౬. సక్కచ్చసుత్తం

౭౦. అథ ఖో ఆయస్మతో సారిపుత్తస్స రహోగతస్స పటిసల్లీనస్స ఏవం చేతసో పరివితక్కో ఉదపాది – ‘‘కిం ను ఖో, భిక్ఖు, సక్కత్వా గరుం కత్వా ఉపనిస్సాయ విహరన్తో అకుసలం పజహేయ్య, కుసలం భావేయ్యా’’తి? అథ ఖో ఆయస్మతో సారిపుత్తస్స ఏతదహోసి – ‘‘సత్థారం ఖో, భిక్ఖు, సక్కత్వా గరుం కత్వా ఉపనిస్సాయ విహరన్తో అకుసలం పజహేయ్య, కుసలం భావేయ్య. ధమ్మం ఖో, భిక్ఖు…పే… సఙ్ఘం ఖో, భిక్ఖు…పే… సిక్ఖం ఖో, భిక్ఖు…పే… సమాధిం ఖో, భిక్ఖు…పే… అప్పమాదం ఖో, భిక్ఖు…పే… పటిసన్థారం ఖో, భిక్ఖు సక్కత్వా గరుం కత్వా ఉపనిస్సాయ విహరన్తో అకుసలం పజహేయ్య, కుసలం భావేయ్యా’’తి.

అథ ఖో ఆయస్మతో సారిపుత్తస్స ఏతదహోసి – ‘‘ఇమే ఖో మే ధమ్మా పరిసుద్ధా పరియోదాతా, యంనూనాహం ఇమే ధమ్మే గన్త్వా [గహేత్వా (క.)] భగవతో ఆరోచేయ్యం. ఏవం మే ఇమే ధమ్మా పరిసుద్ధా చేవ భవిస్సన్తి పరిసుద్ధసఙ్ఖాతతరా చ. సేయ్యథాపి నామ పురిసో సువణ్ణనిక్ఖం అధిగచ్ఛేయ్య పరిసుద్ధం పరియోదాతం. తస్స ఏవమస్స – ‘అయం ఖో మే సువణ్ణనిక్ఖో పరిసుద్ధో పరియోదాతో, యంనూనాహం ఇమం సువణ్ణనిక్ఖం గన్త్వా [గహేత్వా (క.)] కమ్మారానం దస్సేయ్యం. ఏవం మే అయం సువణ్ణనిక్ఖో సకమ్మారగతో పరిసుద్ధో చేవ భవిస్సతి పరిసుద్ధసఙ్ఖాతతరో చ. ఏవమేవం [ఖో (క.)] మే ఇమే ధమ్మా పరిసుద్ధా పరియోదాతా, యంనూనాహం ఇమే ధమ్మే గన్త్వా [గహేత్వా (క.)] భగవతో ఆరోచేయ్యం. ఏవం మే ఇమే ధమ్మా పరిసుద్ధా చేవ భవిస్సన్తి పరిసుద్ధసఙ్ఖాతతరా చా’’’తి.

అథ ఖో ఆయస్మా సారిపుత్తో సాయన్హసమయం పటిసల్లానా వుట్ఠితో యేన భగవా తేనుపసఙ్కమి; ఉపసఙ్కమిత్వా భగవన్తం అభివాదేత్వా ఏకమన్తం నిసీది. ఏకమన్తం నిసిన్నో ఖో ఆయస్మా సారిపుత్తో భగవన్తం ఏతదవోచ –

‘‘ఇధ మయ్హం, భన్తే, రహోగతస్స పటిసల్లీనస్స ఏవం చేతసో పరివితక్కో ఉదపాది – ‘కిం ను ఖో, భిక్ఖు, సక్కత్వా గరుం కత్వా ఉపనిస్సాయ విహరన్తో అకుసలం పజహేయ్య, కుసలం భావేయ్యా’తి? అథ ఖో తస్స మయ్హం, భన్తే, ఏతదహోసి – ‘సత్థారం ఖో, భిక్ఖు, సక్కత్వా గరుం కత్వా ఉపనిస్సాయ విహరన్తో అకుసలం పజహేయ్య, కుసలం భావేయ్య. ధమ్మం ఖో, భిక్ఖు …పే… పటిసన్థారం ఖో, భిక్ఖు సక్కత్వా…పే… కుసలం భావేయ్యా’తి. అథ ఖో తస్స మయ్హం, భన్తే, ఏతదహోసి – ‘ఇమే ఖో మే ధమ్మా పరిసుద్ధా పరియోదాతా, యంనూనాహం ఇమే ధమ్మే గన్త్వా భగవతో ఆరోచేయ్యం. ఏవం మే ఇమే ధమ్మా పరిసుద్ధా చేవ భవిస్సన్తి పరిసుద్ధసఙ్ఖాతతరా చ. సేయ్యథాపి నామ పురిసో సువణ్ణనిక్ఖం అధిగచ్ఛేయ్య పరిసుద్ధం పరియోదాతం. తస్స ఏవమస్స – అయం ఖో మే సువణ్ణనిక్ఖో పరిసుద్ధో పరియోదాతో, యంనూనాహం ఇమం సువణ్ణనిక్ఖం గన్త్వా కమ్మారానం దస్సేయ్యం. ఏవం మే అయం సువణ్ణనిక్ఖో సకమ్మారగతో పరిసుద్ధో చేవ భవిస్సతి పరిసుద్ధసఙ్ఖాతతరో చ. ఏవమేవం మే ఇమే ధమ్మా పరిసుద్ధా పరియోదాతా, యంనూనాహం ఇమే ధమ్మే గన్త్వా భగవతో ఆరోచేయ్యం. ఏవం మే ఇమే ధమ్మా పరిసుద్ధా చేవ భవిస్సన్తి పరిసుద్ధసఙ్ఖాతతరా చా’’’తి.

