౭. కథాసుత్తం

౯౭. ‘‘పఞ్చహి, భిక్ఖవే, ధమ్మేహి సమన్నాగతో భిక్ఖు ఆనాపానస్సతిం భావేన్తో నచిరస్సేవ అకుప్పం పటివిజ్ఝతి. కతమేహి పఞ్చహి? ఇధ, భిక్ఖవే, భిక్ఖు అప్పట్ఠో హోతి అప్పకిచ్చో సుభరో సుసన్తోసో జీవితపరిక్ఖారేసు; అప్పాహారో హోతి అనోదరికత్తం అనుయుత్తో; అప్పమిద్ధో హోతి జాగరియం అనుయుత్తో; యాయం కథా ఆభిసల్లేఖికా చేతోవివరణసప్పాయా, సేయ్యథిదం – అప్పిచ్ఛకథా…పే… విముత్తిఞాణదస్సనకథా, ఏవరూపియా కథాయ నికామలాభీ హోతి అకిచ్ఛలాభీ అకసిరలాభీ; యథావిముత్తం చిత్తం పచ్చవేక్ఖతి. ఇమేహి ఖో, భిక్ఖవే, పఞ్చహి ధమ్మేహి సమన్నాగతో భిక్ఖు ఆనాపానస్సతిం భావేన్తో నచిరస్సేవ అకుప్పం పటివిజ్ఝతీ’’తి. సత్తమం.