సోళసమ పరిచ్ఛేద

చేతియపబ్బతవిహార పటిగ్గహకో

౧. పురే చరిత్వా పిణ్డాయ, కరిత్వా జనసఙ్గహం;

రాజగేహమ్హి భుఞ్జన్తో, కారేన్తో రాజసఙ్గహం.

౨. ఛబ్బసదివసే థేరో, మహామేఘవనే వసీ;

ఆసళ్హసుక్కపక్ఖస్స, తేరసే దివసే పన.

౩. రాజగేహమ్హి భుఞ్జిత్వా, మహారఞ్ఞో మహామతి;

మహా’ప్పమాదసుత్తన్తం, దేసయిత్వా తతో చ సో.

౪. విహారకరణం ఇచ్ఛం, తత్థ చేతియపబ్బతే;

నిక్ఖమ్మ పురిమద్వారా, అగా చేతియపబ్బతం.

౫. థేరం తత్థ గతం సుత్వా, రథం ఆరుయ్హ భూపతి;

దేవియో ద్వే చ ఆదాయ, థేరస్సానుపదం అకా.

౬. థేరా నాగచతుక్కమ్హి, నహాత్వా రహదే తహిం;

పబ్బతారోహణత్థాయ, అట్ఠంసు పటిపాటియా.

౭. రాజా రథా తదో’రుయ్హ, సబ్బే థేరే’భివాదయి;

ఉణ్హే కిలన్తే కింరాజ, ఆగతోసీ’తి అహుతే.

౮. తుమ్హాకం గమనాసఙ్కీ, ఆగతోమ్హీ’తి భాసితే;

ఇధేవ వస్సం వసితుం, ఆగతమ్హా’తి భాసియ.

౯. తస్సూపనాయికం థేరో, ఖన్ధకం ఖన్ధకోవిదో;

కథేసి రఞ్ఞో తం సుత్వా, భాగినేయ్యో చ రాజినో.

౧౦. మహారిట్ఠో మహామచ్చో, పఞ్చపఞ్ఞాసభాతుహి;

సద్ధిం జేట్ఠకనిట్ఠేహి, రాజానమభితో ఠితో.

౧౧. యాచిత్వా తదహు చేవ, పబ్బజుం థేరసన్తికే;

పత్తారహత్తం సబ్బేపి, తే ఖురగ్గే మహామతీ.

౧౨. కన్తకచేతియఠానే, పరితో తదహేవ సో;

కమ్మాని ఆరభాపేత్వా, లేణాని అట్ఠసట్ఠియో.

౧౩. అగమాసి పురం రాజా, థేరా తత్థేవ తే వసుం;

కాలే పిణ్డాయ నగరం, పవిసన్తా’నుకమ్పకా.

౧౪. నిట్ఠితే లేణకమ్మమ్హి, ఆసళ్హిపుణ్ణమాసియం;

గన్త్వా అదాసి థేరానం, రాజా విహారదక్ఖిణం.

౧౫. ద్వత్తింసమాళకానఞ్చ, విహారస్స చ తస్స ఖో;

సీమం సీమాతిగో థేరో, బన్ధిత్వా తదహేవ సో.

౧౬. తేసం పబ్బజ్జాపేక్ఖానం, అకాసి ఉపసమ్పదం;

సబ్బేసం సబ్బపఠమం, బద్ధే తుమ్బరుమాళకే.

౧౭. ఏతే ద్వాసట్ఠి అరహన్తో, సబ్బే చేతియపబ్బతే;

తత్థ వస్సం ఉపగన్త్వా, అకంసు రాజసఙ్గహం.

౧౮. దేవమనుస్సగణగణితం తం,

తఞ్చ గణం గుణవిత్థతకిత్తిం;

యానముపచ్చ చ మానయమానా,

పుఞ్ఞచయం విపులం అకరింసూతి.

సుజనపసాదసంవేగత్థాయ కతే మహావంసే

చేతియపబ్బతవిహారపటిగ్గహకో నామ

సోళసమో పరిచ్ఛేదో.