ఏకూనచత్తాలీసతిమ పరిచ్ఛేద

రాజద్వయదీపనో

౧. తతో కస్సపనామో సో, పాపకో నరపాలకో;

అస్స గో పఞ్చసూదఞ్చ, పేసయిత్వాన భాతికం.

౨. మారాపేతుం అసక్కోన్తో, భీతో సీహగిరిం గతో;

దురారోహం మనుస్సేహి, సోధాపేత్వా సమన్తతో.

౩. పాకారేన పరిక్ఖిప్ప, సీహాకారేన కారయి;

తత్థ నిస్సేణి గేహాని, తేన తం నామకో అహూ.

౪. సంహరిత్వా ధనం తత్థ, నిదహిత్వా సుగోపితం;

అత్తనో నిహితానం సో, రక్ఖం దత్వా తహిం తహిం.

౫. కత్వా రాజఘరం తత్థ, దస్సనేయ్యం మనోరమం;

దుతియాలకమన్దంవ, కువేరోవ తహిం వసి.

౬. మిగారో నామ కారేసి, సేనాపతి సనామకం;

పరివేణం తథాగేహ-మభిసేకజినిస్స చ.

౭. తస్సాభిసేకం యాచిత్వా, సిలాసమ్బుద్ధతో’ధిరం;

అలద్ధాసామి నో రజ్జే, జానిస్సామీతి సణ్ఠహి.

౮. హుత్వా విప్పటిసారీ సో, అత్తనా కతకమ్మనా;

ముచ్చిస్సామి కతం ను’తి, పుఞ్ఞం కాసి అనప్పకం.

౯. మహా వత్థుని కారేసి, ద్వారేసు నగరస్స సో;

అమ్బుయ్యానే చ కారేసి, దీపే యోజన యోజనే.

౧౦. ఇస్సరసమణారామం, కారేత్వా పుబ్బవత్థుతో;

అధికం భోగగామే చ, అధికం తస్స దాపయి.

౧౧. బోధి ఉప్పలవణ్ణా చ, తస్సాసుం ధీతరో దువే;

విహారస్స’స్స కారేసి, నామం తాసఞ్చ అత్తనో.

౧౨. దేన్తే తస్మిం న ఇచ్ఛింసు, సమణా థేరవాదినో;

‘‘పితుఘాతిస్స కమ్మ’’న్తి, లోకగారయ్హ భీరునో.

౧౩. దాతుకామోస తేసం’వ, సమ్బుద్ధ పటిమాయ’దా;

భిక్ఖవే అధివాసేసుం, భోగో నో సత్థునో ఇతి.

౧౪. కథా నియ్యన్తి ఉయ్యానే, సమీపే పబ్బతస్స సో;

కారాపేసి విహారం సో, తేసం నామో తతో అహు.

౧౫. అదా ధమ్మరుచినం తం, సమ్పత్త చతుపచ్చయం;

విహారఞ్చేవ ఉయ్యానం, దిసాభాగమ్హి ఉత్తరే.

౧౬. భత్తం సనీరపక్కం సో, భుఞ్జిత్వా దిన్నమిత్థియా;

సప్పియుత్తం మనుఞ్ఞేహి, సూపేహి అభిసఙ్ఖతం.

౧౭. మనుఞ్ఞమిదమయ్యానం, దస్సమేవన్తి తాదిసం;

భత్తం పాదాసి భిక్ఖూనం, సబ్బేసఞ్చ సచీవరం.

౧౮. ఉపోసథమధిట్ఠాసి, అప్పమఞ్ఞఞ్చ భావయి,

సమాదియి ధుతఙ్గే చ, లిఖాపేసి చ పోత్థకే.

౧౯. పటిమాదాన సాలాదిం, కారాపేసి అనప్పకం;

భితో సో పరలోకమ్హా, మోగ్గల్లానా చ వత్తతి.

౨౦. తతో అట్ఠారసే వస్సే, మోగ్గల్లానో మహాభటో;

ఆదేసేన నిగణ్ఠానం, ద్వాదసగ్గసహాయ వా.

