౯. సమణవగ్గో

౧. భిక్ఖుసుత్తం

౮౫. [మహాని. ౧౮; చూళని. అజితమాణవపుచ్ఛానిద్దేస ౮] ‘‘సత్తన్నం, భిక్ఖవే, ధమ్మానం భిన్నత్తా భిక్ఖు హోతి. కతమేసం సత్తన్నం? సక్కాయదిట్ఠి భిన్నా హోతి, విచికిచ్ఛా భిన్నా హోతి, సీలబ్బతపరామాసో భిన్నో హోతి, రాగో భిన్నో హోతి, దోసో భిన్నో హోతి, మోహో భిన్నో హోతి, మానో భిన్నో హోతి. ఇమేసం ఖో, భిక్ఖవే, సత్తన్నం ధమ్మానం భిన్నత్తా భిక్ఖు హోతీ’’తి. పఠమం.

౨. సమణసుత్తం

౮౬. సత్తన్నం, భిక్ఖవే, ధమ్మానం సమితత్తా సమణో హోతి…పే…. దుతియం.

౩. బ్రాహ్మణసుత్తం

౮౭. బాహితత్తా బ్రాహ్మణో హోతి…పే…. తతియం.

౪. సోత్తియసుత్తం

౮౮. నిస్సుతత్తా [నిస్సుత్తత్తా (స్యా.) మ. ని. ౧.౪౩౪ పస్సితబ్బం] సోత్తియో [సోత్థికో (సీ.), సోత్తికో (స్యా.)] హోతి…పే…. చతుత్థం.

౫. న్హాతకసుత్తం

౮౯. న్హాతత్తా న్హాతకో [నహాతత్తో నహాతకో (సీ. స్యా.)] హోతి…పే…. పఞ్చమం.

౬. వేదగూసుత్తం

౯౦. విదితత్తా వేదగూ హోతి…పే…. ఛట్ఠం.

౭. అరియసుత్తం

౯౧. ఆరకత్తా [అరహత్తా (సీ.), అరీ హతత్తా (క.) మ. ని. ౧.౪౩౪ పాళి అట్ఠకథాటీకా పస్సితబ్బా. స్యామపోత్థకే పన సకలమ్పి ఇదం సత్తమసుత్తం నత్థి] అరియో హోతి…పే…. సత్తమం.

౮. అరహాసుత్తం

౯౨. ‘‘ఆరకత్తా అరహా హోతి. కతమేసం సత్తన్నం? సక్కాయదిట్ఠి ఆరకా హోతి, విచికిచ్ఛా ఆరకా హోతి, సీలబ్బతపరామాసో ఆరకో హోతి, రాగో ఆరకో హోతి, దోసో ఆరకో హోతి, మోహో ఆరకో హోతి, మానో ఆరకో హోతి. ఇమేసం ఖో, భిక్ఖవే, సత్తన్నం ధమ్మానం ఆరకత్తా అరహా హోతీ’’తి. అట్ఠమం.

౯. అసద్ధమ్మసుత్తం

౯౩. ‘‘సత్తిమే, భిక్ఖవే, అసద్ధమ్మా. కతమే సత్త? అస్సద్ధో హోతి, అహిరికో హోతి, అనోత్తప్పీ హోతి, అప్పస్సుతో హోతి, కుసీతో హోతి, ముట్ఠస్సతి హోతి, దుప్పఞ్ఞో హోతి. ఇమే ఖో, భిక్ఖవే, సత్త అసద్ధమ్మా’’తి. నవమం.

౧౦. సద్ధమ్మసుత్తం

౯౪. ‘‘సత్తిమే, భిక్ఖవే, సద్ధమ్మా. కతమే సత్త? సద్ధో హోతి, హిరీమా హోతి, ఓత్తప్పీ హోతి, బహుస్సుతో హోతి, ఆరద్ధవీరియో హోతి, సతిమా హోతి, పఞ్ఞవా హోతి. ఇమే ఖో, భిక్ఖవే, సత్త సద్ధమ్మా’’తి. దసమం.

సమణవగ్గో నవమో.