౪. దుతియధమ్మవిహారీసుత్తం

౭౪. అథ ఖో అఞ్ఞతరో భిక్ఖు యేన భగవా తేనుపసఙ్కమి; ఉపసఙ్కమిత్వా భగవన్తం అభివాదేత్వా ఏకమన్తం నిసీది. ఏకమన్తం నిసిన్నో ఖో సో భిక్ఖు భగవన్తం ఏతదవోచ – ‘‘‘ధమ్మవిహారీ ధమ్మవిహారీ’తి, భన్తే, వుచ్చతి. కిత్తావతా ను ఖో, భన్తే, భిక్ఖు ధమ్మవిహారీ హోతీ’’తి?

‘‘ఇధ, భిక్ఖు, భిక్ఖు ధమ్మం పరియాపుణాతి – సుత్తం, గేయ్యం, వేయ్యాకరణం, గాథం, ఉదానం, ఇతివుత్తకం, జాతకం, అబ్భుతధమ్మం, వేదల్లం; ఉత్తరి [ఉత్తరిం (సీ. స్యా. కం. పీ.)] చస్స పఞ్ఞాయ అత్థం నప్పజానాతి. అయం వుచ్చతి, భిక్ఖు – ‘భిక్ఖు పరియత్తిబహులో, నో ధమ్మవిహారీ’’’.

‘‘పున చపరం, భిక్ఖు, భిక్ఖు యథాసుతం యథాపరియత్తం ధమ్మం విత్థారేన పరేసం దేసేతి, ఉత్తరి చస్స పఞ్ఞాయ అత్థం నప్పజానాతి. అయం వుచ్చతి, భిక్ఖు – ‘భిక్ఖు పఞ్ఞత్తిబహులో, నో ధమ్మవిహారీ’’’.

‘‘పున చపరం, భిక్ఖు, భిక్ఖు యథాసుతం యథాపరియత్తం ధమ్మం విత్థారేన సజ్ఝాయం కరోతి, ఉత్తరి చస్స పఞ్ఞాయ అత్థం నప్పజానాతి. అయం వుచ్చతి, భిక్ఖు – ‘భిక్ఖు సజ్ఝాయబహులో, నో ధమ్మవిహారీ’’’.

‘‘పున చపరం, భిక్ఖు, భిక్ఖు యథాసుతం యథాపరియత్తం ధమ్మం చేతసా అనువితక్కేతి అనువిచారేతి మనసానుపేక్ఖతి, ఉత్తరి చస్స పఞ్ఞాయ అత్థం నప్పజానాతి. అయం వుచ్చతి, భిక్ఖు – ‘భిక్ఖు వితక్కబహులో, నో ధమ్మవిహారీ’’’.

‘‘ఇధ, భిక్ఖు, భిక్ఖు ధమ్మం పరియాపుణాతి – సుత్తం, గేయ్యం, వేయ్యాకరణం, గాథం, ఉదానం, ఇతివుత్తకం, జాతకం, అబ్భుతధమ్మం, వేదల్లం; ఉత్తరి చస్స పఞ్ఞాయ అత్థం పజానాతి. ఏవం ఖో, భిక్ఖు, భిక్ఖు ధమ్మవిహారీ హోతి.

‘‘ఇతి ఖో, భిక్ఖు, దేసితో మయా పరియత్తిబహులో, దేసితో పఞ్ఞత్తిబహులో, దేసితో సజ్ఝాయబహులో, దేసితో వితక్కబహులో, దేసితో ధమ్మవిహారీ. యం ఖో, భిక్ఖు, సత్థారా కరణీయం సావకానం హితేసినా అనుకమ్పకేన అనుకమ్పం ఉపాదాయ, కతం వో తం మయా. ఏతాని, భిక్ఖు, రుక్ఖమూలాని, ఏతాని సుఞ్ఞాగారాని. ఝాయథ భిక్ఖు, మా పమాదత్థ, మా పచ్ఛా విప్పటిసారినో అహువత్థ. అయం వో అమ్హాకం అనుసాసనీ’’తి. చతుత్థం.