౯. సునేత్తసుత్తం

౭౩. [అ. ని. ౬.౫౪; ౭.౬౬] ‘‘భూతపుబ్బం, భిక్ఖవే, సునేత్తో నామ సత్థా అహోసి తిత్థకరో కామేసు వీతరాగో. సునేత్తస్స ఖో పన, భిక్ఖవే, సత్థునో అనేకాని సావకసతాని అహేసుం. సునేత్తో సత్థా సావకానం బ్రహ్మలోకసహబ్యతాయ ధమ్మం దేసేసి. యే ఖో పన, భిక్ఖవే [యే ఖో భిక్ఖవే (సీ. స్యా.)], సునేత్తస్స సత్థునో బ్రహ్మలోకసహబ్యతాయ ధమ్మం దేసేన్తస్స చిత్తాని నప్పసాదేసుం తే కాయస్స భేదా పరం మరణా అపాయం దుగ్గతిం వినిపాతం నిరయం ఉపపజ్జింసు. యే ఖో పన, భిక్ఖవే, సునేత్తస్స సత్థునో బ్రహ్మలోకసహబ్యతాయ ధమ్మం దేసేన్తస్స చిత్తాని పసాదేసుం తే కాయస్స భేదా పరం మరణా సుగతిం సగ్గం లోకం ఉపపజ్జింసు.

‘‘భూతపుబ్బం, భిక్ఖవే, మూగపక్ఖో నామ సత్థా అహోసి…పే… అరనేమి నామ సత్థా అహోసి…పే… కుద్దాలకో [కుద్దాలో (సీ. స్యా.)] నామ సత్థా అహోసి…పే… హత్థిపాలో నామ సత్థా అహోసి…పే… జోతిపాలో నామ సత్థా అహోసి…పే… అరకో నామ సత్థా అహోసి తిత్థకరో కామేసు వీతరాగో. అరకస్స ఖో పన, భిక్ఖవే, సత్థునో అనేకాని సావకసతాని అహేసుం. అరకో నామ సత్థా సావకానం బ్రహ్మలోకసహబ్యతాయ ధమ్మం దేసేసి. యే ఖో పన, భిక్ఖవే, అరకస్స సత్థునో బ్రహ్మలోకసహబ్యతాయ ధమ్మం దేసేన్తస్స చిత్తాని నప్పసాదేసుం, తే కాయస్స భేదా పరం మరణా అపాయం దుగ్గతిం వినిపాతం నిరయం ఉపపజ్జింసు. యే ఖో పన, భిక్ఖవే, అరకస్స సత్థునో బ్రహ్మలోకసహబ్యతాయ ధమ్మం దేసేన్తస్స చిత్తాని పసాదేసుం, తే కాయస్స భేదా పరం మరణా సుగతిం సగ్గం లోకం ఉపపజ్జింసు.

‘‘తం కిం మఞ్ఞథ, భిక్ఖవే, యో ఇమే సత్త సత్థారే తిత్థకరే కామేసు వీతరాగే అనేకసతపరివారే ససావకసఙ్ఘే పదుట్ఠచిత్తో అక్కోసేయ్య పరిభాసేయ్య, బహుం సో అపుఞ్ఞం పసవేయ్యా’’తి? ‘‘ఏవం, భన్తే’’. ‘‘యో, భిక్ఖవే, ఇమే సత్త సత్థారే తిత్థకరే కామేసు వీతరాగే అనేకసతపరివారే ససావకసఙ్ఘే పదుట్ఠచిత్తో అక్కోసేయ్య పరిభాసేయ్య, బహుం సో అపుఞ్ఞం పసవేయ్య. యో ఏకం దిట్ఠిసమ్పన్నం పుగ్గలం పదుట్ఠచిత్తో అక్కోసతి పరిభాసతి, అయం తతో బహుతరం అపుఞ్ఞం పసవతి. తం కిస్స హేతు? నాహం, భిక్ఖవే, ఇతో బహిద్ధా ఏవరూపిం ఖన్తిం వదామి యథామం సబ్రహ్మచారీసు’’.

‘‘తస్మాతిహ, భిక్ఖవే, ఏవం సిక్ఖితబ్బం – ‘న నో సబ్రహ్మచారీసు [న త్వేవ అమ్హం సబ్రహ్మచారీసు (స్యా.) అఙ్గుత్తరనికాయే అఞ్ఞథా దిస్సతి] చిత్తాని పదుట్ఠాని భవిస్సన్తీ’తి. ఏవఞ్హి వో, భిక్ఖవే, సిక్ఖితబ్బ’’న్తి. నవమం.