‘‘సాధు సాధు, సారిపుత్త! సత్థారం ఖో, సారిపుత్త, భిక్ఖు సక్కత్వా గరుం కత్వా ఉపనిస్సాయ విహరన్తో అకుసలం పజహేయ్య, కుసలం భావేయ్య. ధమ్మం ఖో, సారిపుత్త, భిక్ఖు సక్కత్వా గరుం కత్వా ఉపనిస్సాయ విహరన్తో అకుసలం పజహేయ్య, కుసలం భావేయ్య. సఙ్ఘం ఖో…పే… సిక్ఖం ఖో… సమాధిం ఖో… అప్పమాదం ఖో… పటిసన్థారం ఖో, సారిపుత్త, భిక్ఖు సక్కత్వా గరుం కత్వా ఉపనిస్సాయ విహరన్తో అకుసలం పజహేయ్య, కుసలం భావేయ్యా’’తి.

ఏవం వుత్తే ఆయస్మా సారిపుత్తో భగవన్తం ఏతదవోచ – ‘‘ఇమస్స ఖో అహం, భన్తే, భగవతా సంఖిత్తేన భాసితస్స ఏవం విత్థారేన అత్థం ఆజానామి. సో వత, భన్తే, భిక్ఖు సత్థరి అగారవో ధమ్మే సగారవో భవిస్సతీతి నేతం ఠానం విజ్జతి. యో సో, భన్తే, భిక్ఖు సత్థరి అగారవో ధమ్మేపి సో అగారవో’’.

‘‘సో వత, భన్తే, భిక్ఖు సత్థరి అగారవో ధమ్మే అగారవో సఙ్ఘే సగారవో భవిస్సతీతి నేతం ఠానం విజ్జతి. యో సో, భన్తే, భిక్ఖు సత్థరి అగారవో ధమ్మే అగారవో సఙ్ఘేపి సో అగారవో.

‘‘సో వత, భన్తే, భిక్ఖు సత్థరి అగారవో ధమ్మే అగారవో సఙ్ఘే అగారవో సిక్ఖాయ సగారవో భవిస్సతీతి నేతం ఠానం విజ్జతి. యో సో, భన్తే, భిక్ఖు సత్థరి అగారవో ధమ్మే అగారవో సఙ్ఘే అగారవో సిక్ఖాయపి సో అగారవో.

‘‘సో వత, భన్తే, భిక్ఖు సత్థరి అగారవో ధమ్మే అగారవో సఙ్ఘే అగారవో సిక్ఖాయ అగారవో సమాధిస్మిం సగారవో భవిస్సతీతి నేతం ఠానం విజ్జతి. యో సో, భన్తే, భిక్ఖు సత్థరి అగారవో ధమ్మే అగారవో సఙ్ఘే అగారవో సిక్ఖాయ అగారవో సమాధిస్మిమ్పి సో అగారవో.

‘‘సో వత, భన్తే, భిక్ఖు సత్థరి అగారవో ధమ్మే అగారవో సఙ్ఘే అగారవో సిక్ఖాయ అగారవో సమాధిస్మిం అగారవో అప్పమాదే సగారవో భవిస్సతీతి నేతం ఠానం విజ్జతి. యో సో, భన్తే, భిక్ఖు సత్థరి అగారవో ధమ్మే అగారవో సఙ్ఘే అగారవో సిక్ఖాయ అగారవో సమాధిస్మిం అగారవో అప్పమాదేపి సో అగారవో.

‘‘సో వత, భన్తే, భిక్ఖు సత్థరి అగారవో ధమ్మే అగారవో సఙ్ఘే అగారవో సిక్ఖాయ అగారవో సమాధిస్మిం అగారవో అప్పమాదే అగారవో పటిసన్థారే సగారవో భవిస్సతీతి నేతం ఠానం విజ్జతి. యో సో, భన్తే, భిక్ఖు సత్థరి అగారవో…పే… అప్పమాదే అగారవో పటిసన్థారేపి సో అగారవో.

