పఞ్ఞాసతిమ పరిచ్ఛేద

ద్విరాజకోనామ

౧. తతో రజ్జే పతిట్ఠాయ, కస్సపో దక్ఖిణం దిసం;

అదా కస్సపనామస్స, యువరాజస్స ధీమతో.

౨. అగ్గాభిసేకం దాపేసి, యువరాజస్స ధీతుయా;

రాజకఞ్ఞాయ తిస్సాయ, భరియాయే’వ అత్తనో.

౩. యాచకానఞ్చ సిప్పీనం, ఆగతానం తతో తతో;

దానం దణ్డిస్సరం నామ, సదా దాపేసి భూపతి.

౪. ఆదిపాదో మహిన్దో సో,

వసన్తో రోహణే తదా;

గహేతుం రాజినోరట్ఠ-

మాదాయ బలమాగతో.

౫. తం సుత్వా కుపితో రాజా, బలం పేసేసి అత్తనో;

యుజ్ఝిత్వా తం పరాజేసి, మహిన్దో సో మహాభటో.

౬. తతో రాజా నివత్తేతుం, పితరం తస్స పేసయి;

కస్సపం యువరాజం తం, సో గన్త్వా పుత్తసన్తికం.

౭. నానాధమ్మకథోపేతం, వత్వా యుత్తిమనేకధా;

సఙ్ఘామతో నివత్తేత్వా, పుత్తం సో పునరాగమి.

౮. ఆదిపాదో తు సో పచ్ఛా, ఘాతేత్వా మణ్డలాధిపే;

కుద్ధేజనపదే దిస్వా, అగమాసి పురన్తికం.

౯. భిక్ఖుసఙ్ఘో తమానేత్వా, దస్సేసి వసుధాధిపం;

దత్వా సో ధీతరం తస్సా, పేసేసి పున రోహణం.

౧౦. నీహరిత్వాన దుస్సీలే, నికాయత్తయవాసీసు;

గాహాపేసి నవే భిక్ఖూ, ఆవాసే తత్థ తత్థ సో.

౧౧. ద్వయాభిసేకజాతేన, ఆదిపాదేన సునునా;

మహావిహారే బోధిమ్హి, పంసుం వడ్ఢేసి పూజయం.

౧౨. అకాసి చ నికాయేసు, తీసు బిమ్బే సిలామయే;

సోవణ్ణయే రంసిజాలే, ఛత్తం చూళామణిం తథా.

౧౩. అభయగిరివిహారమ్హి, పాసాదం సకనామకం;

కత్వా తత్థ నివాసేత్వా, భిక్ఖు గామమదాపయి.

౧౪. మహియఙ్గణవిహారస్మిం, గామం సో చేతియస్స’దా;

సవత్థం పటిమాభత్తం, సబ్బభిక్ఖూన దాపయి.

౧౫. థలే జలే చ సత్తానం, అదాసి అభయం తదా;

చారిత్తపుబ్బరాజూనం, పరిపాలేసి సబ్బదా.

౧౬. తస్స సేనాపతి సేనో, ఇలఙ్గోరాజవంసజో;

థేరియానం అకా’వాసం; థూపారామస్స పచ్ఛతో.

౧౭. ధమ్మారుచికభిక్ఖూనం, ధమ్మారామమకారయి;

తథా సాగలికానఞ్చ, కస్సపసేననామకం.

౧౮. హదయుణ్హాభిధానం సో, కత్వా చేతియపబ్బతే;

పరివేణం అదాధమ్మ-రుచికానఞ్చ భిక్ఖూనం.

౧౯. ఆరామికానం భిక్ఖూనం, ఆరామేసు తహిం తహిం;

ఏకమేకం కుటిం కత్వా, దాపేసి చ చమూపతి.

౨౦. రత్తమాలగిరిస్మిం సో, కత్వా రమ్మం తరం సుభం;

కుచిం అదా సాసనస్స, సామికానం తపస్సినం.

౨౧. మహావిహారే కారేత్వా, పవివేణం వరం అదా;

పంసుకూలికభిక్ఖూనం, సముద్దగిరినామకం.

౨౨. వాసం అరఞ్ఞే కారేత్వా, అత్తనో వంసనామకం;

మహావిహారే భిక్ఖూనం, వనే నివాసతం అదా.

౨౩. విహారేసూ చ జిణ్ణేసు, నవకమ్మమకారయి;

దాపేసి అగ్గలం సబ్బ-భిక్ఖూనం జిణ్ణచీవరే.

౨౪. తిస్సారామం కరిత్వాన, భిక్ఖూనీనముపస్సయం;

మరిచవట్టిమహాబోధి, పరిహారే నివేసయి.

