సత్తతింసతిమ పరిచ్ఛేద

పఞ్చరాజకో

౧. జేట్ఠతిస్సచ్చయే తస్స, మహాసేనో కనిట్ఠకో;

సత్తవీసతివస్సాని, రాజా రజ్జమకారయి.

౨. తస్స రజ్జాభిసేకం తం,

కారేతుం పరతీరతో;

సో సఙ్ఘమిత్తత్థేరో తు,

కాలం ఞత్వా ఇధాగతో.

౩. తస్సాభిసేకం కారేత్వా, అఞ్ఞం కిచ్చఞ్చనేకధా;

మహావిహార విద్ధంసం, కాతుకామో అసఞ్ఞతో.

౪. అవినయవాదినో ఏతే, మహావిహారవాసినో;

వినయవాదీ మయం రాజ, ఇతి గాహియ భూపభిం.

౫. మహావిహారవాసిస్స, ఆహారం దేతి భిక్ఖునో;

యో సో సతం దణ్డియో’తి, రఞ్ఞా దణ్డం ఠపాపయి.

౬. ఉపద్దుతా తేహి భిక్ఖూ, మహావిహారవాసినో;

మహావిహారం ఛడ్డేత్వా, మలయం రోహణం అగుం.

౭. తేన మహావిహారో’యం, నవవస్సాని ఛడ్డితో;

మహావిహారవాసీహి, భిక్ఖూహి ఆసి సుఞ్ఞకో.

౮. ‘‘హోతి అస్సామికం వత్థు, పుతువిసామినో’’ఇతి;

రాజానం సఞ్ఞాపేత్వా సో, థేరో దుమ్మతి దుమ్మతిం.

౯. మహావిహారం నాసేతుం, లద్ధానుమతి రాజతో;

తథా కాతుం మనుస్సే సో, యోజేసి దుట్ఠమానసో.

౧౦. సఙ్ఘమిత్తస్స థేరస్స, సేవకో రాజవల్లభో;

సోణామచ్చో దారణో చ, భిక్ఖవో చ అలజ్జినో.

౧౧. భిన్దిత్వా లోహపాసాదం, సత్తభూమక ముత్తమం;

ఘరే నానప్పకారే చ, ఇతో’భయగిరిం నయుం.

౧౨. మహావిహారా నీతేహి, పాసాదేహి బహూహి చ;

అభయగిరివిహారోయం, బహుపాసాదకో అహు.

౧౩. సఙ్ఘమిత్తం పాపమిత్తం, థేరం సోణఞ్చ సేవకం;

ఆగమ్మ సుబహుం పాపం, అకాసి సో మహీపతి.

౧౪. మహాసిలాపటిమం సో, పాచినతిస్సపబ్బతా;

ఆనేత్వా’భయగిరిమ్హి, పతిట్ఠాపేసి భూపతి.

౧౫. పటిమాఘరం బోధిఘరం, ధాతుసాలం మనోరమం;

చతుసాలఞ్చ కారేసీ, సఙ్ఖరీ కుక్కుటవ్హయం.

౧౬. సఙ్ఘమిత్తేన థేరేన, తేన దారుణకమ్మునా;

విహారో సో’భయగిరి, దస్సనేయ్యో అహు తదా.

౧౭. మేఘవణ్ణాభయో నామ, రఞ్ఞో సబ్బత్థ సాఖకో;

సఖా అమచ్చో కుజ్ఝిత్వా, మహావిహారనాసనే.

౧౮. చోరో హుత్వాన మలయం, గన్త్వా లద్ధమహబ్బలో;

ఖన్ధావారం నివేసేసి, దురతిస్సకవాపియం.

౧౯. తత్రా’గతం తం సుత్వా, సహాయం సో మహీపతి;

యుద్ధాహ పచ్చుగ్గన్త్వాన, ఖన్ధావారం నివేసయి.

౨౦. సాధుం పానఞ్చ మంసఞ్చ, లభిత్వా మలయాగతం;

‘‘న సేవిస్సం సహాయేన, వినా రఞ్ఞా’’తి చిన్తియ.

౨౧. ఆదాయ తం సయంయేవ, రత్తిం నిక్ఖమ్మ ఏకకో;

రఞ్ఞో సన్తికమాగమ్మ, తమత్థం పటివేదయి.

౨౨. తేనా’భతం తేన సహ, విస్సత్థో పరిభుఞ్జియ;

‘‘కస్మా చోరో అహు మే త్వం, ‘‘ఇతి రాజా అపుచ్ఛితం.

౨౩. ‘‘తయా మహావిహారస్స, నాసితత్తా’’తి అబ్రువి;

‘‘విహారం వాసయిస్సామి, ఖేమమేతం మమచ్చయం.

౨౪. ఇచ్ఛేవ మబ్రవీ రాజా, రాజానం సో ఖమాపయి;

తేన సఞ్ఞాపితో రాజా, నగరంయేవ ఆగమి.

