౧౦. ఆహునేయ్యవగ్గో

౯౫. ‘‘సత్తిమే, భిక్ఖవే, పుగ్గలా ఆహునేయ్యా…పే… దక్ఖిణేయ్యా అఞ్జలికరణీయా అనుత్తరం పుఞ్ఞక్ఖేత్తం లోకస్స. కతమే సత్త? ఇధ, భిక్ఖవే, ఏకచ్చో పుగ్గలో చక్ఖుస్మిం అనిచ్చానుపస్సీ విహరతి అనిచ్చసఞ్ఞీ అనిచ్చపటిసంవేదీ సతతం సమితం అబ్బోకిణ్ణం చేతసా అధిముచ్చమానో పఞ్ఞాయ పరియోగాహమానో. సో ఆసవానం ఖయా అనాసవం చేతోవిముత్తిం పఞ్ఞావిముత్తిం దిట్ఠేవ ధమ్మే సయం అభిఞ్ఞా సచ్ఛికత్వా ఉపసమ్పజ్జ విహరతి. అయం ఖో, భిక్ఖవే, పఠమో పుగ్గలో ఆహునేయ్యో పాహునేయ్యో…పే… అనుత్తరం పుఞ్ఞక్ఖేత్తం లోకస్స.

‘‘పున చపరం, భిక్ఖవే, ఇధేకచ్చో పుగ్గలో చక్ఖుస్మిం అనిచ్చానుపస్సీ విహరతి అనిచ్చసఞ్ఞీ అనిచ్చపటిసంవేదీ సతతం సమితం అబ్బోకిణ్ణం చేతసా అధిముచ్చమానో పఞ్ఞాయ పరియోగాహమానో. తస్స అపుబ్బం అచరిమం ఆసవపరియాదానఞ్చ హోతి జీవితపరియాదానఞ్చ. అయం, భిక్ఖవే, దుతియో పుగ్గలో ఆహునేయ్యో…పే… అనుత్తరం పుఞ్ఞక్ఖేత్తం లోకస్స.

‘‘పున చపరం, భిక్ఖవే, ఇధేకచ్చో పుగ్గలో చక్ఖుస్మిం అనిచ్చానుపస్సీ విహరతి అనిచ్చసఞ్ఞీ అనిచ్చపటిసంవేదీ సతతం సమితం అబ్బోకిణ్ణం చేతసా అధిముచ్చమానో పఞ్ఞాయ పరియోగాహమానో. సో పఞ్చన్నం ఓరమ్భాగియానం సంయోజనానం పరిక్ఖయా అన్తరాపరినిబ్బాయీ హోతి…పే… ఉపహచ్చపరినిబ్బాయీ హోతి…పే… అసఙ్ఖారపరినిబ్బాయీ హోతి…పే… ససఙ్ఖారపరినిబ్బాయీ హోతి…పే… ఉద్ధంసోతో హోతి అకనిట్ఠగామీ. అయం, భిక్ఖవే, సత్తమో పుగ్గలో ఆహునేయ్యో…పే… అనుత్తరం పుఞ్ఞక్ఖేత్తం లోకస్స. ఇమే ఖో, భిక్ఖవే, సత్త పుగ్గలా ఆహునేయ్యా పాహునేయ్యా దక్ఖిణేయ్యా అఞ్జలికరణీయా అనుత్తరం పుఞ్ఞక్ఖేత్తం లోకస్సా’’తి.

౯౬-౬౨౨. సత్తిమే, భిక్ఖవే, పుగ్గలా ఆహునేయ్యా పాహునేయ్యా…పే… అనుత్తరం పుఞ్ఞక్ఖేత్తం లోకస్స. కతమే సత్త? ఇధ, భిక్ఖవే, ఏకచ్చో పుగ్గలో చక్ఖుస్మిం దుక్ఖానుపస్సీ విహరతి…పే… చక్ఖుస్మిం అనత్తానుపస్సీ విహరతి…పే… చక్ఖుస్మిం ఖయానుపస్సీ విహరతి…పే… చక్ఖుస్మిం వయానుపస్సీ విహరతి…పే… చక్ఖుస్మిం విరాగానుపస్సీ విహరతి…పే… చక్ఖుస్మిం నిరోధానుపస్సీ విహరతి…పే… చక్ఖుస్మిం పటినిస్సగ్గానుపస్సీ విహరతి…పే….

