పఞ్చచత్తాలీసతిమ పరిచ్ఛేద
౧. రఞ్ఞో తస్సచ్చయే రాజా, మాణవమ్మో అహోసి సో;
కిం గోత్తో కస్స పుత్తో చ, కథం రజ్జమపాపుణి.
౨. మహాసమ్మతవంసమ్హి, జాతో జాతిగుణావహో;
పుత్తో కస్సపనామస్స, థూపారామస్స భేదినో.
౩. ధీతా మలయరాజస్స, సఙ్ఘనామస్స రాజినో;
తం లభిత్వా వసం దేసే, ఉత్తరే లీనవుత్తికో.
౪. హత్థదాఠనరిన్దేన, తస్మిం అత్థేవ ధారితే;
జమ్బుదీపముపాగమ్మ, నరసీహం మహీపతి.
౫. గన్త్వా వత్వా సకం నామం, సేవితుం తముపక్కమి;
ఆరాధేసి చ సబ్బేహి, పయోగేహి నరాధీపం.
౬. విదిత్వా తస్స సోహజ్జం, నేత్వా భరియమత్తనో;
వాసం తత్థేవ కప్పేసి, సేవమానో దివానిసం.
౭. సోపి ఆరాధితో తేన, కణ్డువేట్ఠి నరుత్తమో;
సబ్బం నేన్తోవ తం రజ్జం, మహాభోగమదాపయి.
౮. తేన సంవాసమన్వాయ, భరియా సఙ్ఘనామికా;
చతస్సో ధీతరో పుత్తే, చత్తారోపి విజాయథ.
౯. అథేకదివసం రాజా, హత్థిక్ఖన్ధవరం గతో;
సఞ్చరన్తో యథాకామం, మాణవమ్మేన ఏకతో.
౧౦. నాళికేరం పివిత్వాన, తత్రట్ఠోవ పిపాసితో;
మాణవమ్మస్స పాదాసి, మఞ్ఞన్తో అఞ్ఞమేవ తం.
౧౧. సో తం గహేత్వా చిన్తేసి, సఖం పేస నరాధిపో;
ఉచ్ఛిట్ఠం నామ కిం హోతి, సత్తానం పరమత్థతో.
౧౨. తస్మా యుత్తం మయాపాతు-మీతి చిన్తియ తం పివి;
ఏవం హోన్తి మహుస్సాహా, దేతుకామాహి బుద్ధినో.
౧౩. రాజాపి దిస్వా తం భీతో, తస్సపీ తావ సేసకం;
సయం పివి తథాహోతి, కమ్మం పుఞ్ఞవతం సదా.
౧౪. ఠపేసి సకవేసేవ, తతో పట్ఠాయ అత్తనో;
భోజనే సయనే చేవ, పరిహారే చ వాహనే.
౧౫. ఏవం తేసు వసన్తేసు, యుద్ధత్థాయముపక్కమి;
వల్లభో నరసీహేన, నరసీహో విచిన్తయి.
౧౬. అయం ఖో మమ సేవాయ, రజ్జం వంస గతం సకం;
లభిస్సామీతి సేవేతి, రత్తిం దివ మతన్దితో.
౧౭. సచే సోపి మయా గన్త్వా, యుజ్ఝన్తో మరణం గతో;
తక్కితం తస్స మయ్హఞ్చ, సబ్బం తమఫలం భవే.
౧౮. ఏవం చిన్తియతం రాజా, నివత్తేత్వా సకే పురే;
సయం వల్లభరాజేన, కాతుం సఙ్గామమారసి.
౧౯. మాణవమ్మోపి చిన్తేసి, సచే’యం మయి జీవితి;
రాజా మీయతి యుద్ధమ్హి, కిం ఫలం మమ జీవితే.
౨౦. విస్సాసో దుక్కతో తేన, భవిస్సతి తథాసతి;
సఙ్గహేసి కిమత్థం మం, సమానత్తేన అత్తనో.
౨౧. తస్మా యుత్తం మయా గన్తుం, సహసఙ్గామ మణ్డలం;
సుఖఞ్హి సద్ధిం తేనేత్థ, జీవితం మరణంపి వా.
౨౨. ఏవం చిన్తియ సన్నద్ధ-బలో హత్థివరం గతో;
గన్త్వా దస్సేసి అత్తానం, సో తం సఙ్గామ మణ్డలే.
౨౩. నరసీహోవ తం దిస్వా, హట్ఠతుట్ఠో సముగ్గిరి;
సహో సన్థవమేతస్మిం, కత్తబ్బం మే కతం ఇతి.
