాసో, కిం నానాకరణం సమణస్స వా గోతమస్స అమ్హాకం వా యదిదం ధమ్మదేసనాయ వా ధమ్మదేసనం అనుసాసనియా వా అనుసాసని’’న్తి, ఏతమత్థం భిక్ఖూ భగవతో ఆరోచేసుం, తస్మిం భన్తే వత్థుస్మిం భాసితం.
చూళదుక్ఖక్ఖన్ధసుత్త
పుచ్ఛా – చూళదుక్ఖక్ఖన్ధసుత్తం పనావుసో భగవతా కత్థ కం ఆరబ్భ కిస్మిం వత్థుస్మిం భాసితం.
విస్సజ్జనా – సక్కేసు భన్తే కపిలవత్థుస్మిం మహానామం సక్కం ఆరబ్భ భాసితం, మహానామో భన్తే సక్కో భగవన్తం ఉపసఙ్కమిత్వా ఏతదవోచ ‘‘దీఘరత్తాహం భన్తే భగవతా ఏవం ధమ్మం దేసితం ఆజానామి ‘లోభో చిత్తస్స ఉపక్కిలేసో, దోసో చిత్తస్స ఉపక్కిలేసో, మోహో చిత్తస్స ఉపక్కిలేసో’తి, ఏవఞ్చాహం భన్తే భగవతా ధమ్మం దేసితం ఆజానామి ‘లోభో చిత్తస్స ఉపక్కిలేసో, దోసో చిత్తస్స ఉపక్కిలేసో, మోహో చిత్తస్స ఉపక్కిలేసో’తి. అథ చ పన మే ఏకదా లోభధమ్మాపి చిత్తం పరియాదాయ తిట్ఠన్తి, దోసధమ్మాపి చిత్తం పరియాదాయ తిట్ఠన్తి, మోహధమ్మాపి చిత్తం పరియాదాయ తిట్ఠన్తి, తస్స మయ్హం భన్తే ఏవం హోతి ‘కో సు నామ మే ధమ్మో అజ్ఝత్తం అప్పహినో, యేన మే ఏకదా లోభధమ్మాపి చిత్తం పరియాదాయ తిట్ఠన్తి, దోసధమ్మాపి చిత్తం పరియాదాయ తిట్ఠన్తి, మోహధమ్మాపి చిత్తం పరియాదాయ తిట్ఠన్తీ’తి’’, తస్మిం భన్తే వత్థుస్మిం భాసితం.
అనుమానసుత్త
పుచ్ఛా – అనుమానసుత్తం పనావుసో కత్థ కం ఆరబ్భ కేన భాసితం.
విస్సజ్జనా – భగ్గేసు భన్తే సుసుమారగిరే భేసకళావనే ఆయస్మతా మహామోగ్గల్లానత్థేరేన సమ్బహులే భిక్ఖూ ఆరబ్భ భాసితం.
చేతోఖిలసుత్త
పుచ్ఛా – చేతోఖిలసుత్తం పనావుసో భగవతా కత్థ కం ఆరబ్భ భాసితం.
విస్సజ్జనా – సావత్థియం భన్తే సమ్బహులే భిక్ఖూ ఆరబ్భ భాసితం.
వనపత్థసుత్త
పుచ్ఛా – వనపత్థసుత్తం పనావుసో భగవతా కత్థ కం ఆరబ్భ భాసితం.
విస్సజ్జనా – సావత్థియం భన్తే సమ్బహులే భిక్ఖూ ఆరబ్భ భాసితం.
మధుపిణ్డికసుత్త
పుచ్ఛా – మధుపిణ్డికసుత్తం పనావుసో భగవతా కత్థ కం ఆరబ్భ కిస్మిం వత్థుస్మిం భాసితం.
విస్సజ్జనా – సక్కేసు భన్తే దణ్డపాణిం సక్కం ఆరబ్భ భాసితం, దణ్డపాణి భన్తే సక్కో భగవన్తం ఉపసఙ్కమిత్వా ఏతదవోచ ‘‘కిం వాదీ సమణో కిమక్ఖాయీ’’తి, తస్మిం భన్తే వత్థుస్మిం భాసితం.
