౫. పఠమవినయధరసోభనసుత్తం

౭౯. ‘‘సత్తహి, భిక్ఖవే, ధమ్మేహి సమన్నాగతో [సమన్నాగతో భిక్ఖు (సీ. స్యా. క.) అనన్తరసుత్తద్వేయే పన ఇదం పాఠనానత్తం నత్థి. పరి. ౩౨౭] వినయధరో సోభతి. కతమేహి సత్తహి? ఆపత్తిం జానాతి, అనాపత్తిం జానాతి, లహుకం ఆపత్తిం జానాతి, గరుకం ఆపత్తిం జానాతి, సీలవా హోతి…పే… సమాదాయ సిక్ఖతి సిక్ఖాపదేసు, చతున్నం ఝానానం ఆభిచేతసికానం నికామలాభీ హోతి అకిచ్ఛలాభీ అకసిరలాభీ, ఆసవానం ఖయా…పే… సచ్ఛికత్వా ఉపసమ్పజ్జ విహరతి. ఇమేహి ఖో, భిక్ఖవే, సత్తహి ధమ్మేహి సమన్నాగతో వినయధరో సోభతీ’’తి. పఞ్చమం.