౨౫. రాజానం సఞ్ఞపేత్వా సో, మేఘవణ్ణాభయో పన;

రఞ్ఞా సహ న ఆగఞ్ఛి, దబ్బసమ్భారకారణా.

౨౬. వలభా భరియా రఞ్ఞో, ఏకం లేఖకధీతికా;

మహావిహారనాసమ్హి, దుక్ఖితం తం వినాసకం.

౨౭. థేరం మారాపయి కుద్ధా, సంగహేత్వాన వడ్ఢకిం;

థూపారామం వినాసేతుం, ఆగతం దుట్ఠమానసం.

౨౮. మారాపేత్వా సఙ్ఘమిత్త-త్థేరం దారుణకారకం;

సోణామచ్చదారణఞ్చ, ఘాతయింసు అసఞ్ఞకా.

౨౯. ఆనేత్వా దబ్బసమ్భారం, మేఘవణ్ణాభయో తు సో;

మహావిహారేనేకాని, పరివేణాని కారయి.

౩౦. అభయేనభయో తస్మిం, వూపసన్తే తు భిక్ఖవో;

మహావిహారం వాసేసుం, ఆగన్త్వాన తతో తతో.

౩౧. రాజా మహాబోధిఘరే, పచ్ఛిమాయ దిసాయ తు;

కారేత్వా లోహరూపాని, ఠపాపేసి దువే తు సో.

౩౨. దక్ఖిణారామవాసిమ్హి, కుహకే జిమ్హమానసే;

పసీదిత్వా పాపమిత్తే, తిస్సత్థేరే అసఞ్ఞతే.

౩౩. మహావిహారసీమన్తే, ఉయ్యానే జోతినామకే;

జేతవనవిహారం సో, వారయన్తోపి కారయి.

౩౪. తతో సీమం సముగ్ఘాతుం, భిక్ఖుసఙ్ఘమయాచిసో;

అదాతుకామా తం భిక్ఖూ, విహారమ్హా అపక్కముం.

౩౫. ఇధ సీమాసముగ్ఘాతం, పరేహి కరియమానకం;

కోపేతుం భిక్ఖవో కేచి, నిలీయింసు తహిం తహిం.

౩౬. మహావిహారో నవమాసే, ఏవం భిక్ఖూహి వజ్జితో;

‘‘సముగ్ఘాతం కరిమ్హా’’తి-పరే భిక్ఖూ అమఞ్ఞిసుం.

౩౭. తతో సీమాసముగ్ఘాతే, బ్యాపారే పరినిట్ఠితే;

మహావిహారం వాసేసుం, ఇధాగన్త్వాన భిక్ఖవో.

౩౮. తస్స విహారగాహిస్స, తిస్సత్థేరస్స చోదనా;

అన్తిమవత్థునా ఆసి, భూతత్థం సఙ్ఘమజ్ఝగా.

౩౯. వినిచ్ఛియ మహామచ్చో, తథా ధమ్మికసమ్మతో;

ఉప్పబ్బాజేసి ధమ్మేన, తం అనిచ్ఛాయ రాజినో.

౪౦. సోయేవ రాజా కారేసి, విహారం మణిహీరకం;

తయో విహారే కారేసి, దేవాలయం వినాసియ.

౪౧. గోకణ్ణం ఏరకాపిల్లం, కలన్దబ్రాహ్మణగామకే;

మిగగామవిహారఞ్చ, గఙ్గసేనకపబ్బతం.

౪౨. పచ్ఛిమాయ దిసాయాథ, ధాతుసేనఞ్చ పబ్బతం;

రాజా మహావిహారఞ్చ, కోకవాతమ్హి కారయి.

౪౩. రూపారమ్మవిహారఞ్చ, చూళవిట్టఞ్చ కారయి;

ఉత్తరాభయసవ్హే చ, దువే భిక్ఖూనుపస్సయే.

౪౪. కాలవేళకయక్ఖస్స, ఠానే థూపఞ్చ కారయి;

దీపమ్హి జిణ్ణకావాసే, బహూ చ పటిసఙ్ఖరి.

౪౫. సఙ్ఘత్థేరసహస్సస్స, సహస్సగ్ఘమదాసి సో;

థేరదానఞ్చ సబ్బేసం, అనువస్సఞ్చ చీవరం.

౪౬. అన్నపానాదిదానస్స, పరిచ్ఛేదో న విజ్జతి;

సుభిక్ఖత్థాయ కారేసి, సో’వ సోళస వాపియో.

౪౭. మణిహీరమహావాపిం, జల్లురం ఖాణునామకం;

మహామణిం కోకవాతం, మోరకపరకవాపికం.

౪౮. కుబ్బాహకం వాహకఞ్చ, రత్తమాలకణ్డకమ్పి చ;

తిస్సవడ్ఢమానకఞ్చ, వేళఙ్గవిట్ఠికమ్పి చ.

౪౯. మహాగల్లచీరవాపిం, మహాదారగల్లకమ్పి చ;

కాళపాసాణవాపిఞ్చ, ఇమా సోళస వాపియో.

