సత్తవీసతిమ పరిచ్ఛేద
లోహపాసాదమహో
౧. తతో రాజా విచిన్తేసి, విస్సుతం సుస్సుతం సుతం;
మహాపఞ్ఞో సదా పుఞ్ఞో, పఞ్ఞాయ కతనిచ్ఛయో.
౨. ‘‘దీపప్పసాదకో థేరో, రాజినో అయ్యకస్స మే;
ఏవం కిరాహనత్తా తే, దుట్ఠగామణిభూపతి.
౩. మహాపుఞ్ఞో మహాథూపం, సోణ్ణమాలిం మనోరమం;
వీసంహత్థసతం ఉచ్చం, కారేస్సతి అనాగతే.
౪. పునో ఉపోసథాగారం, నానారతనమణ్డితం;
నవభూమం కరిత్వాన, లోహపాసాద మేవ చ.
౫. ఇతి చిన్తియ భూమిన్దో, లిఖిత్వేవం ఠపాపితం;
పేక్ఖాపేన్తో రాజగేహే, ఠితం ఏవ కరణ్డకే.
౬. సోవణ్ణపట్టం లద్ధాన, లేఖం తత్థ అవాచయి;
‘‘చత్తాలీససతం వస్సం, అతిక్కమ్మ అనాగతే.
౭. కాకవణ్ణసుతో దుట్ఠ-గామణిమనుజాధిపో;
ఇదఞ్చిదఞ్చ ఏవఞ్చ, కారేస్సతీ’’తి వాచితం.
౮. సుత్వా హట్ఠో ఉదానేత్వా, అప్పోట్ఠేసి మహీపతి;
తతో పాతో’వ గన్త్వాన, మహామేఘవనం సుభం.
౯. సన్నిపాతం కారయిత్వా, భిక్ఖుసఙ్ఘస్స అబ్రవి;
‘‘విమానతుల్యం పాసాదం, కారయిస్సామి వో అహం.
౧౦. దిబ్బం విమానం పేసేత్వా, తదా లేఖం అదాథ మే’’;
భిక్ఖుసఙ్ఘో విసజ్జేసి, అట్ఠ ఖీణాసవే తహిం.
౧౧. కస్సపమునినో కాలే, అసోకో నామ బ్రాహ్మణో;
అట్ఠ సలాకభత్తాని, సఙ్ఘస్స పరిణామియ.
౧౨. భరణిం నామ దాసిం సో, ‘‘నిచ్చం దేహీ’’తి అబ్రవి;
దత్వా సా తాని సక్కచ్చం, యావజీవం తతో చుతా.
౧౩. ఆకాసట్ఠవిమానమ్హి, నిబ్బత్తిరుచిరే సుభే;
అచ్ఛరానం సహస్సేన, సదా’సి పరివారితా.
౧౪. తస్సా రతనపాసాదో, ద్వాదసయోజనుగ్గతో;
యోజనానం పరిక్ఖేపో, చత్తాలీసఞ్చ అట్ఠ చ.
౧౫. కూటాగారసహస్సేన, మణ్డితో నవభూమికో;
సహస్సగబ్భసమ్పన్నో, రాజమానో చతుమ్ముఖో.
౧౬. సహస్ససఙ్ఖసంవుత్తి, సీహపఞ్జర నేత్తవా;
సకిఙ్కణికజాలాయ, సజ్జితో వేదికాయ చ.
౧౭. అమ్బలట్ఠికపాసాదో, తస్స మజ్ఝే ఠితో అహు;
సన్తమతో దిస్సమానో, పగ్గహితధజాకులో.
౧౮. తావతింసఞ్చ గచ్ఛన్తా, దిస్వా థేరం తమేవ తే;
హిఙ్గులేన తదా లేఖం, లేఖయిత్వా పటే తతో.
౧౯. నివత్తిత్వాన ఆగన్త్వా, పటం సఙ్ఘస్స దస్సయుం;
సఙ్ఘో పటం గహేత్వా తం, పాహేసి రాజసన్తికం.
౨౦. తం దిస్వా సుమనో రాజా, ఆగమ్మారామ ముత్తమం;
ఆలేఖతుల్యం కారేసి, లోహపాసాద ముత్తమం.
౨౧. కమ్మారమ్భనకాలేవ, చతుద్వారమ్హి భోగవా;
అట్ఠసతసహస్సాని, హిరఞ్ఞాని ఠపాపయి.
౨౨. పుటసహస్స వత్థాని, ద్వారే ద్వారే ఠపాపయి;
గుళ తేలసక్ఖరమధు-పురా చానేక చాటియో.
౨౩. ‘‘అమూలకకమ్మ మేత్థ, న కాతబ్బ’’న్తి భాసియ;
అగ్ఘాపేత్వా కతం కమ్మం, తేసం మూలమదాపయి.
౨౪. హత్థసతం హత్థసతం, ఆసి ఏకేక పస్సతో;
ఉచ్చతో తత్తకోయేవ, పాసాదో హి చతుమ్ముఖో.
