ద్వత్తింసతిమ పరిచ్ఛేద

తుసితపురగమనం

౧. అనిట్ఠితే ఛత్తకమ్మే, సుధాకమ్మే చ చేతియే;

మారణన్తికరోగేన, రాజా ఆసి గిలానకో.

౨. తిస్సం పక్కోసయిత్వా సో, కనిట్ఠం దీఘవాపితో;

‘‘థూపే అనిట్ఠితం కమ్మం, నిట్ఠాపేహీతి అబ్రవి.

౩. భాతునో దుబ్బలత్తాసో, తున్నవాయేహి కారియ;

కఞ్చుకం సుద్ధవత్థేహి, తేన ఛాదియ చేతియం.

౪. చిత్తకారేహి కారేసి, వేదికం తత్థ సాధుకం;

పన్తిపుణ్ణఘటానఞ్చ, పఞ్చఙ్గులకపన్తికం.

౫. ఛత్తాకారేహి కారేసి, ఛత్తం వేళుమయం తథా;

ఖరపత్తమయే చన్ద-సూరియే ముద్ధవేదియం.

౬. లాఖాకుఙ్కుమకేహే’తం, చిత్తయిత్వా సుచిత్తితం;

రఞ్ఞో నివేదయి’’థూపే, కత్తబ్బం నిట్ఠితం’’ఇతి.

౭. సివికాయ నిపజ్జిత్వా, ఇధాగన్త్వా మహీపతి;

పదక్ఖిణం కరిత్వాన, సివికాయే’వ చేతియం.

౮. వన్దిత్వా దక్ఖిణద్వారే, సయనే భూమిసన్థతే;

సయిత్వా దక్ఖిణపస్సేన, సో మహాథూప ముత్తమం.

౯. సయిత్వా వామపస్సేస, లోహపాసాద ముత్తమం;

పస్సన్తో సుమనో ఆసి, భిక్ఖుసఙ్ఘపురేక్ఖతో.

౧౦. గిలానపుచ్ఛనత్థాయ, ఆగతాహి తతో తతో;

ఛన్నవుతికోటియో భిక్ఖూ, తస్మిం ఆసుం సమాగమే.

౧౧. గణసజ్ఝాయమకరుం, వగ్గబన్ధేన భిక్ఖవో;

థేరపుత్తాభయం థేరం, తత్థా’దిస్వా మహీపతి.

౧౨. అట్ఠవీస మహాయుద్ధం, యుజ్ఝన్తో అపరాజయం;

యో సో న పచ్చుదావత్తో, మహాయోధో వసీ మమ.

౧౩. మచ్చుయుద్ధమ్హి సమ్పత్తే, దిస్వా మఞ్ఞే పరాజయం;

ఇదాని సో మం నో పేతి, థేరో థేరపుత్తభయో.

౧౪. ఇతి చిన్తయి సోథేరో, జానిత్వా తస్స చిన్తితం;

కరిన్దనదియా సిసే, వసం పఞ్జలిపబ్బతే.

౧౫. పఞ్చఖీణాసవసత-పరివారేన ఇద్ధియా;

నభసాగమ్మ రాజానం, అట్ఠాసి పరివారియ.

౧౬. రాజా దిస్వా పసన్నో తం, పురతో చ నిసీదియ;

తుమ్హే దసమహాయోధే, గణ్హిత్వాన పురే అహం.

౧౭. యుజ్ఝిం ఇదాని ఏకో’వ, మచ్చునా యుద్ధమారభిం;

మచ్చుసత్తుం పరాజేతుం, న సక్కోమీ’’తి ఆహ చ.

౧౮. ఆహ థేరో ‘‘మహారాజ-మా భాయి మనుజాధిప;

కిలేససత్తుం అజిత్వా, అజేయ్యో మచ్చుసత్తుకో.

౧౯. సబ్బమ్పి సఙ్ఖారగతం, అవస్సంయేవ భిజ్జతి;

‘‘అనిచ్చా సబ్బసఙ్ఖారా’’, ఇతి వుత్తంహి సత్థునా.

౨౦. లజ్జా సారజ్జరహితా, బుద్ధేపే’తి అనిచ్చతా;

తస్మా అనిచ్చా సఙ్ఖారా, దుక్ఖా’నత్తాతి చిన్తయ.

౨౧. దుతియే అత్తాభావేపి, ధమ్మచ్ఛన్దో మహాహితే;

ఉపట్ఠితే దేవలోకే, హిత్వా దిబ్బం సుఖం తువం.

౨౨. ఇధాగమ్మ బహుం పుఞ్ఞం, అకాసి చ అనేకధా;

కరణమ్పేకరజ్జస్స, సాసనుజ్జోతనాయతే.

౨౩. మహాపుఞ్ఞకతం పుఞ్ఞం, యావజ్జదివసా తయా;

సబ్బంనుస్సరమేవం తే, సుఖం సజ్జు భవిస్సతి.