౨౫. అనురాధపురే చేవ, పులత్థినగరేపి చ;

ఉపసగ్గరోగనాసాయ, వేజ్జసాలాపి కారయి.

౨౬. అత్తనా కతవాసనం, భోగగామే చ దాపయి;

తథారామికగామే చ, పటిమాభరణఞ్చ సో.

౨౭. భేసజ్జగేహం కారేసి, నగరే తత్థ తత్థ సో;

పంసుకూలికభిక్ఖూనం, భత్తం వత్థఞ్చ దాపయి.

౨౮. ఖన్ధీకతే అమోచేసి, తిరచ్ఛానగతే బహూ;

కపణానఞ్చ దాపేసి, మహాదానం చమూపతి.

౨౯. విచిత్తం బ్యఞ్జనం భత్తం, యాగుం వివిధఖజ్జకం;

కత్వా సూకరరూపఞ్చ, గుళం భిక్ఖూనం దాపయి.

౩౦. ఏవామాదీని పుఞ్ఞాని, కత్వా సేనాయ నాయకో;

సేనో కిత్తిన్దుపాదేహి, సబ్బా ఓభాసయీ దిసా.

౩౧. తస్సేవ ఞాతకో కత్వా, నాయకో రక్ఖసవ్హయో;

సవారకమ్హి గామమ్హి, విహారం సుమనోహరం.

౩౨. మహావిహారవాసీనం, సారానం పటిపత్తియా;

భిక్ఖూనం సో అదా సాధు, ఠపేత్వా వత్తముత్తమం.

౩౩. సేనో నామ మహాలేఖో, మహాలేఖకపబ్బతం;

మహావిహారే కారేసి, భిక్ఖూనం వాసముత్తమం.

౩౪. చోళరాజాభిధానో, చ, అమచ్చో తస్స రాజినో;

పరివేణం అకారమ్మం, నట్ఠం తం సుప్పతిట్ఠితం.

౩౫. రాజా తీసు నికాయేసు, రూపకమ్మమనోరమం;

మణ్డపాని విచిత్తాని, వేజయన్తో పమాని చ.

౩౬. కారేత్వా ధాతుపూజాయో, కత్వా జనమనోహరా;

యథా కమ్మం గతో ఠత్వా, వస్సాని దససత్త చ.

౩౭. ద్వయాభిసేకసఞ్జాతో, యువరాజాథ కస్సపో;

ఆసి లద్ధాభిసేకో సో, లంకారజ్జేకమాగతే.

౩౮. సద్ధో ఆగతమగ్గోవ, సాభిఞ్ఞో వియ పఞ్ఞవా;

వత్తా సో మరమన్తివ, చాగవా ధనదో వియ.

౩౯. బహుస్సుతో ధమ్మకథీ, సబ్బసిప్పవిసారదో;

యుత్తాయుత్తవిచారాయ, నిపుణో నయకోవిదో.

౪౦. అచలో ఇన్దలీలో’వ, ఠితో సుగతసాసనే;

పరప్పవాదివాతేహి, సబ్బేహి’పి అకమ్పియో.

౪౧. మాయాసాఠేయ్యమానాది, పాపానఞ్చ అగోచరో;

గుణానం ఆకరో సబ్బ-రతనానం వసాగరో.

౪౨. భూమిచన్దో నరిన్దో సో, వంసే జాతస్స అత్తనో;

దప్పుళస్సాదీపాదస్స, యువరాజపదం అదా.

౪౩. రజ్జం దసహి ధమ్మేహి, చతుసఙ్గహవత్థూహి;

కరోన్తో పరిపాలేసి, లోకం నేత్తంవ అత్తనో.

౪౪. సో ధేత్వా సాసనం సబ్బం, ధమ్మకమ్మేన సత్థునో;

గహేత్వా నవకే భిక్ఖూ, అకాసా’వాసపూరణం.

౪౫. దుట్ఠగామణిరాజేన, కతం మరిచవట్టికం;

నట్ఠం విహారం కారేత్వా, నానాఆవాస భూసితం.

౪౬. థేరవంసజభిక్ఖూనం, అదా కత్వా మహామహం;

తేసం పఞ్చసతానఞ్చ, భోగగామే చ దాపయి.

౪౭. తత్థ సో తుసితే రమ్మే, దేవసఙ్ఘపురక్ఖతం;

మేత్తేయ్యం లోకనాథం తం, దేసేన్తం ధమ్మముత్తమం.

౪౮. దస్సేన్తో వియ లోకస్స, విహారే సబ్బసజ్జితే;

నిసిన్నో మణ్డపే రమ్మే, నానారతనభూసితే.

