౨. దుచ్చరితసుత్తం

౧౦౮. ‘‘తయోమే, భిక్ఖవే, ధమ్మా. కతమే తయో? కాయదుచ్చరితం, వచీదుచ్చరితం, మనోదుచ్చరితం. ఇమే ఖో, భిక్ఖవే, తయో ధమ్మా. ఇమేసం ఖో, భిక్ఖవే, తిణ్ణం ధమ్మానం పహానాయ తయో ధమ్మా భావేతబ్బా. కతమే తయో? కాయదుచ్చరితస్స పహానాయ కాయసుచరితం భావేతబ్బం, వచీదుచ్చరితస్స పహానాయ వచీసుచరితం భావేతబ్బం, మనోదుచ్చరితస్స పహానాయ మనోసుచరితం భావేతబ్బం. ఇమేసం ఖో, భిక్ఖవే, తిణ్ణం ధమ్మానం పహానాయ ఇమే తయో ధమ్మా భావేతబ్బా’’తి. దుతియం.