ద్వాదసమ పరిచ్ఛేద

నానాదేసపసాదో

౧. థేరో మోగ్గలిపుత్తో సో, జినసాసన జోతకో;

నిట్ఠాపేత్వాన సంగీతిం, పేక్ఖమానో అనాగతం.

౨. సాసనస్స పతిట్ఠానం, పచ్చన్తేసు అవేక్ఖియ;

పేసేసి కత్తికే మాసే, తేతే థేరే తహిం తహిం.

౩. థేరం కస్మీరగన్ధారం, మజ్ఝన్తికమపేసయి;

అపేసయీ మహాదేవ-త్థేరం మహిసమణ్డలం.

౪. వనవాసిం అపేసయి, థేరం రక్ఖితనామకం;

తథా’పరన్తకం యోన-ధమ్మరక్ఖితనామకం.

౫. మహారట్ఠం మహాధమ్మ-రక్ఖితత్థేర నామకం;

మహారక్ఖిత థేరం తం, యోన లోకమపేసయి.

౬. పేసేసి మజ్ఝిమం థేరం, హిమవన్తపదేసకం;

సువణ్ణభూమిం థేరే ద్వే, సోణముత్తర మేవ చ.

౭. మహామహిన్దత్థేరం తం, థేర ఇట్టియముత్తియం;

సమ్బలం భద్దసాలఞ్చ, సకే సద్ధివిహారికే.

౮. లంకాదీపే మనుఞ్ఞమ్హి, మనుఞ్ఞం జినసాసనం;

పతిట్ఠాపేథ తుమ్హే’తి, పఞ్చ థేరే అపేసయి.

౯. తదా కస్మీరగన్ధారే, పక్కం సస్సం మహిద్ధికో;

అరవాలో నాగరాజా, వస్సం కరకసఞ్ఞితం.

౧౦. వస్సా పేత్వా సముద్దస్మిం, సబ్బం ఖిపతిదారుణో;

తత్ర మజ్ఝన్తికత్థేరో, ఖిప్పం గన్త్వా విహాయసా.

౧౧. అరవాలదహేవారి-పిట్ఠే చఙ్కమనాదికే;

అకాసి దిస్వా తంనాగా, రుట్ఠారఞ్ఞో నివేదయుం.

౧౨. నాగరాజా’థరుట్ఠో సో, వివిధా భిసికా’కరి;

వాతా మహన్తా వాయన్తి, మేఘో గజ్జతి వస్సతి.

౧౩. ఫలన్త్య’సనియో విజ్జు, నిచ్ఛరన్తి తతో తతో;

మహిరుహా పబ్బతానం, కూటాని పపతన్తి చ.

౧౪. విరూపరూపా నాగా చ, భింసాపేన్తి సమన్తతో;

సయం ధుపాయతి జలతి, అక్కోసన్తో అనేకధా.

౧౫. సబ్బం తం ఇద్ధియా థేరో, పటిబాహియ భింసనం;

అవోచ నాగరాజం తం, దస్సేన్తో బలముత్తమం.

౧౬. సదేవ కోపి చే లోకో, ఆగన్త్వా తాసయేయ్య మం;

న మే పటిబలో అస్స, జనేతుం భయభేరవం.

౧౭. సచే’పి త్వం మహిం సబ్బం, ససముద్దం సపబ్బతం;

ఉక్ఖిపిత్వా మహానాగ, ఖిపేయ్యాసి మమో’పరి.

౧౮. నేవ మే సక్కుణేయ్యాసి, జనేతుం భయభేరవం;

అఞ్ఞదత్థు తవే‘వ’స్స, విఘాతో ఉరగాధిప.

౧౯. తంసుత్వా నిమ్మదస్స’స్స, థేరో ధమ్మమదేసయి;

తతో సరణసీలేసు, నాగరాజా పతిట్ఠహి.

౨౦. తథేవ చతురాసీతి-సహస్సాని భుజఙ్గమా;

హిమవన్తేవ గన్ధబ్బా, యక్ఖా కుమ్భణ్డకా బహూ.

౨౧. పణ్డకో నామ యక్ఖో తు, సద్ధింహారిత యక్ఖియా;

పఞ్చసతేహి పుత్తేహి, ఫలం పాపుణి ఆదికం.

౨౨. ‘‘మా’’దాని కోధం జనియిత్థ, ఇతో ఉద్ధం యథాపురే;

ససఘాతఞ్చ మా’కత్థ, సుఖకామాహి పాణినో.

౨౩. కరోథ మేత్తం సత్తేసు, వసన్తు మనుజా సుఖం;

ఇతి తేనా’నుసిట్ఠా తే, తథేవ పటిపజ్జిసుం.

౨౪. తతో రతనపల్లఙ్కే, థేరం సో ఉరగాధిపో;

నిసీదాపియ అట్ఠాసి, బీజమానో తదన్తికే.

౨౫. తదా కస్మీరగన్ధార-వాసినో మనుజా’గతా;

నాగరాజస్స పూజత్థం, మన్త్వా థేరం మహిద్ధికం.

౨౬. థేరమేవా’భి వాదేత్వా, ఏకమన్తం నిసీదిసుం;

తేసం ధమ్మమదేసేసి, థేరో ఆసివిసోపమం.

౨౭. అసీతియా సహస్సానం, ధమ్మాభిసమయో అహు;

సతసహస్స పురిసా, పబ్బజుం థేరసన్తికే.

౨౮. తతోప్పభుపతి కస్మిర-గన్ధారం తే ఇదానిపి;

ఆసుం కాసావ పజ్జోతా, వత్థుత్తయపరాయనా.

