ఏకూనతింసతిమ పరిచ్ఛేద

థూపారమ్భో

౧. ఏవం సమత్తే సమ్భారే, వేసాఖపుణ్ణమాసీయం;

పత్తే విసాఖనక్ఖత్తే, మహాథూపత్థమారభి.

౨. హారేత్వాన తహిం థూపం, థూపఠానమఖాణయి;

సత్థహత్థో మహీపాలో, థిరీ కాతుం మనేకధా.

౩. యోధేహి ఆహరాపేత్వా, గుళపాసాణకే తహిం;

కూటేహి ఆహనాపేత్వా, పాసాణే చుణ్ణితే అథ.

౪. చమ్మవనద్ధ పాదేహి, మహాహత్థీహి మద్దయి;

భూమియా థిరీభావత్థం, అత్థానత్థవిచక్ఖణో.

౫. ఆకాస గఙ్గాపతిత-ట్ఠానే సతతతిన్తకే;

మత్తికా సుఖుమా తత్థ, సమన్తా తిం సయోజనే.

౬. నవనీత మత్తికా’తేసా, సుఖుమత్తా పపుచ్చతి;

ఖీణాసవా సామణేరా, మత్తికా ఆహరుం తతో.

౭. మత్తికా అత్థరాపేసి, తత్థ పాసాణకోట్టిమే;

ఇట్ఠకా అత్థరాపేసి, మత్తికో పరిఇస్సరో.

౮. తస్సో పరిఖరసుధం, కురువిన్దం తతోపరి;

తస్సో పరిఅయోజాలం, మరుమ్బన్తు తతోపరం.

౯. ఆహటం సామణేరేహి, హిమవన్తా సుగన్ధకం;

సన్థరాపేసి భూమిన్దో, ఫళికన్తు తతోపరి.

౧౦. సీలాయో సన్థరాపేసిచ్ఛ ఫళికసన్థరో పరి;

సబ్బత్థ మత్తికాకిచ్చే, నవనీతవ్హయా అహు.

౧౧. నియ్యాసేన కపిట్ఠస్స, సన్నితేన రసోదకే;

అట్ఠఙ్గులం బహలఏతా, లోహపట్టం సీలోపరి.

౧౨. మనోసిలాయతిలతే-లసన్నితాయ తతో పరి;

సత్తఙ్గులం సజ్జుపట్టం, సన్థరేసి రథేసభో.

౧౩. మహాథూప పతిట్ఠాన-ఠానే ఏవం మహీపతి;

కారేత్వా పరికమ్మాని, విప్పసన్నేన చేతసా.

౧౪. ఆసళ్హీ సుక్కపక్ఖస్స, దివసమ్హి చతుద్దసే;

కారేత్వా భిక్ఖుసఙ్ఘస్స, సన్నిపాతమిదం వది.

౧౫. మహాచేతియ మత్థాయ, భదన్తామఙ్గలిట్ఠకం;

పతిట్ఠాపేస్సం స్వే ఏత్థ, సబ్బో సఙ్ఘో సమేతునో.

౧౬. బుద్ధ పూజా పయోగేన, మహాజనహీతత్థికో;

‘‘మహాజనో’ పోసథికో, గన్ధమాలాదిగణ్హియ.

౧౭. మహాథూప పతిట్ఠాన-ఠానం యాతు సువే’’ఇతి;

చేతియ ఠాన భూసాయ, అమచ్చే చ నియోజయి.

౧౮. ఆణాపితా నరిన్దేన, మునినో పియగారవా;

అనేకేహి పకారేహి, తే తం ఠానమలఙ్కరుం.

౧౯. నగరం సకలఞ్చేవ, మగ్గఞ్చేవ ఇధాగతం;

అనేకేహి పకారేహి, అలఙ్కారయి భూపతి.

౨౦. పభాతే చ చతుద్వారే, నగరస్స ఠపాపయి;

నహాపితే నహాపకే చ, అప్పకే చ బహూతథా.

౨౧. వత్థాని గన్ధమాలా చ, అన్నాని మధురాని చ;

మహాజనత్థం భూమిన్దో, మహాజనహితే రతో.

౨౨. పటియత్తాని ఏతాని, సాదియిత్వా యథారుచి;

పోరాజానపదాచేవ థూపఠానముపాగముం.

౨౩. సుమణ్డితేహి నేకేహి, ఠానన్తర విధానతో;

ఆరక్ఖితో అమచ్చేహి, యథాఠానం మహీపతి.

౨౪. సుమణ్డితాహి నేకాహి, దేవకఞ్ఞూపమాహి చ;

నాటకీహి పరిబ్బుళ్హో, సుమణ్డిత పస్సాధితో.

౨౫. చత్తాలీస సహస్సేహి, నరేహి పరివారితో;

నానా తూరియ సఙ్ఘుట్ఠో, దేవరాజ విలాసవా.

