౧. అక్కోసకసుత్తం

౨౧౧. ‘‘యో సో, భిక్ఖవే, భిక్ఖు అక్కోసకపరిభాసకో అరియూపవాదీ సబ్రహ్మచారీనం, తస్స పఞ్చ ఆదీనవా పాటికఙ్ఖా. కతమే పఞ్చ? పారాజికో వా హోతి ఛిన్నపరిపన్థో [ఛిన్నపరిబన్ధో (క.)], అఞ్ఞతరం వా సంకిలిట్ఠం ఆపత్తిం ఆపజ్జతి, బాళ్హం వా రోగాతఙ్కం ఫుసతి, సమ్మూళ్హో కాలం కరోతి, కాయస్స భేదా పరం మరణా అపాయం దుగ్గతిం వినిపాతం నిరయం ఉపపజ్జతి. యో సో, భిక్ఖవే, భిక్ఖు అక్కోసకపరిభాసకో అరియూపవాదీ సబ్రహ్మచారీనం, తస్స ఇమే పఞ్చ ఆదీనవా పాటికఙ్ఖా’’తి. పఠమం.