౨౯. గన్త్వా మహాదేవత్థేరో, దేసం మహిసమణ్డలం;

సుత్తన్తం దేవదూతం సో, కథేసి జనమజ్ఝగో.

౩౦. చత్తాలీస సహస్సాని, ధమ్మచక్ఖుం విసోధయుం;

చత్తాలీస సహస్సాని, పబ్బజింసు తదన్తికే.

౩౧. గన్త్వా’థ రక్ఖితత్థేరో, వనవాసిం నభే ఠితో;

సంయుత్తమనమతగ్గం, కథేసి జనమజ్ఝగో.

౩౨. సట్ఠి నరసహస్సానం, ధమ్మాభిసమయో అహు;

సత్తతింస సహస్సాని, పబ్బజింసు తదన్తికే.

౩౩. విహారానం పఞ్చసతం, తస్మిందేసే పతిట్ఠహి;

పతిట్ఠాపేసి తత్థేవం, థేరో సో జినసాసనం.

౩౪. గన్త్వా’పరన్తకం థేరో, యోనకో ధమ్మరక్ఖితో;

అగ్గిక్ఖన్ధోపమం సుత్తం, కథేత్వా జనమజ్ఝగో.

౩౫. సత్తతింస సహస్సాని, పాణే తత్థ సమాగతే;

ధమ్మామతమపాయేసి, ధమ్మా ధమ్మేసు కోవిదో.

౩౬. పురిసానఞ్చ సహస్సఞ్చ, ఇత్థియో చ తతో’ధికా;

ఖత్తియానం కులాయేవ, నిక్ఖమిత్వాన పబ్బజుం.

౩౭. మహారట్ఠమిసీ గన్త్వా, సో మహాధమ్మరక్ఖితో;

మహానారదకస్సపవ్హం, జాతకం కథయీ తహిం.

౩౮. మగ్గఫలం పాపుణింసు, చతురాసీతి సహస్సకా;

తేరసన్తు సహస్సాని, పబ్బజింసు తదన్తికే.

౩౯. గన్త్వాన యోనవిసయం, సో మహాధమ్మరక్ఖితో ఇసి;

కాళకారామ సుత్తన్తం, కథేసి జనమజ్ఝగో.

౪౦. పాణసత సహస్సాని, సహస్సాని చ సత్తతి;

మగ్గఫలం పాపుణింసు, దస సహస్సాని పబ్బజుం.

౪౧. గన్త్వా చతూహి థేరేహి, దేసేసి మజ్ఝిమో ఇసి;

హిమవన్తపదేసస్మిం, ధమ్మచక్కపవత్తనం.

౪౨. మగ్గఫలపాపుణింసు, అసీతిపాణ కోటియో;

విసుం తే పఞ్చరట్ఠాని, పఞ్చథేరా పసాదయుం.

౪౩. పురిససతసహస్సాని, ఏకేకస్సేవ సన్తికే;

పబ్బజింసు పసాదేన, సమ్మాసమ్బుద్ధ సాసనే.

౪౪. సద్ధిం ఉత్తరథేరేన, సోణత్థేరో మహిద్ధికో;

సువణ్ణభూమిం అగమా, తస్మిం తు సమయే పన.

౪౫. జాతే జాతే రాజగేహే, దారకే రుద్దరక్ఖసీ;

సముద్దతో నిక్ఖమిత్వా, భక్ఖిత్వా పన గచ్ఛతి.

౪౬. తస్మిం ఖణే రాజగేహే,

జాతో హోతి కుమారకో;

థేరే మనుస్సా పస్సిత్వా,

రక్ఖసానం సహాయకా.

౪౭. ఇతి చిన్తియ మారేతుం, సా యువా ఉపసఙ్కముం;

‘‘కిమేతన్తి’’చ పుచ్ఛిత్వా, థేరం తే ఏవ మాహుతే.

౪౮. సమణా మయం హిమవన్తా, న రక్ఖసి సహాయకా;

రక్ఖసీ సా సపరిసా, నిక్ఖన్తా హోతి సాగరా.

౪౯. తం దిస్వాన మహారావం, విరవింసు మహాజనా;

దిగుణే రక్ఖసే థేరో, మాపయిత్వా భయానకే.

౫౦. తం రక్ఖసిం సపరిసం, పరిక్ఖిపి సమన్తతో;

ఇదం ఇమేహి ఉద్ధన్తి, మన్త్వా భీతా పలాయిసా.

౫౧. తస్స దేసస్స ఆరక్ఖం, ఠపేత్వాన సమన్తతో;

తస్మిం సమాగమే థేరో, బ్రహ్మజాలమదేసయి.

౫౨. సరణేసు చ సీలేసు, అట్ఠంసు బహవో జనా;

సట్ఠియా తు సహస్సానం, ధమ్మాభిసమయో అహు.

౫౩. అడ్ఢుడ్ఢాని సహస్సాని, పబ్బజుం కులదారకా;

పబ్బజింసు దియడ్ఢన్తు, సహస్సం కులధీతరో.

౫౪. తతోప్పభుతి సఞ్జాతే, రాజగేహే కుమారకే;

నామం కరింసు రాజానో, సోణుత్తర సనామకే.

౫౫. మహాజనస్సాపి జినస్స కడ్ఢనం;

విహాయ పత్తం అమతం సుఖమ్పితే;

కరింసు లోకస్స హితం తహిం తహిం;

భవేయ్య యో లోకహితే పమాదవాతి.

సుజనప్పసాద సంవేగత్థాయ కతే మహావంసే

నానాదేసపసాదో నామ ద్వాదసమో పరిచ్ఛేదో.