‘‘సో వత, భన్తే, భిక్ఖు సత్థరి సగారవో ధమ్మే అగారవో భవిస్సతీతి నేతం ఠానం విజ్జతి. యో సో, భన్తే, భిక్ఖు సత్థరి సగారవో ధమ్మేపి సో సగారవో…పే….

‘‘సో వత, భన్తే, భిక్ఖు సత్థరి సగారవో…పే. … అప్పమాదే సగారవో పటిసన్థారే అగారవో భవిస్సతీతి నేతం ఠానం విజ్జతి. యో సో, భన్తే, భిక్ఖు సత్థరి సగారవో…పే… అప్పమాదే సగారవో పటిసన్థారేపి సో సగారవో.

‘‘సో వత, భన్తే, భిక్ఖు సత్థరి సగారవో ధమ్మేపి సగారవో భవిస్సతీతి ఠానమేతం విజ్జతి. యో సో, భన్తే, భిక్ఖు సత్థరి సగారవో ధమ్మేపి సో సగారవో…పే….

‘‘సో వత, భన్తే, భిక్ఖు సత్థరి సగారవో…పే… అప్పమాదే సగారవో పటిసన్థారేపి సగారవో భవిస్సతీతి ఠానమేతం విజ్జతి. యో సో, భన్తే, భిక్ఖు సత్థరి సగారవో ధమ్మే సగారవో సఙ్ఘే సగారవో సిక్ఖాయ సగారవో సమాధిస్మిం సగారవో అప్పమాదే సగారవో పటిసన్థారేపి సో సగారవో’’తి.

‘‘ఇమస్స ఖో అహం, భన్తే, భగవతా సంఖిత్తేన భాసితస్స ఏవం విత్థారేన అత్థం ఆజానామీ’’తి.

‘‘సాధు సాధు, సారిపుత్త! సాధు ఖో త్వం, సారిపుత్త, ఇమస్స మయా సంఖిత్తేన భాసితస్స ఏవం విత్థారేన అత్థం ఆజానాసి. సో వత, సారిపుత్త, భిక్ఖు సత్థరి అగారవో ధమ్మే సగారవో భవిస్సతీతి నేతం ఠానం విజ్జతి…పే… యో సో, సారిపుత్త, భిక్ఖు సత్థరి అగారవో ధమ్మే అగారవో సఙ్ఘే అగారవో సిక్ఖాయ అగారవో సమాధిస్మిం అగారవో అప్పమాదేపి సో అగారవో.

‘‘సో వత, సారిపుత్త, భిక్ఖు సత్థరి అగారవో ధమ్మే అగారవో సఙ్ఘే అగారవో సిక్ఖాయ అగారవో సమాధిస్మిం అగారవో అప్పమాదే అగారవో పటిసన్థారే సగారవో భవిస్సతీతి నేతం ఠానం విజ్జతి. యో సో, సారిపుత్త, భిక్ఖు సత్థరి అగారవో ధమ్మే అగారవో సఙ్ఘే అగారవో సిక్ఖాయ అగారవో సమాధిస్మిం అగారవో అప్పమాదే అగారవో పటిసన్థారేపి సో అగారవో.

‘‘సో వత, సారిపుత్త, భిక్ఖు సత్థరి సగారవో ధమ్మే అగారవో భవిస్సతీతి నేతం ఠానం విజ్జతి…పే… యో సో, సారిపుత్త, భిక్ఖు సత్థరి సగారవో ధమ్మేపి సో సగారవో …పే….

‘‘సో వత, సారిపుత్త, భిక్ఖు సత్థరి సగారవో ధమ్మే సగారవో…పే… అప్పమాదే సగారవో పటిసన్థారే అగారవో భవిస్సతీతి నేతం ఠానం విజ్జతి. యో సో, సారిపుత్త, భిక్ఖు సత్థరి సగారవో…పే… అప్పమాదే సగారవో పటిసన్థారేపి సో సగారవో.

‘‘సో వత, సారిపుత్త, భిక్ఖు సత్థరి సగారవో ధమ్మేపి సగారవో భవిస్సతీతి ఠానమేతం విజ్జతి. యో సో, సారిపుత్త, భిక్ఖు సత్థరి సగారవో ధమ్మేపి సో సగారవో…పే….

‘‘సో వత, సారిపుత్త, భిక్ఖు సత్థరి సగారవో…పే… అప్పమాదే సగారవో పటిసన్థారేపి సో సగారవో భవిస్సతీతి ఠానమేతం విజ్జతి. యో సో, సారిపుత్త, భిక్ఖు సత్థరి సగారవో…పే… అప్పమాదే సగారవో పటిసన్థారేపి సో సగారవో’’తి.

‘‘ఇమస్స ఖో, సారిపుత్త, మయా సంఖిత్తేన భాసితస్స ఏవం విత్థారేన అత్థో దట్ఠబ్బో’’తి. ఛట్ఠం.