౨౧. జమ్బుదీపా ఇధాగమ్మ, దేసే అమ్బట్ఠకోలకే;

కుళారీ నామే బన్ధిత్థ, విహారే బలసఞ్చయం.

౨౨. రాజా సుత్వా గహేత్వా తం, భఞ్జిస్సామితి నిక్ఖమి;

నేమిత్తేహి న సక్కాతి, వదన్తేపి మహాబలో.

౨౩. మోగ్గల్లానోపి సన్నద్ధ బలో సూరసహాయ వా;

గచ్ఛన్తో సురసఙ్గామం, దేవో వియ సుజమ్పతి.

౨౪. అఞ్ఞమఞ్ఞం ఉపాగమ్మ, భిన్నవేలావ సాగరా;

ఆరభింసు మహాయుద్ధం, బలకాయా ఉభోపి తే.

౨౫. కస్సపో పురతో దిస్వా, మహన్తం కద్దమాసయం;

గన్తుమఞ్ఞేన మగ్గేన, పరివత్తేసి దన్తినం.

౨౬. దిస్వా తం సామికోనో’యం, పలాయతి భణే ఇతి;

బలకాయో పభిజ్జిత్థ, ‘‘దిట్ఠం పిఠ’’న్తి ఘోసయుం.

౨౭. మోగ్గలాన బలారాజా, ఛేత్వా నికరణేన సో;

సీసం ఉక్ఖిపియా’కాసం, ఛురికం కోసియం ఖిపి.

౨౮. కత్వా’ళాహన కిచ్చం సో, తస్స కమ్మే పసీదియ;

సబ్బంసో ధనమాదాయ, ఆగఞ్ఛి నగరం వరం.

౨౯. భిక్ఖూ సుత్వా పవత్తిం తం, సునివత్థా సుపారుతా;

సమ్మజ్జిత్వా విహారఞ్చ, అట్ఠంసు పటిపాటియా.

౩౦. మహామేఘవనం పత్వా, దేవరాజావ నన్దనం;

మహాసేన నివత్తేత్వా, హత్థిపాకారతో బహి.

౩౧. ఉపసఙ్కమ్మ వన్దిత్వా, సఙ్ఘే తస్మిం పసీదియ;

ఛత్తత్తేన సఙ్ఘం పూజేసి, సఙ్ఘో తస్సేవ తం అదా.

౩౨. తం ఠానం ఛత్తవడ్ఢీతి, వోహరింసు తహిం కతం;

పరివేణమ్పి తం నామం, అహోసి పురమాగతో.

౩౩. విహారే ద్వేపి గన్త్వాన, సఙ్ఘం తత్థా’భివన్దియ;

పాపుణిత్వా మహారజ్జం, లోకం ధమ్మేన పాలయి.

౩౪. కుద్ధో నీహరి దాఠంసో, ఘాతకం పితునో మమ;

అనువత్తిత్వా మచ్చాతి, తేన రక్ఖస నామ వా.

౩౫. అతిరేకసహస్సం సో, అమచ్చానం వినాసయి;

కణ్ణనాసాది ఛేదేసి, పబ్బాజేసి తథా బహూ.

౩౬. తతో సుత్వాన సద్ధమ్మ-ముపసన్నో సుమానసో;

మహాదానం పవత్తేసి, మేఘో వియ మహీతలే.

౩౭. ఫుస్సపుణ్ణమీయం దాన-మనువస్సం పవత్తయి;

తతో పట్ఠాయ తం దానం, దీపే అజ్జాపి వత్తతి.

౩౮. సోపి సారథికో లాజ-దాయకో పితురాజినో;

ఆనేత్వా పితుసన్దే సం, మోగ్గల్లానస్స దస్సయి.

౩౯. తం దిస్వా పరిదేవిత్వా, పితునో పేమ మత్తనీ;

వణ్ణేత్వా తస్స పాదాసి, ద్వారనాయకతం విభూ.

౪౦. సేనాపతి మిగారోహి, నివేదేత్వా యథా విధిం;

అభిసేక జినస్సా’కా, అభిసేకం యథారుచిం.

౪౧. సీహా’చలే దళ్హనామం, దాఠా కోణ్డఞ్ఞకమ్పి చ;

విహారం ధమ్మరుచినం, సాగలినఞ్చ దాపయి.

