౧౭. ఝానపచ్చయో

సత్త ఝానఙ్గాని ఝానపచ్చయో, వితక్కో విచారో పీతి సోమనస్సం దోమనస్సం ఉపేక్ఖా ఏకగ్గతా. తేహి సహజాతా పఞ్చవిఞ్ఞాణవజ్జితా చిత్తచేతసికధమ్మా చ రూపధమ్మా చ తస్స పచ్చయుప్పన్నా.

కేనట్ఠేన ఝానన్తి. ఉపనిజ్ఝాయనట్ఠేన ఝానం. ఉపనిజ్ఝాయ నట్ఠేనాతి చ మనసా ఆరమ్మణం ఉపగన్త్వా నిజ్ఝాయనట్ఠేన పేక్ఖనట్ఠేన. యథా హి ఇస్సాసో దూరే ఠత్వా ఖుద్దకే లక్ఖమణ్డలే సరం పవేసేన్తో హత్థేహి సరం ఉజుకఞ్చ నిచ్చలఞ్చ కత్వా మణ్డలఞ్చ విభూతం కత్వా చక్ఖునా నిజ్ఝాయన్తో పవేసేతి. ఏవమేవ ఇమేహి అఙ్గేహి చిత్తం ఉజుకఞ్చ నిచ్చలఞ్చ కత్వా ఆరమ్మణఞ్చ విభూతం కత్వా నిజ్ఝాయన్తో పుగ్గలో ఉపనిజ్ఝాయతీతి వుచ్చతి. ఏవం ఉపనిజ్ఝాయిత్వా యంకిఞ్చి కాయకమ్మం వా వచీకమ్మం వా మనోకమ్మం వా కరోన్తో అవిరజ్ఝమానో కరోతి.

తత్థ కాయకమ్మం నామ అభిక్కమప్పటిక్కమాదికం వుచ్చతి. వచీకమ్మం నామ అక్ఖరవణ్ణపరిపుణ్ణం వచీభేదకరణం వుచ్చతి. మనోకమ్మం నామ యంకిఞ్చి మనసా ఆరమ్మణవిభావనం వుచ్చతి. దానకమ్మం వా పాణాతిపాత కమ్మం వా అనురూపేహి ఝానఙ్గేహి వినా దుబ్బలేన చిత్తేన కాతుం న సక్కా హోతి. ఏస నయో సేసేసు కుసలాకుసల కమ్మేసూతి.

అయఞ్చ అత్థో వితక్కాదీనం ఝానఙ్గధమ్మానం విసుం విసుం సభావ లక్ఖణేహి దీపేతబ్బో. సమ్పయుత్తధమ్మే ఆరమ్మణాభినిరోపన లక్ఖణో వితక్కో, సో చిత్తం ఆరమ్మణే దళ్హం నియోజేతి. ఆరమ్మణానుమజ్జనలక్ఖణో విచారో, సో చిత్తం ఆరమ్మణే దళ్హం సంయోజేతి. ఆరమ్మణసమ్పియాయనలక్ఖణాపీతి, సా చిత్తం ఆరమ్మణే పరితుట్ఠం కరోతి. తిస్సోపి వేదనా ఆరమ్మణరసాను భవనలక్ఖణా, తాపి చిత్తం ఆరమ్మణే ఇట్ఠానిట్ఠమజ్ఝత్తరసానుభవన కిచ్చేన దళ్హప్పటిబద్ధం కరోన్తి. సమాధానలక్ఖణా ఏకగ్గతా, సాపి చిత్తం ఆరమ్మణే నిచ్చలం కత్వా ఠపేతీతి. ఝానపచ్చయదీపనా నిట్ఠితా.