౨౪. థేరస్సవచనం సుత్వా, రాజా అత్తమనో అహు;

‘‘అవస్సయో మచ్చుయుద్ధేపి, త్వం మే సీ’’తి అభాసితం.

౨౫. తదా చ ఆహరాపేత్వా, పహట్ఠో పుఞ్ఞ పోత్థకం;

వాచేతుం లేఖకం ఆహ, సో తం వాచేసి పోత్థకం.

౨౬. ఏకూనసతవిహారా, మహారాజేన కారితా;

ఏకూనవీసకోటీహి, విహారో మరిచ వట్టి చ.

౨౭. ఉత్తమో లోహపాసాదో,

తింసకోటీహి కారితో;

మహాథూపే అనగ్ఘాని,

కారితా చతువీసతి.

౨౮. మహాథూపమ్హి సేసాని, కారితాని సుబుద్ధినా;

కోటిసహస్సం అగ్ఘన్తి, మహారాజా’’తి వాచయి.

౨౯. ‘‘కోట్ఠనామమ్హి మలయే, అక్ఖక్ఖాయిక ఛాతకే;

కుణ్డలాని మహగ్ఘాని, దువే దత్వాన గణ్హియ.

౩౦. ఖీణాసవానం పఞ్చన్నం, మహాథేరాన ముత్తమో;

దిన్నో పసన్నచిత్తేన, కఙ్గుఅమ్బిలపిణ్డకో.

౩౧. చూళఙ్గనియ యుద్ధమ్హి, పరాజిత్వా పలాయతా;

కాలం ఘోసాపయిత్వాన, ఆగతస్స విహాయసా.

౩౨. ఖీణాసవస్స యతినో, అత్తానమనపేక్ఖియ;

దిన్నం సరకభత్త’న్తి, వుత్తే ఆహ మహీపతి.

౩౩. విహారమహసత్తాహే, పాసాదస్స మహేతథా;

థూపారమ్భే తు సత్తాహే, తథా ధాతునిధానకే.

౩౪. చాతుద్దిసస్స ఉభతో, సఙ్ఘస్స ఉభతో మయా;

మహారహం మహాదానం, అవిసేసం పవత్తితం.

౩౫. మహావేసాఖపూజా చ, చతువీసతి కారయి;

దీపే సఙ్ఘస్స తిక్ఖత్తుం, తిచీవరమదాపయి.

౩౬. సత్తసత్త దినానేవ, దీపే రజ్జమహం ఇమం;

పఞ్చక్ఖత్తుం సాసనమ్హి, అదాసిం హట్ఠమానసో.

౩౭. సతతం ద్వాదసఠానే, సప్పినా సుద్ధవట్టియా;

దీపసహస్సం జాలేసిం, పూజేన్తో సుగతం అహం.

౩౮. నిచ్చం అట్ఠారసఠానే, వజ్జేహి విహితం అహం;

గిలాన భత్తభేసజ్జం, గిలానానమదాపయిం.

౩౯. చతుత్తాలీసఠానమ్హి, సఙ్ఖతం మధుపాయసం;

తత్తకేస్వేవ ఠానేసు, తేలుల్లోపకమేవ చ.

౪౦. ఘతే పక్కే మహాజాల, పూవే ఠానమ్హి తత్తకే;

తథేవ సహ భత్తేహి, నిచ్చ ఏమవ అదాపయిం.

౪౧. ఉపోసథేసు దివసేసు, మాసే మాసే చ అట్ఠసు;

లంకాదీపే విహారేసు, దీప తేలమదాపయిం.

౪౨. ధమ్మదానం మహన్తన్తి, సుత్వా అమిసదానతో;

లోహ పాసాదతో హేట్ఠా, సఙ్ఘమజ్ఝమ్హి ఆసనే.

౪౩. ‘‘ఓసారేస్సామి సఙ్ఘస్స, మఙ్గలసుత్త’’మిచ్చహం;

నిసిన్నో ఓసారయితుం, నాసక్ఖిం సఙ్ఘగారవా.

౪౪. తతోప్పభుతి లంకాయ, విహారేసు తహిం తహిం;

ధమ్మకథం కథాపేసిం, సక్కరిత్వాన దేసకే.

౪౫. ధమ్మకథిక స్సేకస్స, సప్పిఫాణితసక్ఖరం;

నాళిం నాళిమదాపేసిం, దాపేసిం చతురఙ్గులం.

౪౬. ముట్ఠికం యట్ఠిమధుకం, దాపేసిం సాటకద్వయం;

సబ్బంపిస్సరియే దానం, నమే హాసేసి మానసం.

౪౭. జీవితం అనపేక్ఖిత్వా, దుగ్గతేన సతా మయా;

దిన్న దాన ద్వయంయేవ, తం మే హాసేసి మానసం.

౪౮. తం సుత్వా అభయో థేరో, తం దానద్వయమేవ సో;

రఞ్ఞో చిత్తప్పసాదత్థం, సం వణ్ణేసి అనేకధా.

