౫. పారిచ్ఛత్తకసుత్తం

౬౯. ‘‘యస్మిం, భిక్ఖవే, సమయే దేవానం తావతింసానం పారిచ్ఛత్తకో కోవిళారో పణ్డుపలాసో హోతి, అత్తమనా, భిక్ఖవే, దేవా తావతింసా తస్మిం సమయే హోన్తి – ‘పణ్డుపలాసో దాని పారిచ్ఛత్తకో కోవిళారో నచిరస్సేవ దాని పన్నపలాసో భవిస్సతీ’’’తి.

‘‘యస్మిం, భిక్ఖవే, సమయే దేవానం తావతింసానం పారిచ్ఛత్తకో కోవిళారో పన్నపలాసో హోతి, అత్తమనా, భిక్ఖవే, దేవా తావతింసా తస్మిం సమయే హోన్తి – ‘పన్నపలాసో దాని పారిచ్ఛత్తకో కోవిళారో నచిరస్సేవ దాని జాలకజాతో భవిస్సతీ’’’తి.

‘‘యస్మిం, భిక్ఖవే, సమయే దేవానం తావతింసానం పారిచ్ఛత్తకో కోవిళారో జాలకజాతో హోతి, అత్తమనా, భిక్ఖవే, దేవా తావతింసా తస్మిం సమయే హోన్తి – ‘జాలకజాతో దాని పారిచ్ఛత్తకో కోవిళారో నచిరస్సేవ దాని ఖారకజాతో భవిస్సతీ’’’తి.

‘‘యస్మిం, భిక్ఖవే, సమయే దేవానం తావతింసానం పారిచ్ఛత్తకో కోవిళారో ఖారకజాతో హోతి, అత్తమనా, భిక్ఖవే, దేవా తావతింసా తస్మిం సమయే హోన్తి – ‘ఖారకజాతో దాని పారిచ్ఛత్తకో కోవిళారో నచిరస్సేవ దాని కుటుమలకజాతో [కుడుమలకజాతో (సీ. స్యా. పీ.)] భవిస్సతీ’’’తి.

‘‘యస్మిం, భిక్ఖవే, సమయే దేవానం తావతింసానం పారిచ్ఛత్తకో కోవిళారో కుటుమలకజాతో హోతి, అత్తమనా, భిక్ఖవే, దేవా తావతింసా తస్మిం సమయే హోన్తి – ‘కుటుమలకజాతో దాని పారిచ్ఛత్తకో కోవిళారో నచిరస్సేవ దాని కోరకజాతో [కోకాసకజాతో (సీ. స్యా.), కోసకజాతో (క.)] భవిస్సతీ’’’తి.

‘‘యస్మిం, భిక్ఖవే, సమయే దేవానం తావతింసానం పారిచ్ఛత్తకో కోవిళారో కోరకజాతో హోతి, అత్తమనా, భిక్ఖవే, దేవా తావతింసా తస్మిం సమయే హోన్తి – ‘కోరకజాతో దాని పారిచ్ఛత్తకో కోవిళారో నచిరస్సేవ దాని సబ్బఫాలిఫుల్లో [సబ్బపాలిఫుల్లో (సీ. పీ.)] భవిస్సతీ’’’తి.

‘‘యస్మిం, భిక్ఖవే, సమయే దేవానం తావతింసానం పారిచ్ఛత్తకో కోవిళారో సబ్బఫాలిఫుల్లో హోతి, అత్తమనా, భిక్ఖవే, దేవా తావతింసా పారిచ్ఛత్తకస్స కోవిళారస్స మూలే దిబ్బే చత్తారో మాసే పఞ్చహి కామగుణేహి సమప్పితా సమఙ్గీభూతా పరిచారేన్తి.

‘‘సబ్బఫాలిఫుల్లస్స ఖో పన, భిక్ఖవే, పారిచ్ఛత్తకస్స కోవిళారస్స సమన్తా పఞ్ఞాసయోజనాని ఆభాయ ఫుటం హోతి, అనువాతం యోజనసతం గన్ధో గచ్ఛతి, అయమానుభావో పారిచ్ఛత్తకస్స కోవిళారస్స.

‘‘ఏవమేవం ఖో, భిక్ఖవే, యస్మిం సమయే అరియసావకో అగారస్మా అనగారియం పబ్బజ్జాయ చేతేతి, పణ్డుపలాసో, భిక్ఖవే, అరియసావకో తస్మిం సమయే హోతి దేవానంవ తావతింసానం పారిచ్ఛత్తకో కోవిళారో.