౨౫. తస్మిం పాసాద సేట్ఠస్మిం, అహేసుం నవభూమియో;
ఏకేకిస్సా భూమియా చ, కూటాగారసతాని చ.
౨౬. కూటాగారాని సబ్బాని, సజ్ఝునా ఖచితా న’యుం;
పవాలవేదికా తేసం, నానారతన భూసితా.
౨౭. నానారతన చిత్తాని, తాసం పదుమకాని చ;
సజ్ఝకింకిణికాపన్తి-పరిక్ఖిత్తావ తా అహు.
౨౮. సహస్సం తత్థ పాసాదో, గబ్భా ఆసుం సుసఙ్ఖతా;
నానారతన ఖచితా, సీహపఞ్జరనేత్తవా.
౨౯. నారివాహనయానన్తు, సుత్వా వేస్సవణస్స సో;
తదా కారమకారేసి, మజ్ఝే రతనమణ్డపం.
౩౦. సీహబ్యగ్ఘాదిరూపేహి, దేవతా రూపకేహి చ;
అహు రతనమయోహే’స, థమ్భేహి చ విభూసితో.
౩౧. ముత్తాజాలపరిక్ఖేపో, మణ్డపన్తే సమన్తతో;
పవాలవేదికా చేత్థ, పుబ్బే వుత్తవిధా అహు.
౩౨. సత్తరతన చిత్తస్స, వేమజ్ఝే మణ్డపస్స తు;
రుచిరో దన్తపల్లఙ్కో, రమ్మో ఫలికసన్థరో.
౩౩. దన్తమయాపస్సయే’త్థ, సువణ్ణమయ సూరియో;
సజ్ఝుమయే చన్దిమా చ, తారా చ ముత్తకా మయా.
౩౪. నానారతన పదుమాని, తత్థ తత్థ యథారహం;
జాతకాని చ తత్థేవ, ఆసుం సోణ్ణలతన్తరే.
౩౫. మహగ్ఘపచ్చత్థరణే, పల్లఙ్కే’తి మనోరమే;
మనోహరా’సిట్ఠపితా, రుచిరం దన్తబీజనీ.
౩౬. పవాలపాదుకా తత్థ, ఫలికమ్హి పతిట్ఠితా;
సేతచ్ఛత్తం సజ్ఝుదణ్డం, పల్లఙ్కో’పరిసోభథ.
౩౭. సత్తరతన మయానేత్థ, అట్ఠమఙ్గలికాని చ;
చతుప్పదానం పన్తీ చ, మణిముత్తన్తరా అహుం.
౩౮. రజతానఞ్చ ఘణ్టానం, పన్తీ భత్తన్తలమ్బితా;
పాసాదఛత్తపల్లఙ్క-మణ్డపా’సుం అనగ్ఘికా.
౩౯. మహగ్ఘ పఞ్ఞపాపేసి, మఞ్చపీఠం యథారహం;
తథేవ భూమత్థరణం, కమ్బలఞ్చ మహారహం.
౪౦. ఆచామ కుమ్భిసోవణ్ణా, ఉలుఙ్కో చ అహు తహిం;
పాసాద పరిభోగేసు, సేసేసు చ కథా’ వకా.
౪౧. చారుపాకార పరివారో,
సో చతుద్వారకోట్ఠకో;
పాసాదో’లఙ్కతో సోభి,
తావతింస సభా వియ.
౪౨. తమ్బ లోహిట్ఠకాహే’సో,
పాసాదో ఛాదితో అహు;
లోహ పాసాద వోహారో,
తేన తస్స అజాయథ.
౪౩. నట్ఠితే లోహపాసాదే, సో సఙ్ఘం సన్నిపాతయి;
రాజా సఙ్ఘో సన్నిపతి, మరిచవట్టిమహే వియ.
౪౪. పుథుజ్జనా’వ అట్ఠంసు, భిక్ఖూ పఠమభూమియం;
తేపిటకా దుతియాయ, సోతాపన్నాదయో పన.
౪౫. ఏకే కేయేవ అట్ఠంసు, తతియాదీసు భూమిసు;
అరహన్తో చ అట్ఠంసు, ఉద్ధం చతూసు భూమిసు.
౪౬. సఙ్ఘస్స దత్వా పాసాదం, దక్ఖిణమ్బుపురస్సరం;
రాజా’దత్థ మహాదానం, సత్తాహం పుబ్బకం పియ.
౪౭. పాసాద మహచత్తాని, మహాచాగేన రాజినా;
అనగ్ఘాని ఠపేత్వాన, అహేసుం తింసకోటియో.
౪౮. నిస్సారే ధననిచయే విసేససారం,
యే దానం పరిగణయన్తి సాధుపఞ్ఞా;
తే దానం విపులమపేత చిత్తసఙ్గా,
సత్తానం హితపరమా దదన్తి ఏవంతి.
సుజనప్పసాదసంవేగత్థాయ కతే మహావంసే
లోకహపాసాదమహో నామ
సత్తవీసతిమో పరిచ్ఛేదో.