ద్వేధావితక్కసుత్త
పుచ్ఛా – ద్వేధావితక్కసుత్తం పనావుసో భగవతా కత్థ కం ఆరబ్భ భాసితం.
విస్సజ్జనా – సావత్థియం భన్తే సమ్బహులే భిక్ఖూ ఆరబ్భ భాసితం.
వితక్కసణ్ఠానసుత్త
పుచ్ఛా – వితక్కసణ్ఠానసుత్తం పనావుసో భగవతా కత్థ కం ఆరబ్భ భాసితం.
విస్సజ్జనా – సావత్థియం భన్తే సమ్బహులే భిక్ఖూ ఆరబ్భ భాసితం.
కకచూపమసుత్త
పుచ్ఛా – తేనావుసో భగవతా…పే… సమ్మాసమ్బుద్ధేన కకచూపమసుత్తం కత్థ కం ఆరబ్భ కిస్మిం వత్థుస్మిం భాసితం.
విస్సజ్జనా – సావత్థియం భన్తే ఆయస్మన్తం మోళియఫగ్గునం ఆరబ్భ భాసితం, ఆయస్మా భన్తే మోళియఫగ్గునో భిక్ఖునీహి సద్ధిం అతివేలం సంసట్ఠో విహరతి, తస్మిం భన్తే వత్థుస్మిం భాసితం.
పుచ్ఛా – అథ ఖో ఆవుసో ఆయస్మతో మోళియఫగ్గునస్స తం భగవతో ఓవాదం సుత్వా కథం చిత్తం ఉప్పన్నం, కథఞ్జ భగవా ఉత్తరి భిక్ఖూన ఓవాదమదాసి.
విస్సజ్జనా – అథ ఖో భన్తే మోళియఫగ్గునస్స భగవతో ఇమం ఓవాదం సుత్వా భిక్ఖునిసంసగ్గతో ఓరమిస్సామి విరమిస్సామీతిపి చిత్తం న ఉప్పన్నం, అసంవరమేవ భన్తే చిత్తం ఉప్పన్నం, భగవా చ భన్తే ఆరాధయింసు వత మే భిక్ఖవే భిక్ఖూ ఏకం సమయం చిత్తం, ఏవమాదినా ఉత్తరి భిక్ఖూనం ఓవాదమదాసి.
ఉభతో దణ్డకేన చేపి భిక్ఖవే కకచేన చోరా ఓచరకా అఙ్గమఙ్గాని ఓకన్తేయ్యుం.
అలగద్దూపమసుత్త
పుచ్ఛా – అలగద్దూపమసుత్తం పనావుసో భగవతా కత్థ కం ఆరబ్భ కిస్మిం వత్థుస్మిం భాసితం.
విస్సజ్జనా – సావత్థియం భన్తే అరిట్ఠం భిక్ఖుం గద్ధబాధిపుబ్బం ఆరబ్భ భాసితం, అరిట్ఠస్స భన్తే భిక్ఖునో గద్ధబాధిపుబ్బస్స ఏవరూపం పాపకం దిట్ఠిగతం ఉప్పన్నం ‘‘తథాహం భగవతా ధమ్మం దేసితం ఆజాదామి, యథా యేమే అన్తరాయికా ధమ్మా వుత్తా భగవతా, తే పటిసేవతో నాలం అన్తరాయాయా’’తి, తస్మిం భన్తే వత్థుస్మిం భాసితం.
పుచ్ఛా – అథ ఖో ఆవుసో ఆయస్మతో అరిట్ఠస్స గద్ధబాధిపుబ్బస్స కథం చేతసో పరివితక్కో ఉదపాది, కథఞ్చ భగవా ఉత్తరి భిక్ఖునం ధమ్మదేసనం పవత్తేసి.