౨౪. తతో మానస్స సేనా చ, సేనా చేవస్సరాజినో;
సేనం వల్లభరాజస్స, విద్ధంసేసి సమాగతా.
౨౫. మాణవమ్మోపి దస్సేసి, తహిం సురత్తమత్తనో;
పరక్కమన్తో దేవానం, రణే నారాయణో వియ.
౨౬. నరసీతోపి సన్తుట్ఠో, మాణవమ్మస్స విక్కమే;
ఆలిఙ్గత్వా సినేహేన, త్వం ఖో మే జయదో ఇతి.
౨౭. అత్తనో పురమాగమ్మ, కత్వా విజయమఙ్గలం;
మాణవమ్మస్స సేనాయ, కత్తబ్బం సబ్బమాచరి.
౨౮. అథేవం చిన్తయి రాజా, కత్తబ్బం మే సహాయకో;
అత్తనా’కాసి సబ్బఞ్చ, అనణో సో మమజ్జతో.
౨౯. ఇణం మమాపి సోధేమి, కత్వా కత్తబ్బమత్తనా;
కత్తఞ్ఞూ కతవేదీహి, పురిసా’తీవదుల్లభా.
౩౦. అమచ్చే సన్నిపాతేత్వా, ఇదం వచనమబ్రవి;
సహాయస్స మమేతస్స, కమ్మే తుమ్హేపి సక్ఖినో.
౩౧. మయాపి తస్స కత్తబ్బం, కమ్మం సాధు సుఖావహం;
ఉపకారో హి సాధూనం, ధమ్మో పుబ్బోపకారినో.
౩౨. ఏవం వుత్తే అమచ్చా తే, పచ్చాహంసు మహీపతి;
యం యమిచ్ఛతి దేవోహి, తం తం రుచ్చతి నో ఇతి.
౩౩. అథ సో మాణవమ్మస్స, సేనం దత్వా సవాహనం;
సబ్బోపకరణఞ్చేవ, సబ్బకమ్మకరేపి చ.
౩౪. గచ్ఛాతి వత్వా తం యన్తం, సహసేనాయపేక్ఖియ;
పరిదేవిత్థ భూమిన్దో, విప్పవుత్థం’వ పుత్తకం.
౩౫. మాణవమ్మోపి ఆరుయ్హ, నావాయో జలధీతటే;
న చిరేనేవ ఆగమ్మ, సమత్తిక్కమ్మ వేగసా.
౩౬. సహ సేనాయ మద్దన్థో, లఙ్కాదీపముపవిసీ;
తం సుత్వాన పలాయిత్థ, రాజా దాఠోపతిస్సకో.
౩౭. మాణవమ్మో పురం గన్త్వా, అహుత్వావ నరాధిపో;
పలాతమనుబన్ధిత్థ, పదానుపదముగతో.
౩౮. తదా సా దమిళి సేనా, అస్సోసి కిర సామికో;
మహారోగా’భిభూతోతి, సుత్వా తం సా అపక్కమి.
౩౯. సుత్వా దాఠోపతిస్సో తం, సమాదాయ మహాబలం;
మాణవమ్మం ఉపాగమ్మ, కాతుమారభి సంయుధం.
౪౦. మాణవమ్మో చ చిన్తేసి, సబ్బా సేనా గతా మమ;
మతే మయి సమిజ్ఝేయ్య, వేరినో మే మనోరథం.
౪౧. జమ్బుదీపంవ తస్మా’హం, గన్త్వా’దాస బలం తతో;
పున రజ్జం గహేస్సంతి, తస్మా ఏవమకాసి సో.
౪౨. గన్త్వా పున’పి దిస్వాన, సహాయం నరసీహకం;
ఆరాధహన్తో నిపుణం, సక్కచ్చం తముపట్ఠహి.
౪౩. యావ రాజచతుక్కంసో, మాణామ్మో తహిం వసి;
నరసీహో’థ చిన్తేసి, మానత్థద్ధో యసోధనో.
౪౪. రజ్జత్థం మే సహా యో మం, సేవన్తోయేవ అద్ధగో;
వుద్ధో హేస్సతి తం పస్సం, కథం రజ్జం కరోమహం.
౪౫. ఇమస్మిం పన వారస్మిం, పేసయిత్వా బలం మమ;
రజ్జం తం న గహేస్సామి, కో అత్థో జీవితేన మే.