‘‘యస్మిం, భిక్ఖవే, సమయే అరియసావకో కేసమస్సుం ఓహారేత్వా కాసాయాని వత్థాని అచ్ఛాదేత్వా అగారస్మా అనగారియం పబ్బజితో హోతి, పన్నపలాసో, భిక్ఖవే, అరియసావకో తస్మిం సమయే హోతి దేవానంవ తావతింసానం పారిచ్ఛత్తకో కోవిళారో.

‘‘యస్మిం, భిక్ఖవే, సమయే అరియసావకో వివిచ్చేవ కామేహి…పే… పఠమం ఝానం ఉపసమ్పజ్జ విహరతి, జాలకజాతో, భిక్ఖవే, అరియసావకో తస్మిం సమయే హోతి దేవానంవ తావతింసానం పారిచ్ఛత్తకో కోవిళారో.

‘‘యస్మిం, భిక్ఖవే, సమయే అరియసావకో వితక్కవిచారానం వూపసమా…పే… దుతియం ఝానం ఉపసమ్పజ్జ విహరతి, ఖారకజాతో, భిక్ఖవే, అరియసావకో తస్మిం సమయే హోతి దేవానంవ తావతింసానం పారిచ్ఛత్తకో కోవిళారో.

‘‘యస్మిం, భిక్ఖవే, సమయే అరియసావకో పీతియా చ విరాగా…పే… తతియం ఝానం ఉపసమ్పజ్జ విహరతి, కుటుమలకజాతో, భిక్ఖవే, అరియసావకో తస్మిం సమయే హోతి దేవానంవ తావతింసానం పారిచ్ఛత్తకో కోవిళారో.

‘‘యస్మిం, భిక్ఖవే, సమయే అరియసావకో సుఖస్స చ పహానా దుక్ఖస్స చ పహానా…పే… చతుత్థం ఝానం ఉపసమ్పజ్జ విహరతి, కోరకజాతో, భిక్ఖవే, అరియసావకో తస్మిం సమయే హోతి దేవానంవ తావతింసానం పారిచ్ఛత్తకో కోవిళారో.

‘‘యస్మిం, భిక్ఖవే, సమయే అరియసావకో ఆసవానం ఖయా…పే… సచ్ఛికత్వా ఉపసమ్పజ్జ విహరతి, సబ్బఫాలిఫుల్లో, భిక్ఖవే, అరియసావకో తస్మిం సమయే హోతి దేవానంవ తావతింసానం పారిచ్ఛత్తకో కోవిళారో.

‘‘తస్మిం, భిక్ఖవే, సమయే భుమ్మా దేవా సద్దమనుస్సావేన్తి – ‘ఏసో ఇత్థన్నామో ఆయస్మా ఇత్థన్నామస్స ఆయస్మతో సద్ధివిహారికో అముకమ్హా గామా వా నిగమా వా అగారస్మా అనగారియం పబ్బజితో ఆసవానం ఖయా అనాసవం చేతోవిముత్తిం పఞ్ఞావిముత్తిం దిట్ఠేవ ధమ్మే సయం అభిఞ్ఞా సచ్ఛికత్వా ఉపసమ్పజ్జ విహరతీ’తి. భుమ్మానం దేవానం సద్దం సుత్వా చాతుమహారాజికా దేవా…పే… తావతింసా దేవా… యామా దేవా… తుసితా దేవా… నిమ్మానరతీ దేవా… పరనిమ్మితవసవత్తీ దేవా… బ్రహ్మకాయికా దేవా సద్దమనుస్సావేన్తి – ‘ఏసో ఇత్థన్నామో ఆయస్మా ఇత్థన్నామస్స ఆయస్మతో సద్ధివిహారికో అముకమ్హా గామా వా నిగమా వా అగారస్మా అనగారియం పబ్బజితో ఆసవానం ఖయా అనాసవం చేతోవిముత్తిం పఞ్ఞావిముత్తిం దిట్ఠేవ ధమ్మే సయం అభిఞ్ఞా సచ్ఛికత్వా ఉపసమ్పజ్జ విహరతీ’తి. ఇతిహ తేన ఖణేన తేన ముహుత్తేన యావ బ్రహ్మలోకా సద్దో [సాధుకారసద్దో (సీ. అట్ఠ., క. అట్ఠ.)] అబ్భుగ్గచ్ఛతి, అయమానుభావో ఖీణాసవస్స భిక్ఖునో’’తి. పఞ్చమం.