విస్సజ్జనా – అథ ఖో భన్తే అరిట్ఠస్స భిక్ఖునో గద్ధబాధిపుబ్బస్స ‘‘కిఞ్చాపి మం భగవా మోఘపురిసవాదేన వదేసి, న ఖో పన మే మగ్గఫలానం ఉపనిస్సయో న హోతి, స్వాహం ఆరభిత్వా ఘట్టేత్వా మగ్గఫలాని నిబ్బత్తేస్సామీ’’తి, ఏవం ఖో భన్తే చేతసో పరివితక్కో ఉదపాది, భగవా చ భన్తే దుప్పఞ్ఞస్స అలగద్దూపమం దస్సేత్వా అలగద్దూపమం పరియత్తిఞ్చ దస్సేత్వా పఞ్ఞవతో అలగద్దూపమాయ చ కుల్లూపమాయ చ పఞ్ఞవతో నిస్సరణపరియత్తిం దస్సేత్వా ఛ చ దిట్ఠిట్ఠానాని, తేసఞ్చ ఛన్నం దిట్ఠిట్ఠానానం వినివేఠనాకారం దస్సేత్వా పరియోసానే చ ఖన్ధకమ్మట్ఠానం అరహత్తనికూటేన దస్సేత్వా ఉత్తరి భిక్ఖూనం ధమ్మకథం పవత్తేసి.
వమ్మికసుత్త
పుచ్ఛా – ధమ్మికసుత్తం పనావుసో భగవతా కత్థ కం ఆరబ్భ కిస్మిం వత్థుస్మిం భాసితం.
విస్సజ్జనా – సావత్థియం భన్తే ఆయస్మన్తం కుమారకస్సపం ఆరబ్భ భాసితం. ఆయస్మా భన్తే కుమారకస్సపో భగవన్తం ఉపసఙ్కమిత్వా వమ్మికపఞ్హం పుచ్ఛి, తస్మిం భన్తే వత్థుస్మిం భాసితం.
రథవినీతసుత్త
పుచ్ఛా – రథవినీతసుత్తం పనావుసో కత్థ కేన భాసితం.
విస్సజ్జనా – సావత్థియం భన్తే ఆయస్మతా చ సారిపుత్తత్థేరేన ధమ్మసేనాపతినా ఆయస్మతా చ పుణ్ణేన మన్తాణిపుత్తేన అఞ్ఞమఞ్ఞం పుచ్ఛావిస్సజ్జనవసేన భాసితం.
నివాపసుత్త
పుచ్ఛా – నివాపసుత్తం పనావుసో భగవతా కత్థ కం ఆరబ్భ భాసితం.
విస్సజ్జనా – సావత్థియం భన్తే సమ్బహులే భిక్ఖూ ఆరబ్భ భాసితం.
పుచ్ఛా – ఇమస్మిం ఆవుసో సుత్తే కో నివాపో కో నేవాపికో కా నేవాపికపరిసా కా మిగజాతా కథఞ్చేతిస్సా ఉపమాయ అత్థో దట్ఠబ్బో.
విస్సజ్జనా – ఇమస్మిం భన్తే సుత్తే నివాపోతి ఖో భన్తే పఞ్చన్నేతం కామగుణానం అధివచనం, నేవాపికోతి ఖో భన్తే మారస్సేతం పాపిమతో అధివచనం, నేవాపికపరిసాతి ఖో భన్తే మారపరిసాయేతం అధివచనం, మిగజాతాతి ఖో భన్తే సమణబ్రాహ్మణానమేతం అధివచనం, ఇమస్మిం భన్తే సుత్తే ఏతస్స అత్థో ఏవం దట్ఠబ్బో.
పాసరాసిసుత్త
పుచ్ఛా – కేనావుసో భగవతా…పే… సమ్మాసమ్బుద్ధేన పాసరాసిసుత్తం కత్థ కం ఆరబ్భ కిస్మిం వత్థుస్మిం భాసితం.
విస్సజ్జనా – సావత్థియం భన్తే సమ్బహులే భిక్ఖూ ఆరబ్భ భాసితం, సమ్బహులా భన్తే భిక్ఖూ రమ్మకస్స బ్రాహ్మణస్స అస్సమే భగవన్తం ఆరబ్భ ధమ్మియా కథాయ సన్నిసీదింసు, తస్మిం భన్తే వత్థుస్మిం భాసితం.