సోతస్మిం…పే… ఘానస్మిం… జివ్హాయ… కాయస్మిం… మనస్మిం…పే….

రూపేసు…పే… సద్దేసు… గన్ధేసు… రసేసు… ఫోట్ఠబ్బేసు … ధమ్మేసు …పే….

చక్ఖువిఞ్ఞాణే…పే… సోతవిఞ్ఞాణే… ఘానవిఞ్ఞాణే… జివ్హావిఞ్ఞాణే… కాయవిఞ్ఞాణే… మనోవిఞ్ఞాణే…పే….

చక్ఖుసమ్ఫస్సే…పే… సోతసమ్ఫస్సే… ఘానసమ్ఫస్సే… జివ్హాసమ్ఫస్సే… కాయసమ్ఫస్సే… మనోసమ్ఫస్సే…పే….

చక్ఖుసమ్ఫస్సజాయ వేదనాయ…పే… సోతసమ్ఫస్సజాయ వేదనాయ… ఘానసమ్ఫస్సజాయ వేదనాయ… జివ్హాసమ్ఫస్సజాయ వేదనాయ… కాయసమ్ఫస్సజాయ వేదనాయ… మనోసమ్ఫస్సజాయ వేదనాయ…పే….

రూపసఞ్ఞాయ…పే… సద్దసఞ్ఞాయ… గన్ధసఞ్ఞాయ… రససఞ్ఞాయ… ఫోట్ఠబ్బసఞ్ఞాయ… ధమ్మసఞ్ఞాయ…పే….

రూపసఞ్చేతనాయ…పే… సద్దసఞ్చేతనాయ… గన్ధసఞ్చేతనాయ… రససఞ్చేతనాయ… ఫోట్ఠబ్బసఞ్చేతనాయ… ధమ్మసఞ్చేతనాయ…పే….

రూపతణ్హాయ…పే… సద్దతణ్హాయ… గన్ధతణ్హాయ… రసతణ్హాయ… ఫోట్ఠబ్బతణ్హాయ… ధమ్మతణ్హాయ…పే….

రూపవితక్కే …పే… సద్దవితక్కే… గన్ధవితక్కే… రసవితక్కే… ఫోట్ఠబ్బవితక్కే… ధమ్మవితక్కే…పే….

రూపవిచారే…పే… సద్దవిచారే… గన్ధవిచారే… రసవిచారే… ఫోట్ఠబ్బవిచారే… ధమ్మవిచారే…పే….

‘‘పఞ్చక్ఖన్ధే [( ) సీ. స్యా. పోత్థకేసు నత్థి] …పే… రూపక్ఖన్ధే… వేదనాక్ఖన్ధే… సఞ్ఞాక్ఖన్ధే… సఙ్ఖారక్ఖన్ధే… విఞ్ఞాణక్ఖన్ధే అనిచ్చానుపస్సీ విహరతి…పే… దుక్ఖానుపస్సీ విహరతి… అనత్తానుపస్సీ విహరతి… ఖయానుపస్సీ విహరతి… వయానుపస్సీ విహరతి… విరాగానుపస్సీ విహరతి… నిరోధానుపస్సీ విహరతి… పటినిస్సగ్గానుపస్సీ విహరతి…పే… లోకస్సా’’తి.

‘‘ఛద్వారారమ్మణేస్వేత్థ, విఞ్ఞాణేసు చ ఫస్సేసు;

వేదనాసు చ ద్వారస్స, సుత్తా హోన్తి విసుం అట్ఠ.

‘‘సఞ్ఞా సఞ్చేతనా తణ్హా, వితక్కేసు విచారే చ;

గోచరస్స విసుం అట్ఠ, పఞ్చక్ఖన్ధే చ పచ్చేకే.

‘‘సోళసస్వేత్థ మూలేసు, అనిచ్చం దుక్ఖమనత్తా;

ఖయా వయా విరాగా చ, నిరోధా పటినిస్సగ్గా.

‘‘కమం అట్ఠానుపస్సనా, యోజేత్వాన విసుం విసుం;

సమ్పిణ్డితేసు సబ్బేసు, హోన్తి పఞ్చ సతాని చ;

అట్ఠవీసతి సుత్తాని, ఆహునేయ్యే చ వగ్గికే’’ [ఇమా ఉద్దానగాథాయో సీ. స్యా. పోత్థకేసు నత్థి].

ఆహునేయ్యవగ్గో దసమో.