౪౯. నగరేహి చ సబ్బేహి, భిక్ఖూహి పరివారితో;

బుద్ధలిలాయ లంకిన్దో, అభిధమ్మ మభాసయి.

౫౦. సోణ్ణపట్టే లిఖాపేత్వా-భిధమ్మపిటకం తదా;

ధమ్మసఙ్గణికం పోత్థం, నానారతన భూసితం.

౫౧. కత్వా నగరమజ్ఝమ్హి, కారేత్వా హేమముత్తమం;

తం తత్థ ఠపయిత్వాన, పరిహారమదాపయి.

౫౨. సక్కసేనాపతిట్ఠానం, దత్వా పుత్తస్స అత్తనో;

పరిహారే నియోజేసి, తత్థ తం ధమ్మపోత్థకే.

౫౩. అనుసంవచ్ఛరం రాజా, పురం దేవపురీ వియ;

విభూసితాయ సేనాయ, సజ్జేత్వా పరివారితో.

౫౪. దేవరాజావ సోభన్తో, సబ్బాభరణభూసితో;

హత్థిఖణ్డే నిసీదిత్వా, చరన్తో పురవీథియం.

౫౫. మహతా పరిహారేన, నేత్వా తం ధమ్మసఙ్గహం;

అత్తనా కారితం రమ్మం, విహారం సబ్బసజ్జితం.

౫౬. తత్థ ధాతుగతే రమ్మే, నానారతనభూసితే;

మణ్డపే ధాతుపిఠస్మిం, పతిట్ఠాపియ పూజయి.

౫౭. గన్థాకరపరివేణం, మహామేఘవనే అకా;

నగరే వజ్జసాలా చ, తేసం గామే చ దాపయి.

౫౮. భణ్డికపరివేణఞ్చ, సిలామేఘఞ్చ పబ్బతం;

కత్వా’భయగిరిస్మిం సో, తేసం గామమదాపయి.

౫౯. జోతివనవిహారస్మిం, రాజా లఙ్కాయ నాయకో;

భత్తగ్గస్స అదా గామం, తథా’భయగిరిమ్హి చ.

౬౦. దక్ఖిణగిరినామస్స, విహారస్స చ దాపయి;

గామం కతఞ్ఞుభావేన, రాజా పరమధమ్మికో.

౬౧. సక్కసేనాపతి రమ్మం, పరివేణం సుమాపియ;

అదాసి సహగామేహి, థేరియానం సనామికం.

౬౨. భరియా వజిరా తస్స, తేసంయేవ అదాపయి;

పరివేణం కరిత్వాన, సగామం సకనామకం.

౬౩. ఉపస్సయం కరిత్వాన, సా ఏవ పదలఞ్ఛనే;

భిక్ఖూనీనం అదా థేర-వంసే సబ్బత్థ పూజితే.

౬౪. సక్కసేనాపతి మాతా, దేవా’రఞ్ఞక భిక్ఖూనం;

థేరవంసప్పదీపానం, అకా’వాసం సనామకం.

౬౫. సా ఏవ పటిబిమ్బస్స, సత్థు మరిచవట్టియం;

చూళామణిం పాదజలం, అకా ఛత్తఞ్చ చీవరం.

౬౬. రాజా రాజాలయేయేవ, రాజవంసం సనామకం;

అకాసి పాళికం నామ, పాసాదం సుమనో హరం.

౬౭. పూజేసి రాజినీ నామ, రాజినో భరియా’పరా;

పట్టకఞ్చుకపూజాయ, హేమమాలిక చేతియం.

౬౮. తస్సా పుత్తోసి సిద్ధత్థో, నామ ఇస్సరియే ఠితో;

సుతో మలయరాజాతి, రూపేన మకరద్ధజో.

౬౯. రాజా తస్మిం మతే కత్వా, సాలం భిక్ఖునముత్తమం;

దానవట్టం పట్ఠపేత్వా, తస్స పత్తిమదా తదా.

౭౦. ఏవం ధమ్మేన కారేన్తే, రజ్జం లఙ్కాదీపే తదా;

చోళరాజేన యుజ్ఝిత్వా, పణ్డురాజా పరాజితో.

౭౧. పణ్ణాకారాని నేకాని, బలం సన్ధాయ పేసయి;

రాజాలంకిస్సరో సద్ధిం, మన్తేత్వా సచివేహి సో.

౭౨. సన్నయ్హ బలకాయం సో, సక్కసేనాపతిం సకం;

బలస్స నాయకం కత్వా, మహాయిత్థముపాగమి.

౭౩. విజయం పుబ్బరాజూనం, వత్వా వేలాతటే ఠితో;

ఉస్సాహం జనయిత్వాన, నావం ఆరోపయీ బలం.