౯. దోవచస్సతాసుత్తం

౧౧౫. ‘‘తయోమే, భిక్ఖవే, ధమ్మా. కతమే తయో? దోవచస్సతా, పాపమిత్తతా, చేతసో విక్ఖేపో. ఇమే ఖో, భిక్ఖవే, తయో ధమ్మా. ఇమేసం ఖో, భిక్ఖవే, తిణ్ణం ధమ్మానం పహానాయ తయో ధమ్మా భావేతబ్బా. కతమే తయో? దోవచస్సతాయ పహానాయ సోవచస్సతా భావేతబ్బా, పాపమిత్తతాయ పహానాయ కల్యాణమిత్తతా భావేతబ్బా, చేతసో విక్ఖేపస్స పహానాయ ఆనాపానస్సతి భావేతబ్బా. ఇమేసం ఖో, భిక్ఖవే, తిణ్ణం ధమ్మానం పహానాయ ఇమే తయో ధమ్మా భావేతబ్బా’’తి. నవమం.