నవమ పరిచ్ఛేద

అభయాభిసేకో

౧. మహేసీ జనయీ పుత్తే, దస ఏకఞ్చ ధీతరం;

సబ్బజేట్ఠో’భయో నామ, చిత్తానామ కనిట్ఠికా.

౨. పస్సిత్వా తం వియాకంసు, బ్రాహ్మణా మన్తపారగా;

‘‘రజ్జహేతు సుతో అస్సా, ఘాతయిస్సతి మాతులే’’.

౩. ఘాతేస్సామి కనిట్ఠిన్తి, నిచ్ఛితే భాతరా’భయో;

వారేసి కాలే వాసేసుం, గేహం తం ఏకథుణికే.

౪. రఞ్ఞో చ సిరిగబ్భేన, తస్స ద్వారమకారయుం;

అన్తో ఠపేసుం ఏకఞ్చ, దాసిం నరసతం బహి.

౫. రూపేను’మ్మాదయీ నరే, దిట్ఠమత్తావ సాయతో;

తతో ఉమ్మాదచిత్తా’తి, నామం సోపపదం లభి.

౬. సుత్వాన లంకాగమనం, భద్దకచ్చానదేవియా;

మాతరా చోదితా పుత్తా, ఠపేత్వే’కఞ్చ ఆగముం.

౭. దిస్వాన తే పణ్డువాసు-దేవం లఙ్కిన్దమాగతా;

దిస్వాన తం కనిట్ఠిఞ్చ, రోదిత్వా సహ తాయ చ.

౮. రఞ్ఞా సుకతసక్కారా, రఞ్ఞో’నుఞ్ఞాయ చారికం;

చరింసు లంకాదీపమ్హి, నివసుఞ్చ యథారుచిం.

౯. రామేన వుసితఠానం, రామగోణన్తి వుచ్చతి;

ఉరువేలా’నురాధానం, నివాసా చ తథా తథా.

౧౦. తథా విజితదీఘాయు-రోహణానం నివాసకా;

విజితగామో దీఘాయు-రోహణన్తి చ వుచ్చతి.

౧౧. కారేసి అనురాధో సో, వాపిం దక్ఖిణతో తతో;

కారాపేత్వా రాజగేహం, తత్థ వాసమకప్పయీ.

౧౨. మహారాజా పణ్డువాసు-దేవో జట్ఠసుతం సకం;

అభయం ఉపరజ్జమ్హి, కాలే సమభిసేచయి.

౧౩. దీఘాయుస్స కుమారస్స, తనయో దీఘగామణి;

సుత్వా ఉమ్మాదచిత్తం తం, తస్సం జాతకుతూహలో.

౧౪. గహేత్వా’పతిస్స గామం, తం అపస్సి మనుజాధిపం;

అదా సహోపరాజేన, రాజుపట్ఠానమస్ససో.

౧౫. గవక్ఖాభిముఖట్ఠానే, తం ఉపేచ్చ ఠితం తుసా;

దిస్వాన గామిణిం చిత్తా, రత్తచిత్తా’హ దాసికం.

౧౬. ‘‘కో ఏసో’’తి తతో సుత్వా,

మాతులస్స సుతోఇతి;

దాసిం తత్థ నియోజేసి,

సద్ధింకత్వాన సో తతో.

౧౭. గవక్ఖమ్హి డసాపేత్వా, రత్తిం కక్కటయన్తకం;

ఆరుయ్హ ఛిన్దయిత్వాన, కవాటం తేన పావిసి.

౧౮. తాయ సద్ధిం వసిత్వాన, పచ్చూసేయేవ నిక్ఖమి;

ఏవం నిచ్చం వసీ తత్థ, ఛిద్దాభావా అపాకటో.

౧౯. సా తేన అగ్గహీ గబ్భం, గబ్భే పరిణతే తతో;

మాతు ఆరోచయీ దాసీ, మాతా పుచ్ఛియ ధీతరం.

౨౦. రఞ్ఞో ఆరోచయీ రాజా, అమన్తేత్వా సుతే’బ్రహ్మా;

పోసియోసో’పి అమ్హేహి, దేవ తస్సేవ తం ఇతి.

౨౧. పుత్తో చే మారయిస్సామ, త’న్తి తస్స అదంసు తం;

సా సూతికాలసమ్పత్తే, సూతి గేహఞ్చ పావిసిం.

౨౨. సఙ్కిత్వా గోపకం చిత్తం, కాలవేలఞ్చ దాసకం;

తస్మిం కమ్మే నిస్సాయా’తి, గామణి పరిచారకే.

౨౩. తే పటిఞ్ఞం అదేన్తే తే, రాజపుత్తా అఘాతయుం;

యక్ఖా హుత్వాన రక్ఖింసు, ఉభో గబ్భే కుమారకం.

౨౪. అఞ్ఞం ఉపవిజఞ్ఞం సా, సల్లక్ఖా పేసి దాసియా;

చిత్తా సా జనయీ పుత్తం, సా ఇత్థి పన ధీతరం.

౨౫. చిత్తం సహస్సం దాపేత్వా, తస్సా పుత్తం సకమ్పి చ;

ఆణాపేత్వా ధీతరం తం, నిపజ్జాపేసి సన్తికే.

౨౬. ధీతా లద్ధా’తి సుత్వాన, తుట్ఠా రాజసుతా అహుం;

మాతా చ మాతుమాతా చ, ఉభో పన కుమారకం.

౨౭. మాతామహస్స నామఞ్చ, జేట్ఠస్స మాతులస్స చ;

ఏకం కత్వా తమకరుం, పణ్డుకాభయనామకం.

౨౮. లంకా పాలో పణ్డువాసు-దేవో రజ్జమకారయి;

తింస వస్సమ్హి జాతమ్హి, మతో సో పణ్డుకాభయే.

౨౯. తస్మిం మతస్మిం మనుజాధిపస్మిం,

సబ్బే సమాగమ్మ నరిన్దపుత్తా;

తస్సాభయస్సాభయదస్స భాతు,

రాజాభిసేకం అకరుం ఉళారాతి.

సుజనప్పసాద సంవేగత్థాయ కతే మహావంసే

అభయాభిసేకో నామ

నవమో పరిచ్ఛేదో.