౪౬. ఏవం చిన్తియ సో సేనం, సన్నిపాతియ అత్తనో;
సన్నాహేత్వా యథా యోగం, దాపేత్వాన యథారుచిం.
౪౭. సయమేవ తమాదాయ, సముద్దతటమాగతో;
నావాయో చిత్తరూపాయో, కారయిత్వా థిరా బహూ.
౪౮. అమచ్చే ఆహ ‘‘ఏతేన, సద్ధిం గచ్ఛథ భో’’ఇతి;
నావం ఆరోహితుం సబ్బే, న ఇచ్ఛింసు తదా జనా.
౪౯. తదా సీహో విచిన్తేత్వా, సయం హుత్వా తిరోహితో;
అత్తనో పరిహారం సో, రాజలక్ఖణసమ్మతం.
౫౦. సబ్బం తస్సేవ దత్వాన, అలఙ్కారమ్పి అత్తనో;
ఆరోపేత్వాన తం నావం, గచ్ఛ ఠత్వాన సాగరే.
౫౧. ఇమం భేరించ వాదేహి, కోట్ఠనామన్తి యోజయీ;
సో’పి సబ్బం తథాకాసి, రాజానో అగమా ఇతి.
౫౨. ఆరుహింసు జనా నావం, ఏకం కత్వా నరాధిపం;
సో తం సేనఙ్గమాదాయ, మాణో గన్తుం సమారభి.
౫౩. కేవలో’పి సముద్దో సో, అహోభి నగరూపమో;
అథ సో పట్టనం పత్వా, ఓతరిత్వా సవాహనో.
౫౪. విస్సామేత్వా బలం తత్థ, వసం కతిపయే దినే;
ఉత్తరం దేసమాదాయ, కత్వా హత్థగతం జనం.
౫౫. అక్ఖోబ్భియ మహాసేనో, నగరం గన్తుమారభి;
పోత్థకుట్ఠోపి తం సుత్వా, పచ్చుగ్గఞ్ఛి మహాబలో.
౫౬. సంగచ్ఛింసు ఉభో సేనా, భిన్నవేలా’వ సాగరా;
మాణవమ్మో తతో హత్థి-మారుయ్హ గహితాయుధో.
౫౭. పోత్థకుట్ఠఞ్చ రాజానం, ద్వేధా కత్వా పలాపయి;
హత్థదాఠం పలాయన్తం, దిస్వా జనపదా నరా.
౫౮. సీసమస్స గహేత్వాన, మాణవమ్మస్స దస్సయుం;
పోత్థకుట్ఠోపలాయిత్వా, మేరుకన్దరమాగమి.
౫౯. తతో తం సామికో దిస్వా, సహాయో మే అయంచిరం;
తస్మా న సక్కా చడ్డేతుం, ఆపదే సరణాగతం.
౬౦. సామినో చ సహాయస్స, నిద్దోసోహం కథం భవే;
ఇతి చిన్తియ పూవం సో, సవిసం ఖాదియా’మరి.
౬౧. కుట్ఠకోపి చ తేనేవ, ఖాదిత్వా పూవకం మతో;
మాణవమ్మస్స తస్సేవం, దీపో ఆసి అకణ్టకో.
౬౨. మాణవమ్మో తతో దీపే, ఛత్తం ఉస్సాపయి తదా;
వారేన్తో వియ తేనేవ, దుక్ఖం దీపే జనస్స సో.
౬౩. పుఞ్ఞకమ్మాని సో’కాసి, అనగ్ఘాని బహూని చ;
సమత్థో కోహి తం సబ్బం, వత్తుం పటిపదం నరో.
౬౪. కప్పగామవ్హయఞ్చేవ, తథా సేపణ్ణినామకం;
పధానరక్ఖే చ సిరిం, సిరీసఙ్ఘాది బోధికే.
౬౫. పాసాదం సోవ కారేసి, పసాదావహముత్తమో;
ఛాదేసి లోహపాసాదం, థూపారామఘరం తథా.
౬౬. థూపారామే చ పాసాదం కత్వా’దా పంసుకూలినం;
జిణ్ణకం పటిసఙ్ఖాసి ఛత్తం చేతియముద్ధని;
బహవో జిణ్ణకావాసే తత్థేవ పటిసఙ్ఖరి.
[ఏత్థ మాణవమ్మస్స రజ్జకథాయ ఊనతా దిస్సతి. ఇతో పట్ఠాయ అగ్గబోధిస్స రజ్జపటిబద్ధా కథా విర ఖాయతి.]