౬. దుతియఅక్ఖన్తిసుత్తం

౨౧౬. ‘‘పఞ్చిమే, భిక్ఖవే, ఆదీనవా అక్ఖన్తియా. కతమే పఞ్చ? బహునో జనస్స అప్పియో హోతి అమనాపో, లుద్దో చ హోతి, విప్పటిసారీ చ, సమ్మూళ్హో కాలం కరోతి, కాయస్స భేదా పరం మరణా అపాయం దుగ్గతిం వినిపాతం నిరయం ఉపపజ్జతి. ఇమే ఖో, భిక్ఖవే, పఞ్చ ఆదీనవా అక్ఖన్తియా.

‘‘పఞ్చిమే, భిక్ఖవే, ఆనిసంసా ఖన్తియా. కతమే పఞ్చ? బహునో జనస్స పియో హోతి మనాపో, అలుద్దో చ హోతి, అవిప్పటిసారీ చ, అసమ్మూళ్హో కాలం కరోతి, కాయస్స భేదా పరం మరణా సుగతిం సగ్గం లోకం ఉపపజ్జతి. ఇమే ఖో, భిక్ఖవే, పఞ్చ ఆనిసంసా ఖన్తియా’’తి. ఛట్ఠం.