౨౬. మహాథూప పతిట్ఠానం, ఠానాఠాన విచక్ఖణో;

అపరణ్హే ఉపాగఞ్ఛి, నన్దయన్తో మహాజనం.

౨౭. అట్ఠుత్తరసహస్సం సో, సాటకానిట్ఠపాపియ;

పుటబద్ధాని మజ్ఝమ్హి, చతుపస్సే తతో పన.

౨౮. వత్థాని రాసీంకారేసి, అనేకాని మహీపతి;

మధుసప్పి గుళాదీహి చ, మఙ్గలత్థం ఠపాపయి.

౨౯. నానాదేసేహిపా’గఞ్ఛుం, బహవో భిక్ఖవో ఇధ;

ఇధ దీపట్ఠసఙ్ఘస్స, కా కథావ ఇధాగమే.

౩౦. థేరో’ సీతి సహస్సాని, భిక్ఖూ ఆదాయ ఆగమా;

రాజగహస్స సామన్తా, ఇన్దగుత్తో మహాగణీ.

౩౧. సహస్సాని’సిపతనా, భిక్ఖూనం ద్వాదసా’దియ;

ధమ్మసేనో మహాథేరో, చేతియఠానమాగమా.

౩౨. సట్ఠిభిక్ఖుసహస్సాని, ఆదాయ ఇధమాగమా;

పీయదస్సీ మహాథేరో, జేతారామ విహారతో.

౩౩. వేసాలీ మహావనతో, థేరోరు బుద్ధరక్ఖితో;

అట్ఠారస సహస్సాని, భిక్ఖూ ఆదాయ ఆగమా.

౩౪. కోసమ్బీ ఘోసితారామా, థేరోరు ధమ్మరక్ఖితో;

తింసభిక్ఖుసహస్సాని, ఆదాయ ఇధ ఆగమా.

౩౫. ఆదాయుజ్జేనీయం థేరో, దక్ఖిణ గిరితో యతి;

చత్తారీస సహస్సాని, అగోరు సఙ్ఘరక్ఖితో.

౩౬. భిక్ఖూనం సతసహస్సం, సట్ఠసహస్సాని చా’దియ;

పుప్ఫపురే’సోకరామా, థేరో మిత్తిణ్ణ నామకో.

౩౭. దువే సతసహస్సాని, సహస్సాని అసీతి చ;

భిక్ఖూ గహేత్వాను’త్తిణ్ణో, థేరో కస్మిరమణ్డలా.

౩౮. చత్తారీసత సహస్సాని, సహస్సాని చ సట్ఠి చ;

భిక్ఖూ పల్లవభోగమ్హా, మహాదేవో మహామతీ.

౩౯. యోననగరా’లసన్దాసో, యోన మహాధమ్మరక్ఖితో;

థేరో తింస సహస్సాని, భిక్ఖూ ఆదాయ ఆగమా.

౪౦. వఞ్ఝాటవివత్తనియా, సేనాసనా తు ఉత్తరో;

థేరో సట్ఠిసహస్సాని, భిక్ఖూ ఆదాయ ఆగమా.

౪౧. చిత్తగుత్తో మహాథేరో, బోధిమణ్డవిహారతో;

తింస భిక్ఖుసహస్సాని, ఆదియిత్వా ఇధాగమా.

౪౨. చన్దగుత్తో మహాథేరో, వనవాసపదేసతో;

ఆగాసీతి సహస్సాని, ఆదియిత్వా యతీ ఇధ.

౪౩. సూరియగుత్తోమహాథేరో, కేలాసమ్హా విహారతో;

ఛన్నవుతి సహస్సాని, భిక్ఖూఆదాయ ఆగమా.

౪౪. భిక్ఖూనం దీపవాసినం, ఆగతానఞ్చ సబ్బసో;

గణనాయ పరిచ్ఛేదో, పోరాణేహి న భాసితో.

౪౫. సమాగతానం సబ్బేసం, భిక్ఖునం తం సమాగమే;

వుత్తా ఖీణాసవాయేవ, తే ఛన్నవుతికోటియో.

౪౬. తే మహాచేతియఠానం, పరివారేత్వా యథారహం;

మజ్ఝే ఠపేత్వా ఓకాసం, రఞ్ఞో అట్ఠంసు భిక్ఖవో.

౪౭. పవిసిత్వా తహిం రాజా, భిక్ఖుసఙ్ఘం తథా ఠితం;

దిస్వా పసన్నచిత్తేన, వన్దిత్వా హట్ఠమానసో.

౪౮. గన్ధమాలాహి పూజేత్వా, కత్వాన తిపదక్ఖిణం;

మజ్ఝే పుణ్ణఘటఠానం, పవిసిత్వా సమఙ్గలం.