౪౨. పబ్బతన్తు విహారంసో, కత్వా థేరస్స దాపయి;

మహానామసనామస్స, దీఘసణ్డ విహారకే.

౪౩. రాజినినామకఞ్చేవ, కత్వా భిక్ఖునుపస్సయం;

అదా సాగలికానం సో, భిక్ఖునీనం మహామతి.

౪౪. లమ్బకణ్ణకగోత్తోపి, దాఠా పభుతి నామకో;

కస్సపస్స ఉపఠానే, కోచి నిబ్బిన్న మానసో.

౪౫. గన్తా మే రేలియం వగ్గం,

వాసం తత్థేవ కప్పయి;

అహోసి పుత్తో తస్సేకో,

సిలాకా లోతి పిస్సుతో.

౪౬. సోపి కస్సపతో భీతో, ఞాతకేన సహ’త్తనో;

మోగ్గల్లానేన గన్త్వాన, జమ్బుదీపతలం ఇతో.

౪౭. బోధిపణ్డవిహారమ్పి, పబ్బజ్జం సముపాగతో;

కరోన్తో సఙ్ఘకిచ్చాని, సాదరో సో సుపేసలో.

౪౮. అమ్మం సఙ్ఘస్స పాదాసి, సఙ్ఘో తస్మిం పసీదియ;

ఆహ’మ్బ సామణేరో’తి, తేన తం నామకో అహు.

౪౯. సో కేసధాతువంసమ్హి, వుత్తేన విధినా తతో;

కేసధాతుం లభిత్వాన, తస్స రజ్జే ఇధా’నయి.

౫౦. తస్స కత్వాన సక్కారం, గహేత్వా కేస ధాతుయో;

మహగ్ఘే నిదహిత్వాన, కరణ్డే ఫలికుమ్భవ్హే.

౫౧. దీపఙ్కరస్స నాథస్స, పటిమాయ ఘరే వరే;

వడ్ఢేత్వా పరిహారేన, మహాపూజం పవత్తయి.

౫౨. మాతులం భరియఞ్చ’స్స, కత్వా సోవణ్ణయం తహిం;

ఠపేసి పటిమాయో చ, అస్స బిమ్బఞ్చ చారుకం.

౫౩. కేసధాతుకరణ్డఞ్చ, ఛత్తం రతనమణ్డపం;

సావకగ్గయుంగం వాళ-బీజనిఞ్చ సకారయి.

౫౪. పరిహారఞ్చ తస్స’దా, రాజా అధికమత్తనో;

సిలాకాళ మసిగ్గాహం, కత్వా రక్ఖాయ యోజయి.

౫౫. అసిగ్గాహసిలాకాళో, ఇతి తేనా’సి విస్సుతో;

భగినిఞ్చ’స్స పాదాసి, సద్ధిం భోగేన భూమిపో.

౫౬. వుత్తో’యమతి సఙ్ఖేపో, విత్థారో పన సబ్బసో;

కేసధాతుకవంసమ్హా, గహేతబ్బో విభావినా.

౫౭. బన్ధిత్వా సాగరా రక్ఖం, దీపఞ్చ కాసినిబ్భయం;

ధమ్మకమ్మన సోధేసి, సధమ్మం జినసాసనం.

౫౮. సేనాపతిస నామం’కా, పధానఘర ముత్తరో;

కత్వా’ట్ఠారసమే వస్సే, సో పుఞ్ఞాని ఖయం గతో.

౫౯. కస్సపతో జితో అతిబలి పుఞ్ఞక్ఖయే సఙ్ఖతే;

జేతుం నో విసహిత్థ మచ్చుముపగం సో యేవదాసోవియ;

తస్మా మచ్చుబలం నిహచ్చ సుఖినో హేస్సన్తి మేధావినో;

నిబ్బానం పరమచ్చుతం సివపదం పత్తబ్బమత్తఞ్ఞునా.

సుజనప్పసాద సంవేగత్థాయ కతే మహావంసే

రాజద్వయదీపనో నామ

ఏకూనచత్తాలీసతిమో పరిచ్ఛేదో.