౧. పఠమఆఘాతపటివినయసుత్తం

౧౬౧. ‘‘పఞ్చిమే, భిక్ఖవే, ఆఘాతపటివినయా యత్థ భిక్ఖునో ఉప్పన్నో ఆఘాతో సబ్బసో పటివినేతబ్బో. కతమే పఞ్చ? యస్మిం, భిక్ఖవే, పుగ్గలే ఆఘాతో జాయేథ, మేత్తా తస్మిం పుగ్గలే భావేతబ్బా; ఏవం తస్మిం పుగ్గలే ఆఘాతో పటివినేతబ్బో. యస్మిం, భిక్ఖవే, పుగ్గలే ఆఘాతో జాయేథ, కరుణా తస్మిం పుగ్గలే భావేతబ్బా; ఏవం తస్మిం పుగ్గలే ఆఘాతో పటివినేతబ్బో. యస్మిం, భిక్ఖవే, పుగ్గలే ఆఘాతో జాయేథ, ఉపేక్ఖా తస్మిం పుగ్గలే భావేతబ్బా; ఏవం తస్మిం పుగ్గలే ఆఘాతో పటివినేతబ్బో. యస్మిం, భిక్ఖవే, పుగ్గలే ఆఘాతో జాయేథ, అసతిఅమనసికారో తస్మిం పుగ్గలే ఆపజ్జితబ్బో; ఏవం తస్మిం పుగ్గలే ఆఘాతో పటివినేతబ్బో. యస్మిం, భిక్ఖవే, పుగ్గలే ఆఘాతో జాయేథ, కమ్మస్సకతా తస్మిం పుగ్గలే అధిట్ఠాతబ్బా – ‘కమ్మస్సకో అయమాయస్మా కమ్మదాయాదో కమ్మయోని కమ్మబన్ధు కమ్మప్పటిసరణో, యం కమ్మం కరిస్సతి కల్యాణం వా పాపకం వా తస్స దాయాదో భవిస్సతీ’తి; ఏవం తస్మిం పుగ్గలే ఆఘాతో పటివినేతబ్బో. ఇమే ఖో, భిక్ఖవే, పఞ్చ ఆఘాతపటివినయా, యత్థ భిక్ఖునో ఉప్పన్నో ఆఘాతో సబ్బసో పటివినేతబ్బో’’తి. పఠమం.