౪౯. సువణ్ణఖీలే పటిముక్కం, పరిబ్భమనదణ్డకం;

రాజతేన కతం సుద్ధం, సుద్ధపీతి బలోదయో.

౫౦. గాహయిత్వా అమచ్చేన, మణ్డితేన సుజాతినా;

అభిమఙ్గలభూతేన, భూతభూతిపరాయణో.

౫౧. మహన్తం చేతియావట్టం, కారేతుం కతనిచ్ఛయో;

భమాపయితు మారద్ధో, పరికమ్మిత భూమియం.

౫౨. సిద్ధత్థో నామ నామేన, మహాథేరో మహిద్ధికో;

తథాకరోన్తం రాజానం, దీఘదస్సీ నివారయి.

౫౩. ‘‘ఏవం మహన్తం థూపఞ్చ, అయం రాజా’రభిస్సతి;

థూపే అనిట్ఠితేయేవ, మరణం అస్స హేస్సతి.

౫౪. భవిస్సతి మహన్తో చ, థూపోదుప్పటిసఙ్ఖరో;

ఇతి సో నాగతం పస్సం, మహన్తత్తం నివారయి.

౫౫. సఙ్ఘస్స చ అనుఞ్ఞాయ, థేరో సమ్భావనాయచ;

మహన్తం కత్తుకామో’పి, గణ్హిత్వా థేరభాసితం.

౫౬. థేరస్స ఉపదేసేన, తస్స రాజా అకారయి;

మజ్ఝిమం చేతియావట్టం, పతిట్ఠాపేతుమిట్ఠికా.

౫౭. సోవణ్ణరజతే చేవ, ఘటే మజ్ఝేట్ఠపాపయి;

అట్ఠట్ఠ అట్ఠితుస్సాహో, పరివారియ తే పన.

౫౮. అట్ఠుత్తరసహస్సఞ్చ, ఠపాపేసి నవే ఘటే;

అట్ఠుత్తరే అట్ఠుత్తరే, వత్థానం తు సతే పన.

౫౯. ఇట్ఠికాపవరా అట్ఠ, ఠపాపేసి విసుం విసుం;

సమ్మతేన అమచ్చేన, భూసితేన అనేకధా.

౬౦. తతో ఏకం గాహయిత్వా, నానామఙ్గలసఙ్ఖతే;

పురిత్థిమదిసాభాగే, పఠమం మఙ్గలిత్థికం.

౬౧. పతిట్ఠాపేసి సక్కచ్చం, మనుఞ్ఞే గన్ధకద్దమే;

జాతిసుమన పుప్ఫేసు, పూజితేసు తహిం పన.

౬౨. అహోసి పుథవీకమ్పో, సేసా సత్తాపి సత్తహి;

పత్తిట్ఠాపేస’ మచ్చేహి, మఙ్గలాని చ కారయి.

౬౩. ఏవం అసాళ్హమాసస్స, సుక్కపక్ఖే’భిసమ్మతే;

ఉపోసథే పన్నరసే, పతిట్ఠాపేసి ఇట్ఠికా.

౬౪. చతుద్దిసం ఠితే తత్థ, మహాథేరే అనాసవే;

వన్దిత్వా పూజయిత్వా చ, సుప్పతితో కమేన సో.

౬౫. పుబ్బుత్తరం దిసం గన్త్వా, పియదస్సిం అనాసవం;

వన్దిత్వాన మహాథేరం, అట్ఠాసి తస్స సన్తికే.

౬౬. మఙ్గలం తత్థ వడ్ఢేన్తో, తస్స ధమ్మమభాసిసో;

థేరస్స దేసనా తస్స, జనస్సా’హోసి సాత్థికా.

౬౭. చత్తాలీససహస్సానం, ధమ్మాభిసమయో అహు;

చత్తాలీససహస్సానం, సోతాపత్తిఫలం అహు.

౬౮. సహస్సం సకదాగామి, అనాగామి చ తత్తకా;

సహస్సంయేవ అరహన్తో, తత్థ’హేసుం గిహీజనా.

౬౯. అట్ఠారససహస్సాని, భిక్ఖూభిక్ఖునియో పన;

చుద్దసేవ సహస్సాని, అరహత్తే పతిట్ఠయుం.

౭౦. ఏవమ్పపసన్నమతిమా రతనత్తయమ్హి,

చాగామిముత్తమనసాజనతాహి తేన;

లోకత్థసిద్ధి పరమా భవతీతి ఞత్వా,

సద్ధాదినేకగుణయోగ రతిం కరేయ్యాతి.

సుజనప్పసాదసం వేగత్థాయ కతే మహావంసే

థూపారమ్భో నామ

ఏకూనతింసతిమో పరిచ్ఛేదో.