పుచ్ఛా – అథ ఖో ఆవుసో తేసం సమ్బహులానం భిక్ఖూనం ధమ్మియా కథాయ సన్నిసిన్నానం కీదిసం ధమ్మకథం కథేసి.
విస్సజ్జనా – సాధు భిక్ఖవే ఏతం ఖో భిక్ఖవే తుమ్హాకం పతిరూపం కులపుత్తానం సద్ధా అగారస్మా అనగారియం పబ్బజితానం, యం తుమ్హే ధమ్మియా కథాయ సన్నిసీదేయ్యాథ, సన్నిపతితానం వో భిక్ఖవే ద్వయం కరణీయం ధమ్మీ వా కథా అరియో వా తుణ్హీభావో. ద్వేమా భిక్ఖవే పరియేసనా అరియా చ పరియేసనా అనరియా చ పరియేసనా. ఏవమాదినా భన్తే భగవా సన్నిపతితానం తేసం భిక్ఖూనం అరియపరియేసనఞ్చ అనరియపరియేసనఞ్చ విభజిత్వా దేసేసి.
పుచ్ఛా – కథఞ్చావుసో భగవా అత్తనాపి అనరియపరియేసనం పహాయ అరియపరియేసనాయ పరియేసితభావం పకాసేసి.
విస్సజ్జనా – అహమ్పి సుదం భిక్ఖవే పుబ్బేవ సమ్బోధా అనభిసమ్బుద్ధో బోధిసత్తోవ సమానో అత్తనా జాతిధమ్మో సమానో జాతిధమ్మంయేవ పరియేసామి, అత్తనా జరాధమ్మో బ్యాధిధమ్మో మరణధమ్మో సోకధమ్మో సంకిలేసధమ్మో సమానో సంకిలేసధమ్మంయేవ పరియేసామి. ఏవమాదినా భన్తే భగవా అత్తనాపి అనరియపరియేసనం పహాయ అరియపరియేసనాయ పరియేసితభావం పకాసేసి.
పుచ్ఛా – ఏవం పఠమాభిసమ్బుద్ధస్స ఆవుసో భగవతో అజపాలనిగ్రోధరుక్ఖమూలే నిసిన్నస్స ధమ్మదేసనాయ కతసన్నిట్ఠానస్స కీదిసో
చేతసో పరివితక్కో ఉదపాది, కథఞ్చ ధమ్మదేసనాయ చారికా అహోసి, కథఞ్చ పఠమా ధమ్మదేసనా అహోసి.
విస్సజ్జనా – ‘‘కస్స ను ఖో అహం పఠమం ధమ్మం దేసేయ్యం, కో ఇమం ధమ్మం ఖిప్పమేవ ఆజానిస్సతీ’’తి ఏవం ఖో భన్తే భగవతో పఠమాభిసమ్బుద్ధస్స అజపాలనిగ్రోధమూలే ధమ్మదేసనాయ కతసన్నిట్ఠానస్స పరివితక్కో ఉదపాది, అథ భన్తే భగవా ఉరువేలాయం యథాభిరన్తం విహరిత్వా యేన బారాణసీ, తేన పదసాయేవ చారికం పక్కామి ధమ్మదేసనాయ, ద్వేమే భిక్ఖవే అన్తా పబ్బజితేన న సేవితబ్బా, కతమే ద్వే, యో చాయం కామేసు కామసుఖల్లికానుయోగో హీనో గామ్మో పోథుజ్జనికో అనరియో అనత్తసంహితో, ఏవమాదినా భన్తే భగవతో పఠమా ధమ్మదేసనా అహోసి.
సబ్బాభిభూ సబ్బవిదూహమస్మి,
సబ్బధమ్మేసు అనూపలిత్తో;
సబ్బఞ్జహో తణ్హాక్ఖయే విముత్తో,
సయం అభిఞ్ఞాయ కముద్దిసేయ్యం.