౫౦. గఙ్గాయ పబ్బవవ్హంసో, మహామాతిఞ్చ కారయి;

ఏవం పుఞ్ఞమపుఞ్ఞఞ్చ, సుబహుం సో ఉపాచినీతి.

౫౧. అసాధుసఙ్గమేనేవం, యావజీవం సుభాసుభం;

కత్వా గతో యథాకమ్మం, సో మహాసేనభూపతి.

౫౨. తస్మా అసాధుసంసగ్గం, ఆరకా పరివజ్జియ;

అహిం వా’సి విసం ఖిప్పం, కరేయ్య’త్థహితం బుధో.

౫౩. అహు రాజా సిరిమేఘ-వణ్ణో తస్స సుతో తతో;

వన్ధాతా వియ లోకస్స, సబ్బసమ్పత్తిదాయకో.

౫౪. మహాసేనేన పాపానం, వసగేన వినాసితే;

మహావిహారే సబ్బేపి, సన్నిపాతియ భిక్ఖవో.

౫౫. ఉపసఙ్కమ్మ వన్దిత్వా, నిసిన్నో పుచ్ఛి సాదరో;

‘‘పితరా సఙ్ఘమిత్తస్స, సహాయేన వినాసితం.

౫౬. కిం కిమేవా’’తి ఆహంసు, భిక్ఖవో తం నరిస్సరం;

‘‘సీమాయుగ్ఘాటనం కాతుం, వాయమిత్వాపి తే పితా.

౫౭. నాసక్ఖి అన్తోసీమాయం, భిక్ఖూనం విజ్జమానతో;

భూమిగబ్భనిలీనాహి, సత్తాసుం ఏత్థ భిక్ఖవో.

౫౮. అమచ్చో సోణామచ్చో చ, సఙ్ఘమిత్తో చ పాపియో;

రాజానం సఞ్ఞాపేత్వాన, అపుఞ్ఞం తేన కారయుం.

౫౯. భిన్దిత్వా లోహపాసాదం, సత్తభూమకముత్తమం;

ఘరే నానప్పకారే చ, ఇతో’భయగిరిం నయుం.

౬౦. మాసకే చతుబుద్ధేహి, నివుత్థే చేతియఙ్గణే;

వపాపేసుఞ్చ దుప్పఞ్ఞా, పస్స బాలసమాగమం’’.

౬౧. తం సుత్వా పితుకమ్మం సో, నిబ్బిన్నో బాలసఙ్గమే;

పితరా నాసితం తత్థ, సబ్బం పాకతికం అకా.

౬౨. లోహపాసాదమగదో’వ, కాసి పాసాదముత్తమం;

రఞ్ఞో మహాపనాదస్స, దస్సేన్తో వియ భూతలే.

౬౩. పరివేణాని సబ్బాని, నాసితాని నివేసయి;

భోగే ఆరామికానఞ్చ, యథాఠానే ఠపేసి సో.

౬౪. పితరా పచ్చయానఞ్చ, పచ్ఛిన్నత్తా విబుద్ధినా;

ఛిద్దావాసం ఘనావాసం, విహారం’కాసి బుద్ధిమా.

౬౫. కారితే పితరా జోతి వనేచే’సో విహారకే;

కమ్మం విప్పకతం సబ్బం, నిట్ఠాపేసి నరిస్సరో.

౬౬. థేరస్సా’థ మహిన్దస్స, సమణిన్దస్స సునునో;

సుత్వాన మనుజిన్దో సో, పవత్తిం సబ్బమాదితో.

౬౭. పసీదిత్వా గుణే తస్స, రాజా దిప్పపసాదకే;

‘‘ఇస్సరో వత దీపస్స, థేరో’’ ఇతి విచిన్తియ.

౬౮. పటిబిమ్బం సువణ్ణస్స, కత్వా తమ్మాణ నిస్సితం;

పుబ్బకత్తికమాసస్స, పబ్బపక్ఖే తు సత్తమే.

౬౯. దినే నేత్వా చేతియమ్బ-థలే థేరమ్బసఞ్ఞితే;

తత్రట్ఠమే నివాసేత్వా, తతో తు నవమే పన.

౭౦. మహాసేనం గహేత్వా సో, దేవసేనా సమూపమం;

ఓరోధే నగరే చేవ, గేహరక్ఖణకే వినా.

౭౧. లంకాదీపే చ సకలే, సబ్బే ఆదాయ భిక్ఖవో;

విస్సజ్జేత్వా మనుస్సే చ, నగరే చారకట్ఠితే.

౭౨. పట్ఠపేత్వా మహాదానం, అయఞ్చాఖిలపాణినం;

పూజం సబ్బోపహారేహి, కరోన్తో చ అనూపమం.

౭౩. పచ్చుగ్గమనమేతస్స, దీపసత్థుస్స సత్థునో;

వరపుత్తస్స సో కత్వా, దేవరాజా’వ సత్థునో.