౪౯. తేసు పఞ్చసు థేరేసు, కఙ్గుఅమ్బిలగాహకో;

మలియ దేవ మహాథేరో, సుమనకూటమ్హి పబ్బతే.

౫౦. నవన్నం భిక్ఖుసతానం, దత్వా తం పరిభుఞ్జి సో;

పథవీచాలకో ధమ్మ, సుత్తథేరో తు తం పన.

౫౧. కల్యాణికవిహారమ్హి, భిక్ఖూనం సంవిభాజియ;

దసద్ధస తసఙ్ఖానం, పరిభోగ మకాసయం.

౫౨. తలఙ్గర వాసికో ధమ్మ, దిన్నత్థేరో పియఙ్గుకే;

దీపే దససహస్సానం, దత్వాన పరిభుఞ్జితం.

౫౩. మఙ్గణవాసికో ఖుద్ద, తిస్సత్థేరో మహిద్ధికో;

కేలాసే సట్ఠిసహస్సానం, దత్వాన పరిభుఞ్జి తం.

౫౪. మహాబ్యగ్ఘో చ థేరో తం, ఉక్కనగరవిహారకే;

దత్వా సతానం సత్తానం, పరిభోగమకాసయం.

౫౫. సరకభత్తగాహీ తు, థేరో పియఙ్గుదీపకే;

ద్వాదస భిక్ఖుసహస్సానం, దత్వాన పరిభుఞ్జితం.

౫౬. ఇతి వత్వా’భయత్థేరో, రఞ్ఞో హాసేసి మానసం;

రాజా చిత్తం పసాదేత్వా, తం థేరం ఇధ మబ్రువి.

౫౭. ‘‘చతువీసతివస్సాని, సఙ్ఘస్స ఉపకారకో;

అహ మేవం హోతు కాయో’పి, సఙ్ఘస్స ఉపకారకో.

౫౮. మహాథూప దస్సనఠానే, సఙ్ఘస్స కమ్మమాళకే;

సరీరం సఙ్ఘదాసస్స, తుమ్హే ఝాపేథ మే’’ఇతి.

౫౯. కనిట్ఠం ఆహ ‘‘భో తిస్స, మహాథూపే అనిట్ఠితం;

నిట్ఠాపేహి తువం సబ్బం, కమ్మం సక్కచ్చ సాధుకం.

౬౦. సాయం పాతో చ పుప్ఫాని, మహాథూపమ్హి పూజయ;

తిక్ఖత్తుం ఉపహారఞ్చ, మహాథూపస్స కారయ.

౬౧. పటియాదితఞ్చ యం వత్తం, మయా సుగత సాసనే;

సబ్బం అపరిహాపేత్వా, తాత వత్తయ తం తువం.

౬౨. సఙ్ఘస్స తాత కిచ్చేసు, మా పమజ్జిత్థ సబ్బదా’’;

ఇతం తం అనుసాసిత్వా, తుణ్హీ ఆసి మహీపతి.

౬౩. తఙ్ఖణం గణసజ్ఝాయం, భిక్ఖుసఙ్ఘో అకాసి చ;

దేవతా ఛ రథే చేవ, ఛహి దేవేహి ఆనయుం.

౬౪. యాచుం విసుం విసుం దేవా, రాజానం తే రథే ఠితా;

‘‘అమ్హాకం దేవలోకం త్వం, ఏహి రాజమనోరమం’’.

౬౫. రాజా తేసం వచో సుత్వా, ‘‘యావ ధమ్మం సుణోమహం;

అధివాసేథ తావా’’తి, హత్థాకారేన వారయి.

౬౬. వారేతి గణసజ్ఝాయ, మీభి మన్త్వాన భిక్ఖవో;

సజ్ఝాయం ఠపయుం రాజా, పుచ్ఛితం ఠానకారణం.

౬౭. ‘‘ఆగమేథా’’తి సఞ్ఞాయ, దిన్నత్తా’తి వదింసు తే;

రాజా ‘‘నేతం తథా భన్తే’’, ఇతి వత్వాన తం వది.

౬౮. తం సుత్వాన జనా కేచి, ‘‘భీతో మచ్చుభయా అయం;

లాలప్పతీ’’తి మఞ్ఞింసు, తేసం కఙ్ఖావినోదనం.

౬౯. కారేతుం అభయత్థేరో, రాజానం ఏవమాహ సో;

‘‘జానాపేతుం కథం సక్కా, ఆనీతా తే రథా’’ఇతి.

౭౦. పుప్ఫదానం ఖిపాపేసి, రాజ నభసి పణ్డితో;

తాని లగ్గాని లమ్బింసు, రథీసాసు విసుం విసుం.

౭౧. ఆకాసే లమ్బమానాని, తాని దిస్వా మహాజనో;

కఙ్ఖం పటివినోదేసి, రాజా థేరమభాసితం.

౭౨. ‘‘కతమో దేవలోకో హి,

రమ్మో భన్తే’’తి సో బ్రువి;

‘‘తుసినానం పురం రాజ,

రమ్మం’’ఇతి సతం మతం.